Durante esta pasada fin de semana algunha persoa incívica ou grupo de persoas lanzaron pedras contra os vidros da pista municipal de pádel do Milladoiro provocando a rotura de ditos cristais. Este acto vandálico púxose en coñecemento da Garda Civil do Milladoiro e vaise presentar a correspondente denuncia. Dende o goberno municipal condenan este acto incívico que suporá un gasto de 1.900 euros de fondos públicos de todos os veciños e veciñas de Ames. Debido a este incidente a pista de pádel estará fóra de servizo ata que se poida arranxar.

O vindeiro luns, 17 de novembro, ás 19.00 horas, o auditorio da Casa da Cultura do Milladoiro acollerá a estrea de “Promover o galego dende o local”, un documental sobre programas de dinamización lingüística. A peza audiovisual, producida por Nós Televisión e financiada polo Concello de Ames, pon en valor as diversas iniciativas que se desenvolven en Ames para impulsar e promover o uso do galego a través de diferentes proxectos como o Galetiktokers, Modo Galego, actívao!, os Premios Lingua e Empresa ou o Certame Literario.

Desde as 11.00 horas de hoxe, 5 de novembro, e ata as 11:00 horas do venres, 7 de novembro, está aberto o prazo para votar a través de Instagram polos vídeos presentados ao concurso Galetiktokers, unha iniciativa dos departamentos de Xuventude e Normalización Lingüística do Concello de Ames, que pretende estimular a creatividade da rapazada animando á creación audiovisual en galego. Nesta sexta edición presentáronse preto de 60 vídeos, realizados por máis de 100 por mozos/as de Ames e doutras localidades de Galicia como Vilagarcía de Arousa, Ferrol, Ourense, etc. Premendo nesta ligazón pódense consultar as bases ao completo do VI Certame Galetiktokers. 

O Concello de Ames, no marco dos premios Lingua e Empresa organiza, por segundo ano consecutivo, unha xornada formativa destinada ás empresas amesás que nesta ocasión ten como obxectivo mellorar a comunicación empresarial para chegar á clientela cunha maior efectividade e impacto. O prazo para inscribirse nesta acción formativa estará aberto ata o xoves 13 de novembro ás 14.00 horas. Premendo nesta ligazón pódese acceder ao formulario de inscrición. O curso impartirase o martes, 18 de novembro, de 19.00 a 21.00 horas, no espazo colaborativo A Proa, no Milladoiro e a docente será Fátima Rodríguez (experta en recursos humanos e consultora de estratexia). Está dirixido a empresas de calquera ámbito que teñan a súa sede ou centro de actividade no Concello de Ames.