Pestanas principais

Departamento de Normalización Lingüística

    • Enderezo: Pazo da Peregrina. Avenida de Azcárraga, nº 5, Bertamiráns. 15220 Ames.
    • Teléfono:  662 37 72 15
    • Horario de atención ao público: de 9:00 - 14:00 h
    • Responsable municipal: Concellaría de Normalización Lingüística
    • Responsable técnico: Rosa Moreiras Cuñarro, técnica de normalización lingüística
    • Obxectivo principal do servizo:
      • Incrementar o uso e o prestixio da lingua galega en todos os ámbitos municipais
Outros Datos: 
  • Funcións:
    • Asesorar e colaborar coa planificación lingüística do Concello de Ames
    • Promover actuacións para aumentar o uso do galego no ámbito municipal, de acordo coa normativa vixente, e entre a veciñanza
    • Contribuír á formación lingüística da veciñanza e do persoal municipal
    • Mellorar a calidade lingüística e comunicativa do Concello de Ames
    • Informar e asesorar sobre dereitos lingüísticos da veciñanza e deberes lingüísticos municipais
    • Asesorar sobre cuestións lingüísticas á veciñanza e ao persoal municipal

Novas do departamento

Orballo, aperta, bolboreta, tartaruga, folerpa, ovo e agarimo son algunhas das verbas galegas que salientan como “preferidas” as mulleres que este ano participaron no Obradoiro de Acollemento Lingüístico “En galego co teu acento”. O obradoiro, organizado pola concellaría de Normalización Lingüística en colaboración coa Oficina de Atención ao Migrante, vén de ser clausurado coa presenza das concelleiras de Normalización e Igualdade. Este ano participaron 15 mulleres de 6 nacionalidades.

A cuarta edición dos Premios Youtubeir@s, organizados polos servizos de normalización lingüística de dez concellos, das tres universidades e da Deputación da Coruña, recibiron xa dende que se abriu o prazo de inscrición o pasado maio un total de 300 vídeos e 50 canles que competirán nas doce categorías nas que se dividen os galardóns. Así, a participación  superou xa as cifras rexistradas na edición de 2019, ano no que concorreron ao certame 240 vídeos e 31 canles. Dende a organización dos Premios Youtubeir@s, agárdase que estes números aumenten nas últimas semanas de prazo, tendencia que se vén repetindo dende a posta en marcha desta iniciativa. O prazo de inscrición finalizará o vindeiro  23 de outubro de 2020 ás 23.59 h.

O Proxecto Youtubeir@s está organizado polos servizos de normalización lingüística dos concellos de Ames, A Baña, Carballo, Cedeira, A Coruña, O Grove, Moaña, Ourense, Ribadeo, Pontevedra, Rianxo, Santiago e Teo, das universidades da Coruña, Santiago e Vigo e da Deputación da Coruña. Este programa ten o obxectivo de fomentar a creación de contidos na Rede na nosa lingua.  Youtubeir@s encara neste outono o treito final desta terceira edición. Así, até o vindeiro 27 de setembro permanecerá aberto o prazo de inscrición para que todas as persoas creadoras de contidos en Youtube na nosa lingua poidan competir nos Premios Youtubeir@s, que neste 2019 repartirán  6.500 euros nas diferentes categorías en que se divide o certame.

A través do programa Apego, Cé Orquestra Pantasma volve a Ames coas xornadas “Brincadeiras Miudiñas”, nas que un inquedo xogueteiro irá guiando aos nenos e nenas no mundo dos xogos e os xoguetes miudiños a través de rimas, música, baile e manualidades. Así, o xogueteiro estará os días 28 de agosto e 4 de setembro no Milladoiro e os días 29 de agosto e 5 de setembro en Bertamiráns, en horario de 18.00 a 20.00 horas. Este é o segundo ano consecutivo que se realiza esta actividade durante a época estival no concello de Ames.

Contos, música, teatro, xogos, encontros científicos e festivais de cine e de maxia, 15 actividades compoñen a programación infantil con Apego para o último cuadrimestre do ano 2021 que prepararon as concellarías de Cultura e Normalización Lingüística. A primeira delas son as Brincadeiras Miúdas, que terán lugar o 1 e o 2 de setembro. Trátase de dúas xornadas de xogos, baile e cantos ao aire libre. Esta programación pechará o 17 de decembro coa visita do Apalpador no patio do Pazo da Peregrina. Podes consultar o programa completo premendo nesta ligazón.

