Solapas principales

Departamento de Promoción Económica y Empleo

Noticias del departamento

Preséntase unha nova edición dos concursos de decoración de Nadal para veciños e comerciantes

O Concello de Ames, a través da Concellaría de Promoción Económica, presentou hoxe o XVIII concurso de escaparates de Nadal e a segunda edición do concurso de decoración de Nadal veciñal. Un ano máis, búscase que tanto comerciantes como veciños colaboren co Concello na decoración do municipio durante as festas de Nadal. Poderanse decorar escaparates comerciais, fachadas, balcóns, fiestras e xardíns de edificios e vivendas particulares. As inscricións para participar en ambos certames xa están abertas. Repartirase un total de 6.000 euros (4.000 euros no concurso de escaparates, e 2.000 no de decoración veciñal), divididos en oito premios (haberá catro premios por concurso).

Preto de 20 empresas amesás, o centro coworking A Proa e mailas tres universidades galegas participan na segunda edición de InnovAmes

O Concello de Ames organiza unha nova edición de InnovAmes, unha xornada de innovación para as empresas de Ames que terá lugar este venres, 16 de decembro, no pavillón polideportivo do Milladoiro e na que se contará coa presenza de grandes referentes da innovación que conviven no propio concello. O obxectivo deste evento é poñer en valor os recursos e a capacidade de innovación local, fomentando a sinerxía e a colaboración entre as empresas e dando a coñecer ao público xeral o capital empresarial de Ames. Durante toda a xornada participará persoal de preto de 20 empresas amesás, rapaces e rapazas dos centros de ensino de Ames, persoal do centro coworking a Proa e representantes das tres universidades galegas. Para dispor de máis información sobre o InnovAmes pódese consultar a páxina web do evento.

Preto de 300 persoas asistiron á final de Canta con Ames

Noelia Bellas, de Bugallido, Lara López, de Negreira, e Carmen Cuevas, do Milladoiro foron as gañadoras do concurso organizado pola Concellaría de Promoción Económica. As gañadoras obtiveron unha cesta de froitas , un trofeo, un vídeo do seu paso polo concurso, un cheque de 100 euros para gastar no comercio local e a posibilidade de cantar nas prebadaladas de fin de ano. Ademais, actuarán xunto coa París de Noia o próximo 3 de setembro. O acto, presentado pola actriz María Mera, rematou cunha actuación de Sofía Rial, veciña de Ortoño e gañadora do Concurso Recantos do Luar.

Preto de 50 persoas participaron na cuarta edición da campaña de promoción do comercio local “Ilumina o teu sorriso”

Esta mañá a sala de xuntanzas da Casa do Concello acolleu o sorteo dos tres premios incluídos na cuarta edición da campaña de promoción do comercio local “Ilumina o teu sorriso”. No sorteo participaron as 44 persoas que enviaron como mínimo dúas fotografías realizadas en dous dos lugares seleccionados polas súas decoracións de Nadal: nas prazas do Concello e da Maía, en Bertamiráns, ou na praza da Madalena e no aparcamento do Supercor, no Milladoiro. As premiadas foron  Ana María Cortizo, do Milladoiro, que recibirá un teléfono móbil Samsung Galaxy A13, e Laura Paz, de Cruxeiras (parroquia de Ames), e Tamara Juncal, de Bertamiráns, que lle tocaron cadanseu vale de 100 euros gastar en comercios amesáns adheridos a XEA.

Primeira sesión dos “Seráns de Ames” neste mes de agosto coa representación de “La coquette” de Kanbahiota

“Seráns de Ames” é unha programación de verán para todos os públicos que volve ao concello por terceiro ano consecutivo, despois de que no ano 2021 se estrease a iniciativa na praia fluvial de Tapia e no 2022 se ampliase á parroquia de Bugallido. Como en anteriores edicións, as doce actividades que conforman o programa desenvólvense todos os xoves dos meses de xullo e agosto.

