O Concello de Ames, a través da Concellaría de Benestar Social, informa de que este luns, 21 de outubro, saíu publicada, no Boletín Oficial da Provincia (BOP), a convocatoria de axudas destinadas ao apoio económico das familias numerosas do municipio. A contía total destinada a estas axudas é de 120.000 euros, sendo de 1.200€ o máximo do importe individual concedido a cada unidade familiar. Con esta iniciativa, o goberno municipal pretende axudar a aquelas familias que máis dificultades económicas teñan para a crianza das súas fillas e fillos. As persoas interesadas poderán presentar as solicitudes no Rexistro Xeral, de xeito presencial, ou a través da Sede electrónica, no prazo dun mes. O prazo para presentar as solicitudes remata o xoves 21 de novembro de 2019. Para obter máis información pódese chamar aos números de teléfono 981 535 941 e 981 890 964.

O Concello de Ames, a través da Concellaría de Benestar Social, informa de que este xoves, 20 de xullo, saíu publicada, no Boletín Oficial da Provincia (BOP), a convocatoria de axudas destinadas ao apoio económico das familias numerosas do municipio. A contía total destinada a estas axudas é de 100.000 euros, sendo de 1.200 euros o máximo do importe individual concedido a cada unidade de convivencia. Con esta iniciativa, o goberno municipal pretende axudar a aquelas familias que máis dificultades económicas teñan para a crianza das súas fillas e fillos. As persoas interesadas poderán presentar as solicitudes no Rexistro telemático a través da sede electrónica do Concello de Ames ou de xeito presencial nas oficinas de asistencia en materia de rexistro situadas na Casa do Concello e na oficina municipal do Milladoiro. O prazo para presentar as solicitudes vai do 21 de xullo ao 20 de agosto de 2023. Premendo nesta ligazón podes obter máis información sobre esta convocatoria.

Por mor da previsión meteorolóxica, a carreira de obstáculos “Moitos camiños, mesma meta”, inicialmente prevista para este sábado, día 11, celebrarase finalmente o vindeiro venres 17 de marzo, ás 17:30 horas, no parque verde central do Milladoiro (parque das piscinas). Os dorsais poderán recollerse a partir das 17:00 horas. Co cambio de data tamén se amplía o prazo para anotarse (ata o vindeiro xoves 16, ás 23:59 horas). A inscrición, de balde, pode realizarse en liña premendo nesta ligazón, ou ben de forma presencial, nas oficinas dos Servizos Sociais do Concello, sitas no Milladoiro (rúa de Abaixo, número 10) e en Bertamiráns (praza de Chavián, s/n). A proba forma parte da programación da Concellería de Igualdade polo 8M.

Co gallo do Día Mundial das persoas con (dis)capacidade, a concellaría de Benestar Social e Igualdade, acompañada dos concelleiros/as Escarlata Pampín do BNG, Quique Costas, de Ames Novo e Xosé Ramón Oulego, de Ciudadanos, almorzou cos rapaces e rapazas da Asociación Arcea Adames e as súa monitoras Mónica e Cristina. A concellaría obsequiou a cada un dos participantes cunha cesta saudable de froitas variadas. Ademais, o departamento de Benestar convida á veciñanza de Ames a sumarse á campaña "Baixo o mesmo paraugas" que organizan 90 entidades sociais galegas e que propón subir ás redes sociais fotos con paraugas abertos como símbolo de reivindicación por unha sociedade máis xusta e igualitaria para todas as persoas. A cativada da Escola Infantil de A Madalena xa se uniu á iniciativa.