O Pazo da Peregrina acolle dende onte e até o día 21 de maio o Obradoiro de Acollemento Lingüístico "En galego co teu acento" que, organizado pola Concellaría de Normalización en colaboración co Servizo de Atención a Migrantes, achega a nosa lingua e a nosa cultura á veciñanza procedente de outros lugares e países. A presentación do curso acudiron a concelleira de Normalización Lingüística, Escarlata Pampín, a de Benestar Social, Luísa Feijóo, a técnica de Normalización, Rosa Moreiras, e Antía Rei que se encargará de impartir as clases.

Dende o pasado 1 de outubro un grupo de 20 persoas está a participar no obradoiro de lingua e cultura “En galego, co teu acento!” que se desenvolve no Pazo da Peregrina, en Bertamiráns. Trátase dunha actividade gratuíta de 30 horas de duración que se imparte de luns a venres. A través desta actividade, dirixida a persoas de fóra de Galicia, preténdese que os/as participantes adquiran nocións básicas de lingua e cultura galegas para contribuír á súa integración. Este mesmo obradoiro vaise a realizar na Casa da Cultura do Milladoiro durante o mes de novembro. Se queres participar neste obradoiro aínda quedan algunhas prazas dispoñibles.

O pasado 28 de maio rematou o prazo de inscricións para o certame Enreguéifate. De 42 vídeos presentados, 4 deles chegaban dende Ames. Chegaban tamén dende Baio, Cambre, Caldas de Reis, Santiago, Vigo, Mondoñedo, Rianxo, Pontevedra, Moaña, Malpica de Bergantiños, Ponteareas e Tordoia. Todas as regueifas está dispoñibles na súa páxina web e na canle de Youtube. Os vídeos premiados desta edición anunciaranse antes do 22 de xuño a través das redes sociais do Enreguéifate.

O Concello de Ames e a Secretaria Xeral de Política Lingüística organizan unhas xornadas de toponimia dirixidas ao profesorado dos centros de ensino do Concello de Ames. Trátase dunha iniciativa que busca o achegamento, a posta en valor e o aproveitamento dos nomes de lugar como recurso educativo e ferramenta de dinamización lingüística. Desenvolveranse no Pazo da Peregrina, en Bertamiráns, os días 18, 19 e 30 de setembro, en horario de 16.30 a 20.30 horas. Nestas xornadas participarán 50 persoas, na súa maioría docentes. Inicialmente ofertábanse 40 prazas pero, dada a demanda existente, decidiuse incrementalas ata 50 para darlle cabida a todas as persoas interesadas.

Patrocinado pola Deputación da Coruña e posto en marcha por Xandobela, o certame “Xoga en galego” está dirixido ao público infantil e familiar e pretende enriquecer o patrimonio de xogos en galego con novas creacións que xurdan da imaxinación e da creatividade da rapazada galega. O certame ponse en marcha coa idea de ampliar a oferta de recursos lúdicos en galego e de sumar aos xogos tradicionais do país, herdados dos nosos antergos, alternativas novas e acaídas aos tempos e aos gustos actuais. A Concellaría de Normalización Lingüística anima as familias amesás a participar.

Eventos del departamento

O Concello de Ames conmemora dende este martes 24 de maio o vixésimo aniversario da estrea en galego da película de animación “O bosque animado”, a primeira longametraxe de animación integramente en 3D producida fóra dos Estados Unidos, e realizada pola produtora coruñesa Dygra Films. Neste senso, o martes celebrarase na Casa da Cultura do Milladoiro un coloquio sobre a creación de películas de animación para o alumnado da ESO dos IES de Ames; proxectarase o filme de balde, ás 18:00 horas, e inaugurarase unha exposición interactiva ás 20:00 horas, que permanecerá no centro sociocultural ata o 6 de xuño.

O Concello de Ames conmemora este 23 de febreiro o aniversario da poetisa Rosalía de Castro, cun acto de homenaxe e a inauguración do mural “As Rosalías”, un novo traballo de Yoseba Muruzábal. Será ás 18:00 horas, na Casa da Cultura do Milladoiro. Alí o alumnado do IES do Milladoiro lerá un manifesto, así como varios versos e textos da figura homenaxeada, acompañados de membros da Corporación municipal e da actriz Patricia de Lorenzo. Trátase dun acto aberto a toda a veciñanza.

