O Concello de Ames, Augas de Ames EPEL e El Correo Gallego organizan o vindeiro martes, 10 de novembro, no auditorio da Casa da Cultura do Milladoiro, o foro “A auga en Galicia, da abundancia á escaseza”, no que se abordará a planificación de infraestruturas hídricas, xestión da escaseza e colaboración interadministrativa. O foro estará presentado pola xornalista de El Correo Gallego,  Susana López Carbia; e contará coa participación do alcalde de Ames, Blas García, da subdelegada do Goberno en Galicia, Encarna Rodríguez, e do director de Augas de Galicia, Roi Fernández.

O programa SaúdeAndo 2026-2027 comezará o día 1 de outubro con 33 novas andainas que sairán dos centros de saúde do Milladoiro e Bertamiráns. Estas andainas, organizadas pola Concellaría de Promoción da Saúde, organízanse cada xoves de semanas alternas ao longo de todo o curso, ata o mes de xuño, nas localidades de Bertamiráns e do Milladoiro. Son rutas de dificultade media-baixa e que contan cunha duración aproximada de entre unha hora e hora e media. 

O Concello de Ames, a través da Concellaría de Cultura, programa un novo ciclo de cine durante o mes de novembro no que se proxectarán os filmes San Simón, As liñas descontinuas e Ao son da nova regueifa. Todas elas serán proxectadas no auditorio da Casa da Cultura do Milladoiro os xoves 5, 12 e 20 de novembro, ás 20.00 horas. Este ciclo de cine enmárcase dentro da programación do Ames Cultural para os meses de outubro, novembro e decembro. Ao final das proxeccións haberá un pequeno coloquio sobre os filmes. As entradas teñen un prezo xeral de 3 euros e un prezo reducido de 1,50 euros. Pódense adquirir a través da Billeteira electrónica. Para o documental Ao son da nova regueifa hai que coller convite na Billeteira electrónica

O Concello de Ames vai celebrar os días 14 e 15 de novembro, no campo da festa da parroquia de Trasmonte, a sexta edición da Feira do Monte Tanto Monte. O obxectivo é poñer en valor o monte galego e recuperar os oficios ligados ao monte a través dun escaparate excepcional dos oficios e dos produtos vinculados ao monte. Neste edición increméntase o número de expositores e contarase con 29 postos de diversas localidades de Galicia; 4 faladoiros e obradoiros a cargo de Luís do Río, Jaime Blanco e Nuska Chousa;  6 degustacións gastronómicas; e unha nova iniciativa, o Monte Miúdo, que contará cunha ampla programación de actividades para os nenos e nenas. Premendo nesta ligazón pódese consultar o programa completo da feira.