Ao longo de marzo, mes no que se conmemora o Día Internacional da Muller, o Concello de Ames celebrará nove charlas e un taller sobre autocoidados femininos impartidos por expertos en regulación emocional e hábitos saudables. As actividades enmárcanse dentro da programación do Concello de Ames con motivo do 8M. O luns 27 de marzo, ás 17:00 horas, terá lugar o obradoiro de percuterapia impartido por Pedro Campos. Será na Casa dos Maiores de Bertamiráns. A percuterapia é unha arte que mestura diferentes disciplinas e que permite marcar o ritmo do propio corpo a través do movemento e de distintos obxectos, traballando corpo, emocións e memoria.

O venres 17 o auditorio da Casa da Cultura do Milladoiro acollerá a representación de “A señora de Forcadela”, ás 20:30 horas. A obra de teatro narra unha historia baseada na biografía da mestra Josefa García Segret, que foi detida durante o ano 1936 e retida na prisión de Tui. A súa vida foi salvada grazas á intervención dun médico forense e dun doutor que aseguraron que estaba embarazada, e a súa pena de morte foi conmutada por cadea perpetua e, posteriormente, reducida a seis anos. As entradas para o espectáculo xa se poden reservar, de balde, na Billeteira electrónica do Concello. A representación forma parte da programación do 8M do Concello de Ames. 

O auditorio da Casa da Cultura do Milladoiro acolle a representación da obra de teatro SOA o día 19 de novembro, ás 20:30. O espectáculo encádrase dentro da campaña de actividades programadas con motivo do 25N polo Concello de Ames, "Que o meu machismo non se converta no teu problema". A actriz protagonista, Rogelia dos Outeiros, encarna a unha muller maltratada física e psicoloxicamente que, pechada na casa polo seu marido, atopa na súa veciña unha confidente á que contarlle a súa historia, encontrando unha válvula de escape ás súas circunstancias. As entradas son de balde e os convites pódense retirar na billeteira electrónica do Concello de Ames. 

A unidade móbil do programa “Coidados porta a porta” da Xunta de Galicia vai estar no Milladoiro os días 7, 8, 11 e 12 de setembro, co fin de prestar servizos asistenciais para a prevención da dependencia á poboación maior de 55 anos. Desta forma, a veciñanza de Ames poderá gozar de atención especializada en podoloxía, audioloxía e estimulación da memoria.