A Carballeira de Ventín acolleu este pasado martes, 30 de setembro, unha nova xornada das Brincadeiras Miúdas, nas que os nenos e nenas xunto coas súas familias, puideron gozar de música, baile, xogos tradicionais e creación de xoguetes. Esta edición das Brincadeiras Miúdas xuntou a máis de 200 persoas, que gozaron nun concerto de Cé Orquestra Pantasma e participaron en xogos tradicionais, xogo libre e desestruturado e un espazo para a creación libre de xoguetes con materiais naturais.

O Concello de Ames, a través dos departamentos de Normalización Lingüística e Turismo, organizou unha andaina polo Mar de Ovellas, incluída na programación de Rosalía 2024. Inicialmente, estaba previsto que se celebrase o pasado 25 de febreiro, pero mor por do mal tempo foi adiada e finalmente tivo lugar a pasada fin de semana, o sábado 20 de abril. O itinerario coincidiu co Camiño de Fisterra – Muxía. A andaina estivo teatralizada polos Quinquilláns (Tero Rodríguez e Lucho Penabade) e contou co acompañamento musical de Luís O´Caruncho. A actividade rematou no local social de Trasmonte cunha interpretacion dos Quinquilláns do poema Miña casiña meu lar e coa degustación duns petiscos.

Desde mañá, 2 de setembro, ata o vindeiro día 10 estará aberto o prazo de inscrición nos obradoiros de acollemento lingüístico “En galego, co teu acento!”, unha iniciativa que busca aproximar a veciñanza á lingua e á cultura galegas dun xeito práctico e progresivo, así como favorecer a cohesión social e a integración das persoas procedentes de fóra de Galicia. Bertamiráns e O Milladoiro acollerán cadanseu obradoiro, de case un mes de duración, con sesións de dúas horas e en horario de mañá, de luns a xoves. As inscricións, de balde, poden realizarse de xeito presencial acudindo ao Servizo de Normalización Lingüística, situado no Pazo da Peregrina de Bertamiráns, ou á oficina do Servizo de Atención ás Persoas Migrantes (SAMI), situada na rúa de Abaixo, número 10, do Milladoiro. Tamén poderá formalizarse a inscrición chamando por teléfono aos números 662 377 215 / 981 535 941. 

Este venres, 14 de abril, ás 11:15 horas, dará comezo no Auditorio de Galicia, en Santiago de Compostela, a Gala Enreguéifate-Regueifesta. Trátase dun acto no que se entregarán os premios Enreguéifate, o certame de regueifas impulsado polos concellos de Ames, Carballo, Pontevedra, Santiago de Compostela e Teo e que pon o broche de ouro á súa sexta edición. Unha trintena de centros de ensino de toda Galicia participarán activamente neste Encontro Regueifesta ao que tamén asistirá alumnado improvisador chegado de centros educativos de Euskadi e Cataluña. Este ano, o alumnado de 6º do CEIP Agro do Muíño recollerá o premio á regueifa mellor cantada na categoría escolar por “Rosalía”.