Actualidade

Ex., 21-01-2022
Ex., 21-01-2022
Mércores, 29 de decembro de 2021
PixelinPhoto e Autonomogal reciben os galardóns da cuarta edición do Premio Lingua e Empresa

A sala de xuntanzas da Casa do Concello, en Bertamiráns, acolleu este martes 28 de decembro a entrega de galardóns ás dúas empresas gañadoras do Premio Lingua e Empresa. O xurado da cuarta edición do certame elixiu por unanimidade a PixelinPhoto e Autonomogal Asesores de entre as oito propostas que se presentaron aos premios. Os dous representantes das empresas gañadoras recibiron un trofeo e un diploma, que se engade á dotación de 1500 euros e á campaña de difusión en Ames Radio cos que se premiaba a cada categoría.

Venres, 24 de decembro de 2021
O Apalpador bota raíces entre a cativada amesá

Unhas catrocentas persoas, repartidas en catro sesións dunha hora, recibiron ao Apalpador o venres pasado no patio do Pazo da Peregrina, en Bertamiráns. A figura tradicional do Nadal galego, interpretada por Anxo Moure, agasallou á cativada con contos, cantos e cunha amizade de por vida: as nenas e nenos que visitaron ao Apalpador levaron consigo unhas pequenas árbores traídas da Serra do Courel, que deberán coidar falándolles e plantándoas nun bo lugar, para botar raíces fortes e medrar xuntos e xuntas.

Venres, 17 de decembro de 2021
Galetiktokers 2021

“Redescubre a música galega”, “Minuto Breogán”, “A xente e os seus vicios” e “E inglés, si?” foron os vídeos gañadores do certame Galetiktokers 2021. Os premiados déronse a coñecer onte, 16 de decembro, no transcurso dunha gala que contou coa presenza das persoas participantes, dos membros do xurado e de Fátima Pego que actuou como presentadora e, acompañada do DJ Son1c, como cantante. Asistiron tamén o alcalde de Ames, Blas García, e a concelleira de Mocidade e Normalización Lingüística, Escarlata Pampín. Tanto nas súas intervencións como na do resto dos convidados/as púxose de manifesto a necesidade de inzar as redes de contidos en galego como xeito de valorizar e de perpetuar a lingua ao tempo que aproveitamos as vantaxes dunha marca de noso que nos fai únicos e diferentes. Os departamentos de Mocidade e de Normalización Lingüística de Ames botaron a andar o certame de Galetiktokers o ano pasado para a cidadanía de Ames. Nesta segunda edición abriuse o concurso a quen quixera participar, o que provocou que se recibisen propostas procedentes de outros moitos concellos galegos.

Luns, 13 de decembro de 2021
“Música Miúda” para a cativada no Apego de Ames

Xa é posible inscribirse na nova actividade do programa Apego de Ames, "Música Miúda: en concerto!", un espectáculo musical en directo para toda a familia no que van da man a lingua, a igualdade, a diversidade e a inclusión. O concerto, con aforo limitado, terá lugar na Casa da Cultura de Bertamiráns o mércores 22 de decembro ás 18:00 horas. As persoas interesadas en asistir poden anotarse ata o 21 de decembro, enviando un correo ao enderezo electrónico normalizacion@concellodeames.gal, no que indiquen nome e apelidos das persoas asistentes, teléfono de contacto e idade das crianzas.

Xoves, 09 de decembro de 2021
O Apalpador visita Ames da man do programa Apego

O señor Apalpador chegará o vindeiro venres 17 de decembro, ás 17:00 horas, ao patio do Pazo da Peregrina de Bertamiráns, cargado de contos e cantos e cun agasallo máxico nacido na Serra do Courel para toda a rapazada que o veña ver. As persoas interesadas en asistir ao encontro do narrador Anxo Moure poden anotarse enviando un correo ao enderezo electrónico normalizacion@concellodeames.gal, no que indiquen nome e apelidos, idade das crianzas e un teléfono de contacto. Habilitaranse as sesións necesarias para que todas as nenas e nenos que queiran asistir poidan participar nesta actividade programada polo Apego de Ames.

Sábado, 04 de decembro de 2021
Cartaz do premio Lingua e Empresa 2021

O xurado do IV premio Lingua e Empresa decidiu por unanimidade outorgar o premio a PixelinPhoto, polo seu labor decidido e comprometido a prol da normalización lingüística no eido do comercio, e a Autonomogal Asesores, por incorporar a lingua á súa actividade de maneira regular, coherente e implicada, apostando claramente polo galego tanto na comunicación comercial coma no desenvolvemento dos servizos que ofrece. En total presentáronse 8 empresas; 5 empresas na categoría A de uso consolidado da lingua, e 3 empresas na categoría B, de nova incorporación ou creación. O premio Lingua e Empresa ten unha dotación económica de 3000 euros.

Xoves, 02 de decembro de 2021
O Apego de Ames segue con música e humor para a cativada, coa actuación de Pakolas no Milladoiro

Dende hoxe está aberto o prazo para inscribirse en “Ramona Órbita”, un espectáculo musical do autor e compositor Paco Cerdeira, Pakolas. O programa Apego de Ames presenta unha proposta chea de humor, aventuras e viaxes no tempo a través da música. O concerto será na Casa da Cultura do Milladoiro o venres 10 de decembro, ás 18:00 horas. As persoas interesadas en asistir poden anotarse enviando un correo ao enderezo electrónico normalizacion@concellodeames.gal, no que indiquen nome e apelidos, teléfono de contacto e idade das crianzas que as acompañen.

Luns, 29 de novembro de 2021
A quinta edición dos Premios Youtubeiras xa ten gañadoras e gañadores

Olaxonmario, O Son das Ideas, Neeumatiko, Pablo Rodríguez Vila, Toxío, AstroXabi, Cousas RarismASMR, Cousxs, Xacobo de Toro, Recuncho Gamer e Orgullo Galego levan os galardóns deste 2021. Youtubeiras é unha iniciativa organizada polos servizos de Normalización Lingüística dos concellos da Baña, Ames, O Grove, Moaña, Negreira, Pontevedra, Ribadeo, Rianxo, Santiago de Compostela e Teo, das universidades da Coruña, Santiago e Vigo e da Deputación da Coruña.

Xoves, 25 de novembro de 2021
Os V Premios Youtubeiras darán a coñecer mañá en Bertamiráns o palmarés deste 2021 nunha gala presentada por Tanxugueiras

Youtubeiras é unha iniciativa organizada polos servizos de normalización lingüística dos concellos da Baña, Ames, O Grove, Moaña, Negreira, Pontevedra, Ribadeo, Rianxo, Santiago de Compostela e Teo, das universidades da Coruña, Santiago e Vigo e da Deputación da Coruña. Olaxonmario e Neeumatiko aspiran a facerse cos premios en cinco categorías, Cousxs opta a catro galardóns e O Son das Ideas compite por tres.

Mércores, 24 de novembro de 2021
O Club de debate pon en marcha a súa X edición

O 14 de decembro remata o prazo para que os centros educativos inscriban os seus equipos na X edición do Club de Debate. O Club de Debate é unha actividade de dinamización lingüística dirixida a mozas e mozos de 3º e 4º da ESO, 1º de Bacharelato e de ciclos formativos. Os equipos que se inscriban teñen que ser mixtos e estar formados por entre 4 e 10 persoas. Haberá premios para os equipos gañadores das fases de zona e un premio final dunha viaxe multiaventura.