Pestanas principais

Departamento de Xuventude

    • Enderezo:
      • Luns, mércores e xoves na Casa do Concello. Praza do Concello, nº2 Bertamiráns. 15220 Ames
      • Martes e venres na Casa da Cultura de Milladoiro. Tavesía do Porto s/n Milladoiro. 15895 Ames
    • Teléfono: 616 08 32 29
    • Horario de atención ao público: 09:00 a 14:00 horas.
    • Responsable municipal:  Concellaría de Mocidade
    • Responsable técnico: Pilar Villaverde Cutrín, técnica de mocidade e información xuvenil.
Outros Datos: 
  • Funcións:
    • Orientar e asesorar á mocidade de Ames,  garantindo que toda a poboación xuvenil do concello teña acceso a unha información ampla, obxectiva e actualizada en relacion aos seus intereses e necesidades.
    • Organizar, xestionar e promover programas e actividades formativas no marco da educación non formal orientadas a facer efectivas a igualdade de oportunidades e o desenvolvemento integral da mocidade a nivel formativo, laboral, familiar, etc.
    • Abordar medidas de cara a mellorar a calidade de vida da poboación xuvenil en diferentes ámbitos como o lecer e tempo libre, saude, educación en valores (igualdade de  oportunidades, interculturalidade,  violencia  de xénero, discapacidade…).
    • Favorecer a participación activa da mocidade na vida social e comunitaria, a través da dinamización de grupos informais e asociacións xuvenis.
    • Dar resposta a cantas dúbidas ou inquedanzas xurdan na mocidade apoiando e dando forma ás súas propostas e iniciativas en calquera ámbito de actuación do seu interese (cultural, formativo, ocio,...).
  • Novas relacionadas
  • Axenda.
  • Normativa
    • Lei 6/2012, de 19 de xuño, de xuventude de Galicia (DOG nº 139 do 20 de xullo de 2012).
    • Lei 39/2015 do procedemento administrativo común das administracións públicas
    • Lei 7/2007 do Estatuto básico do empregado público
    • Lei 2/2015 da función pública de Galicia
    • Lei 7/1985 das bases do réxime local

 

Novas do departamento

Celebrouse a gala de premios Galetiktokers 2022 con éxito de participación

“Os galegueños”, “Muinheira de Chantada”, “Galicia somos nós”, “Pequena historia con títulos de libros para combater o machismo”, “Sabías que unha artista se revelou contra a súa discográfica para publicar un disco en galego?” e “Jasolina – As tóxicas da ría” foron os vídeos gañadores do Galetiktokers 2022. Os premiados déronse a coñecer nunha gala celebrada o pasado sábado, 4 de novembro, que contou coa presenza dos participantes do certame e da actriz e cantante Pauliña, que se encargou de presentar o evento, así como do xurado que decidiu catro das seis pezas gañadoras. Asistiu tamén a concelleira de Mocidade e Normalización Lingüística, Escarlata Pampín. En total repartíronse 1.800 euros en premios.

Chega a Ames o programa “Mocidade Creativa” da Deputación da Coruña

Este sábado 11 de setembro aterra no Concello de Ames o programa “Mocidade Creativa” que impulsa a área de Mocidade da Deputación da Coruña. Serán catro horas de obradoiros en que a rapazada amesá poderá achegarse á danza urbana, ao mundo do graffiti e participar nunha sesión de DJ.

Chega o “CeibaRimas” ao anfiteatro do Milladoiro

O anfiteatro do Milladoiro acollerá o venres 28 de agosto o obradoiro de rimas en galego “CeibaRimas” que organiza a Dirección Xeral de Xuventude da Consellaría de Política Social da Xunta e Galicia en colaboración coa OMIX de Ames. Trátase dun proxecto de rap improvisado en galego que ten como obxectivo prioritario a normalización da lingua galega entre a mocidade. Fran, rapeiro do grupo Rebelión do Inframundo, será o encargado de dinamizar o obradoiro en Ames. Por mor da COVID19, e para seguir estritamente as normas de seguridade, o grupo que participará no obradoiro redúcese a 15 persoas máximo. As persoas que queiran inscribirse poden facelo xa a través da páxina web www.ceibarimas.gal.

Clausúrase o curso de monitores de tempo libre organizado pola Concellaría de Xuventude

O pasado domingo, 7 de maio, clausurouse o curso de monitores de tempo libre organizado polo departamento de Xuventude do Concello de Ames. O curso, homologado pola Xunta de Galicia, contou con 15 participantes, e desenvolveuse no Pazo da Peregrina e na Casa da Cultura de Bertamiráns durante as fins de semana e os días festivos dos meses de marzo, abril e maio, en horario de 9:00 a 14:00 e de 16:00 a 21:00 horas. Á xornada de clausura asistiu a concelleira de Mocidade, Escarlata Pampín. Unha vez rematada a parte teórico-práctica, de 200 horas de duración, os alumnos e alumnas teñen por diante 150 horas de prácticas en empresas, que deberán levar a cabo nos vindeiros dous anos.

