O concello de Ames inaugura por primeira vez o circuíto de BTT máis importante do noroeste español. O domingo, 1 de marzo, será a décima ocasión na que o concello acolla este evento deportivo, unha das citas con maior repercusión no mundo do ciclismo no noroeste español. Esta proba, organizada polo club ciclista amesán Os Esfola Arrós e a empresa Team Relay (Transgalaica), conta coa colaboración do Concello de Ames. A saída realizarase dende o Pazo da Peregrina de Bertamiráns ás 9:30 horas, onde comezará un circuíto de 32 quilómetros que haberá que percorrer dúas veces, facendo así en total unha proba de 64 quilómetros. As inscricións abren hoxe, 20 de xaneiro, e  estarán abertas ata o mércores 25 de febreiro, ás 23:59 horas. As inscrición pódense facer premendo nesta ligazón ou a través da web magmasports.es.

A obra de teatro As Gardiás dará o sinal de partida á programación do Ames Cultural para este primeiro semestre do ano 2026. A Casa da Cultura de Bertamiráns acollerá este espectáculo de 90 minutos sobre o dereito a decidir como xestionar a propia vellez o próximo venres 23 de xaneiro ás 20.30 horas. Esta representación forma parte do convenio de colaboración entre a Axencia Galega das industrias Culturais (AGADIC) e o Concello de Ames. As entradas xa se poden adquirir na Billeteira electrónica do Concello de Ames.

O Concello de Ames recibiu a resolución da Dirección Xeral de Familia, Infancia e Dinamización Demográfica da Xunta de Galicia, na que se lle concede unha axuda de 214.348,79 euros, para o funcionamento e gratuidade da atención educativa das escolas infantís municipais de O Bosque e A Madalena durante o curso 2025-2026. Deste xeito, a axuda concederase en dúas liñas: 84.000 euros para gastos de mantemento das escolas infantís, e 130.348,79 euros para a gratuidade da educación infantil nas escolas municipais.

Dende este venres, 16 de xaneiro, e ata o venres 30 de xaneiro, estará aberto o prazo para inscribirse no servizo de conciliación Primavera Lúdica, que se desenvolverá os días 30 e 31 de marzo e 1 e 6 de abril de 2026. No programa poderán participar familias empadroadas no Concello de Ames, con nenos e nenas escolarizados no segundo ciclo de educación infantil ou de primaria no curso 2025-2026, e que acrediten a necesidade de conciliar a vida laboral coa familiar. A Primavera Lúdica ten un horario de 7:30 a 16:00 horas, e inclúe os servizos de comedor e Bos Días. As familias interesadas deberán entregar a documentación necesaria na Sede electrónica do Concello de Ames, ou nas oficinas de asistencia en materia de rexistro do Concello de Ames (O Milladoiro e Bertamiráns).