Sergio Martínez Calvo, veciño de Vilagarcía de Arousa, é o gañador da terceira edición do concurso fotográfico LGTBIQ+, que se enmarca na campaña “Ames a quen ames faino con orgullo”. Nesta edición do concurso participaron 4 persoas. O obxectivo do certame, que organizou a Concellaría de Benestar Social e Igualdade, é a loita contra a discriminación e promover a igualdade e a diversidades con respecto á comunidade LGTBIQ+. O premio do concurso será entregado este venres 26 de xuño, ás 21.00 horas, durante o acto de conmemoración do Día Internacional do Orgullo LGTBIQ+, que se vai celebrar na explanada do pavillón de Bertamiráns. Tamén haberá actividades durante a tarde do sábado no Paseo da Igualdade, no Milladoiro.

O CEIP Agro do Muíño desenvolveu o proxecto de mediación artística e creación mural contextual “Paredes que escoitan, paredes que falan”, impulsado polo Concello de Ames, a través da Concellería de Igualdade, e dirixido por 7H Cooperativa Cultural en colaboración coa artista urbana Nana. Esta iniciativa foise construíndo entre os meses de febreiro e xuño, coa vontade de crear referentes femininas vencelladas á historia local. A idea é realizar novos proxectos coma este noutros centros educativos do concello. 

O Banco Municipal de Reciclaxe Electrónica do Milladoiro imparte o sábado, 6 de xuño, un taller de posta a punto, reciclaxe e instalación do teu computador. Nesta actividade  explicarase o funcionamento dun computador e axudaráselle aos usuarios/as a instalarlle un sistema operativo libre se o necesita. O obradoiro impartirase no antigo centro de saúde do Milladoiro, na rúa Agro do Medio, número 8, de 11:30 a 13:00 horas. A inscrición pódese realizar premendo nesta ligazón.

O alcalde de Ames, Blas García, e a concelleira de Benestar Social, Uxía García, reuníronse na mañá de hoxe con representantes de AGAMUDI (Asociación Galega de Mundos Diversos), unha asociación de familias con fillos e fillas con discapacidade intelectual e do desenvolvemento que buscan un lugar onde socializar, aprender e desenvolver a súa autonomía de maneira segura. Nesa comitiva estiveron presentes a súa presidenta, Katya Rodríguez, o seu tesoureiro, Anxo Rodríguez, e unha das traballadoras do proxecto EVA, Cristina Sánchez.