Comeza nos institutos de Bertamiráns e do Milladoiro o programa de reforzo educativo

A Concellería de Mocidade, a través da Oficina Municipal de Información Xuvenil (OMIX), organiza unha nova edición do programa de reforzo educativo nos institutos do concello de Ames. Esta iniciativa, que está dirixida ao alumnado de 1º e 2º de ESO, desenvolverase os mércores no IES do Milladoiro e os xoves no IES de Ames, en Bertamiráns, en horario de 16:30 a 18:30 horas. Mentres que no IES de Ames xa deu comezo o programa o pasado xoves 16 de xaneiro, no IES do Milladoiro empezará este mércores 22 de xaneiro. No IES do Milladoiro aínda quedan prazas libres, polo que o alumnado interesado pode cubrir o formulario de inscrición e dirixirse á orientadora do centro.

Comeza o curso básico de lingua de signos organizado polo departamento de Xuventude

A Concellaría de Xuventude organizou un novo curso de lingua de signos (LSE) para a poboación moza. A formación comezou este xoves, 5 de outubro, e impartirase durante os meses de outubro, novembro e decembro na Casa da Cultura do Milladoiro. Participan 20 mozos e mozas de 16 a 35 anos. A través da formación, a mocidade poderá adquirir as ferramentas necesarias para o desenvolvemento das principais destrezas comunicativas das linguas viso-xestuais.

Concello de Ames e Nós Televisión presentan “Música na Factoría”

O bar O Transistor acollerá o vindeiro mércores, 11 de marzo, ás 20.00 horas, a preestrea do primeiro capítulo da serie audiovisual Música na Factoría, unha colaboración de Nós Televisión e Concello de Ames, que pon o foco na creación musical que xorde arredor da Factoría e nos grupos que empregan este espazo de ensaio no concello de Ames. A entrada ao evento será libre ata completar aforo

Covas estréase nos “Seráns de Ames” este xoves coas actuacións musicais de TEEN e Ginko Biloba

Este xoves, 17 de xullo, a partir das 20.00 horas, o campo da festa de Covas estrearase no programa dos Seráns de Ames con dúas frescas e novas propostas musicais. Deste xeito, a parroquia amesá acollerá as actuacións de TEEN e Ginko Biloba, ámbolos dous grupos formados por mozos que están a dar os seus primeiros pasos no mundo da música.

Dá comezo o curso de monitor/a de actividades de tempo libre organizado pola Concellaría de Xuventude

O pasado sábado, día 18, deu comezo unha nova edición do curso de monitor/a de actividades de tempo libre que organiza a Concellaría de Xuventude de Ames. Este curso, que está homologado pola Xunta de Galicia e conta con 15 participantes, desenvolverase no Pazo da Peregrina e na Casa da Cultura de Bertamiráns durante os meses de marzo, abril e maio. Consta de 350 horas de duración (200 horas teórico-prácticas) e 150 horas de prácticas en actividades de tempo libre.

Dá comezo unha nova edición do programa de reforzo educativo nos institutos do Milladoiro e de Bertamiráns

O departamento de Xuventude do Concello de Ames organiza unha nova edición do programa de reforzo educativo para o alumnado dos institutos do Concello de Ames. Esta iniciativa, que está dirixida aos rapaces e rapazas de 1º e de 2º curso da ESO, desenvolverase os luns e os mércores no Milladoiro, e os martes e xoves en Bertamiráns, en horario de 16:30 horas a 19:45 horas.

Eventos del departamento

>Sorteo do concurso Xincana Xove

O 18 de decembro, ás 12:00 horas, terá luagr na Praza do Concello de Bertamiráns o sorteo dos premios do concurso Xincana Xove.

>Trouleando: "Aquapark Cerceda"

A Concellaría de Xuventude de Ames organiza, a través do programa Trouleando, unha xornada no Aquapark de Cerceda, un parque acuático cunha ampla e variada gama de atraccións nas que pasar unha xornada de ocio con aquatubos, piscina de ondas, roaller coaster, tobogán de donuts, kamikaze, etc. Será o 15 de xullo e ofrecerase servizo de autobús dende Bertamiráns e O Milladoiro.

