O programa Apego continúa coa súa programación para as crianzas nestes meses de outono. Desta volta foi coas Brincadeiras Miúdas, unha proposta que xa é todo un clásico para as familias de Ames. Esta actividades enmárcase no programa Apego que está pensado para favorecer a transmisión da lingua e para achegarlles recursos ás familias para unha crianza en galego, positiva e creativa.

As familias amesás puideron pasar unha tarde chea de música, xogos e divertimento dinamizada e dirixida por Cé Orquestra Pantasma, un músico e mestre xogueteiro especializado en animación infantil, no fomento do xogo libre e en achegar as crianzas á natureza con diferentes propostas lúdicas e musicais. Esta actividade tivo como obxectivos fomentar a creatividade e a autonomía das crianzas e demostrar que a natureza pode ser a mellor e máis divertida feira xogueteira.

Nesta ocasión, as Brincadeiras Miúdas celebráronse o martes 30 de setembro na Carballeira de Ventín, detrás do colexio de Ventín. As brincadeiras comezaron cun concerto participativo de Cé Orquestra Pantasma e continuaron con xogos tradicionais, xogo libre e desestruturado e un espazo para a creación libre de xoguetes con materiais naturais. O obxectivo desta xornada foi compartir tempo de lecer e diversión en galego e fomentar o xogo sen instrucións nin sobreestímulos. As crianzas xogaron libremente e ao seu ritmo, adaptándose ás súas propias necesidades e guiándose pola súa propia imaxinación.

O programa Apego, un vehículo de transmisión da lingua
O programa Apego é un proxecto de dinamización lingüística dirixido ás familias que estean a esperar un bebé ou que teñan crianzas entre 0 e 6 anos. O seu obxectivo é promover, apoiar e normalizar o uso do galego na socialización da primeira infancia, achegando recursos e unha ampla proposta de actividades lúdicas e educativas.

As persoas interesadas en sumarse á iniciativa poden facelo poñéndose en contacto co Servizo de Normalización Lingüística do Concello de Ames, escribindo un correo a normalizacion@concellodeames.gal ou chamando ao número de teléfono 662 377 215. Así mesmo, tamén poden facelo cubrindo o formulario “Súmate ao apego”, que está dispoñible na páxina web do programa, apego.gal.

Novas relacionadas: 

El Correo Gallego: "El impulso al gallego con Apego y las artes escénicas llegan al rural maiano"

Diario de Santiago: "Máis de 200 persoas xúntanse na Carballeira de Ventín para participar nas “Brincadeiras miúdas” do programa Apego"

Diario de Compostela: "Máis de 200 persoas participaron nas 'Brincadeiras Miúdas' en Ames"