A Casa da Cultura de Bertamiráns acolle este venres, 22 de maio, dende as 20.00 horas, un concerto de acordeón amenizado polos alumnos e alumnas da escola Alborada. Deste xeito, arredor de 50 acordeonistas de todas as idades procedentes de Meixonfrío, Teo, Ordes, Santa Comba, Cerceda, Val do Dubra e Ames deleitarán ao público con todo o aprendido durante este curso académico, nunha das moitas actuacións que realizan durante todo o ano. A entrada é libre e gratuíta.

A veciñanza de Bugallido e numerosos visitantes déronse cita en Ames para participar nunha completa fin de semana festiva que serviu para exaltar a identidade da parroquia. Tras superar a incerteza meteorolóxica das primeiras horas, as xornadas transcorreron cunha magnífica acollida de público. A proposta cultural e lúdica consolidou a Carballeira e o San Isidro como dúas propostas ideais para o intercambio interxeracional, facilitando a transmisión de valores patrimoniais e lingüísticos no ámbito rural. 

A promoción de 2024 do proxecto Estalmat- Galicia de estímulo do talento matemático pechou o curso o pasado sábado, 16 de maio, na Aula Magna da Facultade de Matemáticas da Universidade de Santiago de Compostela. Asistiron as 8 alumnas e os 19 alumnos de Estalmat-Galicia, que conformaron a décimo sétima promoción, da que tamén formou parte un estudante que cursou o primeiro ano en Estalmat-Murcia. Entre o alumnado hai un mozo de Ames. O Concello de Ames participou neste programa como patrocinador cunha achega económica.

A Xunta de Goberno Local vén de aprobar este venres, 15 de maio, a adxudicación do servizo de recollida de animais domésticos abandonados, lacería e xestión de colonias felinas. Dito contrato foi adxudicado á empresa Centro galego de adopción e recate de animais SL por un importe de 387.200 euros. O contrato terá unha duración de dous anos, podendo prorrogarse anualmente ata un máximo de catro anos (incluído período inicial e prorrogas). Este novo contrato contempla campañas de concienciación nos colexios e institutos de Ames, así como un plan que se irá realizando de xeito progresivo en todo o concello sobre a xestión das colonias felinas.