>Trouleando: "Galipark Padrón"

A Concellaría de Xuventude do Concello de Ames propón neste mes de setembro unha nova actividade enmarcada dentro do programa Trouleando que conxuga natureza, deporte e diversión: unha xornada no Galipark en Padrón, un parque multiaventuras cunha ampla e variada gama de actividades nas que pasar unha xornada de ocio en circuítos de altura (pontes colgantes), tirolina, rocódromo, tiro con arco, pistola láser tag, deslizador acuático e piscina. Será o sábado 28, e ofrecerase servizo de autobús dende Bertamiráns e O Milladoiro.

>Trouleando: "Surf en Razo"

A través do programa Trouleando, a Concellaría de Xuventude de Ames organiza unha xornada de surf para a mocidade do concello. Será o sábado 25 de maio, en Razo (Carballo) e ofrecerase servizo de autobús dende Bertamiráns e O Milladoiro. As persoas interesadas poden anotarse enviando a ficha de inscrición debidamente cumprimentada ao enderezo electrónico xuventude@concellodeames.gal entre o 6 e o 13 de maio (ambos incluídos). Ofértanse 40 prazas, que se asignarán por orde de chegada.

>Trouleando: A chimpos polo Urban Planet!

A chimpos polo Urban Planet! é o nome da segunda actividade que se organiza ao abeiro do programa Trouleando. Trátase dunha actividade que conxuga diversión, deporte, ocio activo e socialización entre a mocidade. Desenvolverase o venres, 21 de febreiro, de 22.00 a 00.00 horas, nas instalacións do Urban Planet Jump Santiago, situadas no centro comercial de Área Central. Os/as participantes nesta actividade teñen que acudir disfrazados para celebrar o Entroido dando chimpos e trouleando no Urban Planet.

>Trouleando: Humor Amarillo

A Concellaría de Mocidade continúa a organizar diferentes actividades nunha nova edición do programa Trouleando. Desta vez, os mozos e mozas amesáns poderán gozar o vindeiro 25 de maio dunha xornada de ‘Humor Amarillo’, un xogo no que os participantes teñen que realizar varias probas do máis orixinais. A actividade é de balde e está dirixida para a mocidade nada entre 1995 e 2012. O prazo para inscribirse comeza este mércores, día 7 de maio, e estará aberto ata o vindeiro luns, día 12. Para participar, é preciso enviar a ficha de inscrición cuberta e asinada ao enderezo xuventude@concellodeames.gal. Hai 50 prazas dispoñibles e adxudicaranse pola orde de chegada das solicitudes.

>Trouleando: obradoiro de danza urbana

Obradoiro de danza urbana da man da escola IB Urban Dance Studio , que se desenvolverá na praza da Maía, en Bertamiráns. No caso de condicións metereolóxicas adversas a actividade será trasladada ao anexo da Casa da Cultura de Bertamiráns.

>Trouleando: rafting polo río Ulla

A Concellaría de Mocidade ten programada para o sábado 23 de marzo unha nova actividade do programa Trouleando, dirixida a mozos/as de Ames a partir de 12 anos. Neste caso, organizouse un descenso de rafting polo tramo do río Ulla que discorre entre Carcacía e Herbón. O prazo para inscribirse nesta actividade estará aberto do 7 ao 13 de marzo. Para inscribirse hai que enviar a ficha cuberta ao enderezo xuventude@concellodeames.gal. As prazas son limitadas, e cubriranse por orde de chegada das inscricións. Esta actividade é de balde e está organizada polo departamento de Xuventude.

>Trouleando: xornada de barranquismo

A Concellaría de Mocidade de Ames retoma as actividades do programa Trouleando, desta volta, cunha xornada de barranquismo no río Almofrei, en Cotobade. Así, a mocidade amesá poderá gozar dunha actividade na que se combina deporte, diversión e aventura. Realizarase o sábado 4 de outubro e, como vén sendo habitual, ofrecerase servizo de autobús dende Bertamiráns e O Milladoiro. O prazo de inscrición estará aberto dende o vindeiro 17 de setembro ata o día 21. As persoas interesadas deben inscribirse enviando a ficha de inscrición debidamente cumprimentada ao enderezo electrónico xuventude@concellodeames.gal. Hai 50 prazas dispoñibles que se asignarán por orde de chegada. Pódese descargar a ficha de inscrición na seguinte ligazón.

>Trouleando: xornada de hidrospeed no río Ulla

O Concello de Ames, a través da Concellería de Mocidade de Ames, organiza unha nova actividade do programa Trouleando cunha xornada de deporte de aventura, no río Ulla, o próximo sábado 25 de abril.O prazo de inscrición estará aberto dende o 9 e o 16 de abril. As persoas interesadas deben inscribirse enviando a ficha de inscrición debidamente cumprimentada ao enderezo electrónico xuventude@concellodeames.gal. Hai 50 prazas dispoñibles que se asignarán por orde de chegada. Pódese descargar a ficha de inscrición nesta ligazón.