“Amor, que corte!” é un espectáculo para crianzas a partir de 2 anos, que une contos e música para facernos reflexionar sobre que é o amor e para que aprendamos a relacionarnos dun xeito respectuoso e gozoso, entendendo o que nos une e o que nos diferencia. A proposta da narradora Iseo A Moura terá lugar o venres 22 de abril na Casa da Cultura de Bertamiráns, ás 18:00 horas. As inscricións para esta actividade de balde do programa Apego poderán realizarse do 13 ao 21 de abril, enviando un correo ao enderezo normalizacion@concellodeames.gal.

"Brincadeiras da lingua", de Migallas Teatro, é un espectáculo para nenas e nenos dos 0 aos 6 anos, con música en directo, contos e monicreques para que aprendan sobre a literatura popular infantil galega. A proposta, parte da programación infantil con Apego, chegará á Casa da Cultura do Milladoiro o venres 11 de marzo, ás 18:00 horas. As inscricións, de balde, poderán realizarse do 3 ao 10 de marzo, enviando un correo ao enderezo normalizacion@concellodeames.gal.

Peter Punk e Brais das Hortas pechan o abril do Apego de Ames cun concerto punk infantil, no que dous cantantes de xéneros tan aparentemente distantes como a música infantil e o punk comparten escenario e crean un espectáculo musical e de clown divertido e participativo. Será o xoves 28 de abril na Casa da Cultura do Milladoiro, ás 18:00 horas. As inscricións para o concerto, de balde e dirixido ao público infantil e familiar, poderán realizarse do 20 ao 27 de abril, enviando un correo ao enderezo normalizacion@concellodeames.gal.

A primeira actividade do ano do programa Apego de Ames terá lugar este sábado 5 de febreiro, na Casa da Cultura de Bertamiráns, ás 18:00 horas. Dirixido ao público infantil e familiar, “Consertasso na horta” é un espectáculo musical cheo de humor, que combina xéneros de todo tipo (trap, punk, reggae, ska...) con produtos da horta, como froitas e verduras. Brais da Horta promete risas, emocións e alegría mesturando estilos musicais. As inscricións, de balde, poden realizarse ata o xoves 3 de febreiro, enviando un correo ao enderezo electrónico normalizacion@concellodeames.gal.

Xa está aberto o prazo para inscribirse en “Fíos do querer”, unha nova proposta do Apego de Ames para familias con nenas e nenos dos 0 aos 4 anos. Cé Orquestra Pantasma presenta un espectáculo musical participativo, tecido con agullas de amor, lingua, aloumiños e das primeiras experiencias compartidas. Será o próximo venres 18, con dúas sesións ás 17:00 e ás 18:00 horas, no Pazo da Peregrina de Bertamiráns. As persoas interesadas en asistir poden anotarse dende o 10 ata o 17 de febreiro, enviando un correo ao enderezo electrónico normalizacion@concellodeames.gal, no que indiquen nome e apelidos das asistentes, teléfono de contacto e idade das crianzas.

“Galego, vida e ciencia” é o titulo deste encontro no que Ángel Carracedo (catedrático en Medicina Legal, experto en Xenética e divulgador científico) falará entre outras cousas do papel da lingua na vida e na ciencia. Será ás 20:00 horas, na Casa da Cultura de Bertamiráns, nun novo encontro coas familias do programa Apego.

A actividade está dirixida a público familiar e é de balde.

Precísase inscrición previa, do 3 ao 10 de novembro, enviando un correo a normalizacion@concellodeames.gal.

"Lixo" é un espectáculo para crianzas a partir de 2 anos da compañía O Baúl da Tía Lola, no que dúas bailadeiras mergulladas nun mar de lixo descubrirannos xogos e mundos extraordinarios nos que se crea cultura a partir da varredura. Un xeito divertido de ver os problemas que pode ocasionar o uso excesivo do plástico. Será o venres 3 de xuño na Casa da Cultura do Milladoiro, ás 18:00 horas. As inscricións para esta actividade de balde do programa Apego poderán realizarse do 25 de maio ao 2 de xuño, enviando un correo ao enderezo normalizacion@concellodeames.gal.

O Departamento de Normalización Lingüística organiza unha sesión de contos con Celso Sanmartín centrada no medo, e precisamente, en perderlle medo ao medo, dentro do programa Apego de Ames. Será na Casa da Cultura de Bertamiráns ás 18.00 horas, para público familiar. A asistencia é de balde, mais cómpre realizar unha inscrición previa, dispoñible dende o 28 de outubro ata o 4 de novembro, enviando un correo electrónico ao enderezo normalizacion@concellodeames.gal, indicando nome e apelidos das persoas asistentes, a idade das crianzas e teléfono de contacto.