Tras unha edición de récord, na que foron impartidos máis de cen obradoiros escolares de improvisación oral, o proxecto Enreguéifate convida agora á poboación escolar e á cidadanía de toda Galicia a participar no seu certame de regueifas en vídeo, cuxo prazo de inscrición pecha este mesmo venres 6 de marzo. O certame e mailo proxecto son impulsados polos servizos de normalización lingüística de Ames, Arzúa, Carballo, Pontevedra, Santiago de Compostela e Teo e teñen como obxectivo espertar a curiosidade pola improvisación oral en galego, sobre todo entre a mocidade, contribuíndo no proceso á boa saúde da regueifa, unha parte do noso patrimonio oral que experimentou nos últimos anos un grande crecemento en popularidade.

Hoxe, xoves 27 de xuño, o Pazo da Peregrina acolleu a sesión de clausura do Obradoiro de acollemento lingüístico “En galego, co teu acento”, que se desenvolveu en Bertamiráns do 3 ao 27 de xuño. Dez persoas de nacionalidades e orixes diversas participaron no taller, no que puideron aprender máis sobre a lingua e a cultura galega. O obradoiro, no que colaboran as concellarías de Normalización Lingüística e de Benestar Social, rematou coa entrega duns diplomas e con palabras de agradecemento mutuas e en galego. Xa está aberto o prazo de inscrición para este mesmo obradoiro, pero para a quenda que se vai impartir do 1 ao 24 de outubro na Casa da Cultura do Milladoiro.

A compañía Migallas Teatro pecha o setembro do programa Apego amesán con “Orella pendella”, un obradoiro para familias con música en directo no que aprender ditos infantís, xogos, contos, recitados e cancións de sempre para interactuar coas crianzas, revitalizar o uso da lingua, e estimular a súa capacidade cognitiva e comunicativa. A actividade, dirixida ás nenas e nenos de 0 a 6 anos, terá lugar o venres 30 de setembro na Casa da Cultura do Milladoiro, ás 18:00 horas. Para participar, cómpre inscribirse dende hoxe ata o 29 de setembro, enviando un correo ao enderezo normalizacion@concellodeames.gal, no que se indiquen nome e apelidos das persoas asistentes, teléfono de contacto e idade das crianzas.

O pasado venres, 21 de abril, e este luns, día 24, celebrouse a fase de zona da XI edición do Club de debate Alingua, na que participaron equipos de distintos centros educativos de Galicia. En representación de Ames participaron dous equipos do IES do Milladoiro e un do IES de Ames. Desta fase, que tivo lugar no salón de plenos do Concello de Teo, saíron seis finalistas, que disputarán a final o sábado 3 de xuño na Casa da Cultura de Bertamiráns. Nese senso, cómpre destacar a clasificación dos equipos “Xente que fala” (IES do Milladoiro) e “Ames a palabra” (IES de Ames), que quedaron en primeira e segunda posición, respectivamente, no debate do venres.