Prográmanse novas actividades do AmesOn para os días 28, 29 e 30 de agosto

Durante esta fin de semana haberá novas actividade do programa AmesOn. Deste xeito, haberá actuacións musicais no Milladoiro e Bertamiráns do dúo Eva e Camilo, así como de Zeus RB e Diego Barbazán; un espectáculo denominado “Fase festa”, a cargo de Pepe Suevos, Fátima Pego e Josep Ruíz; e maila proxección do filme A Esmorga. O resto de actividades previstas para esta fin de semana quedan aprazadas debido á previsión de choiva. Cómpre salientar que o espectáculo “Fase Festa” e mailo concerto en acústico de Zeus RB+ e Diego Barbazán, previstos inicialmente para as 22.00 horas, realizáranse ás 20.00 horas. O resto de actividades desenvolveranse no horario previsto.

Publicada a convocatoria de axudas do Plan Reactiva Ames por valor de 145.000 €

O Boletín Oficial da Provincia recolle, na súa edición de hoxe, a convocatoria das axudas do Concello de Ames dirixidas á creación e consolidación de empresas para o mantemento do emprego e do tecido empresarial local. As axudas están dirixidas ás persoas físicas e xurídicas que leven a cabo actividades empresariais ou profesionais e teñan o seu domicilio social e fiscal en Ames. O prazo de presentación de solicitudes é de quince días naturais a contar dende mañá 23 de setembro. A contía total destas subvencións ascende a un importe total de 145.000 euros.

Publícase a resolución provisional das axudas do PEL REACTIVA cofinanciado pola Deputación da Coruña

O Concello de Ames, a través da Concellaría de Promoción Económica e Emprego, informa da resolución provisional do PEL REACTIVA que foi publicada este xoves, 25 de marzo, no Boletín Oficial da Provincia. As persoas beneficiarias deben facer a correspondente xustificación das axudas PEL REACTIVA. Estas axudas enmárcanse dentro do Plan Reactiva Ames. Para iso deben achegar a través da Sede electrónica do Concello de Ames a documentación que se require. O Concello de Ames recibiu un total de 434 solicitudes.  Ames destina a esta liña de axudas un total de 582.547,86 euros. O Fondo de Financiamento constitúese cun 80% de achega da Deputación da Coruña e un 20% financiado con fondos propios do Concello. Deste xeito, o Concello de Ames achega 116.509,57 euros e a Deputación da Coruña concede 466.038,29 euros.

Quedan prazas dispoñibles para a recepción dos Reis Magos, os días 4 e 5 de xaneiro

O Concello de Ames recorda que aínda quedan prazas para acudir á recepción ás Súas Maxestades Melchor, Gaspar e Baltasar, este martes 4 e mércores 5 de xaneiro. Os Reis Magos estarán nos pavillóns polideportivos de Bertamiráns e do Milladoiro para que cada nena, neno ou persoa adulta poida visitalos respectando as medidas sanitarias. Para asistir, cada unidade familiar debe solicitar cita previa a través da sede electrónica do Concello. Ademais, os Reis decidiron enviar ás rapazas e rapaces que estean confinados un pequeno agasallo, que poderán solicitar no enderezo promocioneconomica@concellodeames.gal, aportando os seus datos persoais. Os Reis contarán coa colaboración da Protección Civil amesá para levar a cabo esta entrega.

Realízase o sorteo dos vales de Nadal por valor de 850 euros para gastar no comercio local

O Concello de Ames, a través da Concellaría de Promoción Económica, informa sobre o sorteo dos vales de Nadal por valor de 850 euros, que se poderán trocar nos locais asociados á Xuntanza de Empresarios de Ames (XEA). En dito sorteo participaron os nenos e nenas que participaron nos talleres e xogos do mundo incluídos na programación de Nadal do Concello de Ames. Tamén participaron no sorteo aquelas persoas que realizaron compras durante o período de Nadal nos establecementos comerciais asociados a XEA. Chamarase por teléfono a todos/as os/as gañadores/as para entregarlles o premio. Preme nesta ligazón para comprobar a listaxe das persoas gañadoras dos vales de Nadal.

Eventos del departamento

>“Fase Festa”, con Pepo Suevos, no Milladoiro

Música e moito humor. O actor, guionista, humorista e veciño de Ames, Pepo Suevos, a cantante Fátima Pego e o músico Josep Ruíz, compoñentes da orquestra "Panorama", soben xuntos ao escenario para amosarnos “Fase Festa”, unha especie de verbena en pequeno formato, adaptada aos tempos que nos toca vivir.