O Concello de Ames, a través da Concellaría de Benestar Social, informa de que o venres, 14 de agosto, saíu publicada no Boletín Oficial da Provincia (BOP) a convocatoria de axudas destinadas ao apoio económico das familias numerosas do municipio. A contía total destinada a estas axudas é de 100.000 euros. Nesta convocatoria, o importe para as familias monoparentais ascende a 1.500 euros por unidade de convivencia. As persoas interesadas poderán presentar as solicitudes no Rexistro telemático a través da Sede electrónica do Concello de Ames ou de xeito presencial nas oficinas de asistencia en materia de rexistro situadas na Casa do Concello e na oficina municipal do Milladoiro. O prazo para presentar as solicitudes vai do 15 de agosto ata o 14 de setembro de 2026.

O parque do Ameneiral, en Bertamiráns, acolleu o sábado, 11 de xullo, un novo Encontro Intercultural. A xornada incluíu a degustación de diversos pratos típicos de Venezuela, Perú, Guatemala e Costa de Marfil. Os asistentes puideron degustar 10 receitas de pratos, sobremesas e bebidas. Ademais, houbo música a cargo da instrumentista, compositora, mestra e veciña de Ames, Anne Tooming. A xornada estivo organizada polo Concello de Ames e contou coa colaboración da Asociación Sociocultural de Venezolanos en Santiago de Compostela (AVESANTI).

O Concello de Ames colabora coa Federación Venezolana de Galicia na campaña de recollida de axuda humanitaria para as zonas afectadas polos terremotos que se produciron en Venezuela. O material poderase depositar nas sedes das asociacións que forman parte de FEVEGA. O material que máis se necesita son analxésicos, antialérxicos, antibióticos sistémicos, medicamentos para asma, urxencias respiratorias e enfermidades cardiovasculares, produtos de oftalmoloxía, pediatría e subministros médicos. No concello de Ames poderase depositar o material en diferentes lugares de Bertamiráns e do Milladoiro.

Sergio Martínez Calvo, veciño de Vilagarcía de Arousa, é o gañador da terceira edición do concurso fotográfico LGTBIQ+, que se enmarca na campaña “Ames a quen ames faino con orgullo”. Nesta edición do concurso participaron 4 persoas. O obxectivo do certame, que organizou a Concellaría de Benestar Social e Igualdade, é a loita contra a discriminación e promover a igualdade e a diversidades con respecto á comunidade LGTBIQ+. O premio do concurso será entregado este venres 26 de xuño, ás 21.00 horas, durante o acto de conmemoración do Día Internacional do Orgullo LGTBIQ+, que se vai celebrar na explanada do pavillón de Bertamiráns. Tamén haberá actividades durante a tarde do sábado no Paseo da Igualdade, no Milladoiro.