O departamento de Normalización Lingüística de Ames, dentro do programa Apego, prepara para o mes de xuño unha nova actividade. Despois de varios aprazamentos por mor da chuvia, o vindeiro 22 de xuño retómase a excursión ao Pazo de Arxeriz, no Cabo do Mundo, e a Carballolandia, un ecoparque situado no concello de Chantada, na Ribeira Sacra, á beira do río Miño. Ofrecerase servizo de autobús con saída ás 9:30 e regreso ás 21:00 horas ao Pazo da Peregrina de Bertamiráns. As inscricións para participar na actividade, que está dirixida ao público familiar, son de balde. Hai prazas limitadas, polo que é preciso inscribirse. O prazo está aberto dende hoxe ata o vindeiro xoves, 20 de xuño, e para anotarse só hai que enviar un correo ao enderezo electrónico normalizacion@concellodeames.gal, no que se indique nome e apelidos das persoas asistentes, teléfono de contacto e idade das crianzas.

O próximo martes, 20 de abril, impartirase unha nova actividade do programa Apego de Ames. Cantar, Contar e xogar é un obradoiro para familias con crianzas de 0 a 6 anos, con música en directo, e no que ademais de pasalo xenial daranse a coñecer unha chea de recursos educativos e de lecer que enriquecerán e alegrarán a crianza. Será na Casa da Cultura do Milladoiro, ás 18.00 horas. Para participar é imprescindible inscribirse previamente a través do enderezo de correo electrónico normalizacion@concellodeames.gal, indicando o nome e apelidos das persoas participantes, a idade das crianzas e un teléfono de contacto.

Dende hoxe martes 1 ata o xoves 10 de marzo as persoas interesadas poden inscribirse na actividade “En galego, co teu acento!”, que busca aproximar a veciñanza á lingua e á cultura galegas, así como favorecer a cohesión social e a integración das persoas procedentes de fóra de Galicia. Bertamiráns e O Milladoiro acollerán cadanseu obradoiro dun mes de duración, con 15 sesións de dúas horas nas mañás dos luns, mércores e venres. As inscricións, de balde, poden realizarse presencialmente acudindo ao Servizo de Normalización Lingüística, situado no Pazo da Peregrina de Bertamiráns, ou á oficina do Servizo de Atención ás Persoas Migrantes (SAMI), situada na rúa de Abaixo, número 10, do Milladoiro. Tamén poderá formalizarse a inscrición chamando por teléfono ao número 662 377 215.

O auditorio da Casa da Cultura do Milladoiro acolleu este xoves pola tarde a Gala de entrega da sétima edición dos Premios Lingua e Empresa organizada polas Concellarías de Normalización Lingüística e de Promoción Económica. As empresas galardoadas foron Lago Louro Avogados, na categoría A de uso consolidado da lingua galega, e Tecidos Tolemia, na categoría B de nova incorporación á lingua, ambas situadas na localidade de Bertamiráns. Os dous representantes das empresas gañadoras recibiron unha figura conmemorativa e un diploma, que se engaden á dotación de 1500 euros e á campaña de difusión en Ames Radio.