Actualidade

Ex., 08-07-2020
Ex., 08-07-2020
Mércores, 10 de xuño de 2020
Circuíto de calistenia do Milladoiro

O Concello de Ames, a través da Concellaría de Mocidade, vén de abrir esta semana dous circuítos de calistenia; un en Lapido, preto de Bertamiráns, e outro na área deportiva do Milladoiro. Na execución destas instalacións investíronse 41.922,14 euros. Estes proxectos estaban incluídos nos Orzamentos participativos para a mocidade. Dende este luns, 8 de xuño, pódese acceder a estas instalacións, aínda que durante a fase 3 do Plan para a transición cara a unha nova normalidade, o aforo está reducido ao 50% (12 persoas).

Sábado, 07 de marzo de 2020
Cartel da terceira actividade do programa Trouleando “A rolos polo Cebreiro!”

Durante o mes de marzo continúa o programa Trouleando (Findes para a mocidade), que desenvolve a Concellaría de Mocidade. Trátase dunha iniciativa a través do cal se organizarán diferentes actividades lúdicas, deportivas e culturais, durante as tardes - noites do fin de semana. Para este mes de marzo proponse unha actividade que conxuga diversión, deporte e socialización entre a mocidade denominada; A rolos polo Cebreiro! Trátase dunha actividade para gozar da neve e das paisaxes que ofrece un lugar como o Cebreiro. Para participar nesta actividade, que é gratuíta, é necesario inscribirse previamente. O prazo de inscrición remata o 16 de marzo.

Mércores, 12 de febreiro de 2020
Cartel do curso de inglés English Today!

A Concellaría de Mocidade, a través da Oficina Municipal de Información Xuvenil (OMIX), oferta unha nova edición do curso English Today!, orientado a un coñecemento práctico do idioma para o uso cotiá. O curso impartirase entre o 2 de marzo e o 28 de maio, os luns e xoves na Casa da Cultura de Bertamiráns, e os mércores e venres na Casa da Cultura do Milladoiro. As aulas terán unha duración de dúas horas, desenvolvéndose de 20.00h a 22.00 horas. Dirixido a persoas maiores de 16 anos, o curso conta con prazas limitadas que se irán cubrindo por rigorosa orde de inscrición. Terán preferencia os/as mozos/as de 16 a 30 anos. O prazo para presentar as solicitudes comeza o día 13 de febreiro e permanecerá aberta ata o 21 deste mes.

Martes, 11 de febreiro de 2020
Cartel de "A chimpos polo Urban Planet!" do programa Trouleando

Durante o mes de febreiro continúa o programa Trouleando (Findes para a mocidade), que desenvolve a Concellaría de Mocidade. Trátase dunha iniciativa a través do cal se organizarán diferentes actividades lúdicas, deportivas e culturais, durante as tardes - noites do fin de semana. Estas actividades en principio vanse a desenvolver nalgún dos fin de semana da última quincena de cada mes do ano. Neste mes de febreiro a mocidade amesá pode participar nunha actividade que se desenvolverá nas instalacións do Urban Planet Jump Santiago, situadas no centro comercial de Área Central. Para participar nesta actividade, que é gratuíta, é necesario inscribirse previamente. O prazo de inscrición remata o 18 de febreiro.

Luns, 10 de febreiro de 2020
Imaxe do curso de monitor/a de actividades de tempo libre

Este pasado sábado, 8 de febreiro, comezou unha nova edición do curso de monitor/a de actividades de tempo libre que organiza a Concellaría de Mocidade, a través da Oficina Municipal de Información Xuvenil do Concello de Ames. Este curso desenvolverase no anexo da Casa da Cultura de Bertamiráns, ata que rematen as obras no Pazo da Peregrina, durante os meses de febreiro, marzo e abril. Consta de 350 horas de duración (200 horas teórico-prácticas) e 150 horas de prácticas en actividades de tempo libre. O curso, que está homologado pola Xunta de Galicia, tivo moi boa acollida. Participan 25 mozos/as e hai persoas en lista de agarda.

Mércores, 29 de xaneiro de 2020
Trouleando: danza urbana

Este venres, 31 de xaneiro, ponse en marcha o programa Troulenado (Findes para a mocidade), que desenvolve a Concellaría de Mocidade. Trátase dunha iniciativa a través do cal se organizarán diferentes actividades lúdicas, deportivas e culturais, durante as tardes - noites do fin de semana. Estas actividades en principio vanse a desenvolver nalgún dos fin de semana da última quincena de cada mes do ano. Dita iniciativa comeza cuns obradoiros de danza urbana, que se desenvolverán este venres, en horario de 19.30 a 21.00 horas, no anexo da Casa da Cultura de Bertamiráns.

Martes, 21 de xaneiro de 2020
Imaxe da presentación do programa de ocio Trouleando

O salón de plenos da Casa do Concello acolleu esta mañá a presentación dunha nova iniciativa promovida pola Concellaría de Mocidade. Trátase do programa Trouleando (Findes para a mocidade), a través do cal se organizarán diferentes actividades lúdicas, deportivas e culturais, durante as tardes - noites do fin de semana. Estas actividades en principio vanse a desenvolver nalgún dos fin de semana da última quincena de cada mes do ano. Dita iniciativa comeza cuns obradoiros de danza urbana, que se desenvolverán o vindeiro venres, 31 de xaneiro, entre as 19.30 e as 21.00 horas, na praza da Maía, en Bertamiráns.

Martes, 21 de xaneiro de 2020
Programa de reforzo educativo

A Concellería de Mocidade, a través da Oficina Municipal de Información Xuvenil (OMIX), organiza unha nova edición do programa de reforzo educativo nos institutos do concello de Ames. Esta iniciativa, que está dirixida ao alumnado de 1º e 2º de ESO, desenvolverase os mércores no IES do Milladoiro e os xoves no IES de Ames, en Bertamiráns, en horario de 16:30 a 18:30 horas. Mentres que no IES de Ames xa deu comezo o programa o pasado xoves 16 de xaneiro, no IES do Milladoiro empezará este mércores 22 de xaneiro. No IES do Milladoiro aínda quedan prazas libres, polo que o alumnado interesado pode cubrir o formulario de inscrición e dirixirse á orientadora do centro.

Sábado, 18 de xaneiro de 2020
Cartel do curso de monitor/a de actividades de tempo libre do Concello de Ames

O departamento de Mocidade do Concello de Ames organiza para os vindeiros meses un curso de monitor/a de actividades de tempo libre. Este desenvolverase en fins de semana de febreiro, marzo e abril en horario de 9.00 a 14.00 horas e de 16.00 a 21.00 horas, no Pazo da Peregrina de Bertamiráns. As prazas son limitadas e outorgaranse por orde de entrada. O curso ten un prezo de 172 euros e o prazo de inscrición remata o 29 de xaneiro. Ao pé desta nova poden consultarse as bases e a ficha de inscrición.

Martes, 17 de decembro de 2019
Imaxe do festival SolporSon de Ames 2019

O festival SolporSon de Ames 2019 xa é unha realidade. O éxito de participación da primeira edición deste festival de música confirma que esta iniciativa perdurará no tempo. Varios centos de persoas de Ames e da contorna acudiron ao festival que estivo presentado pola xornalista, Paula Señarís. Dende as 19.30 horas actuaron os grupos Náiade, Triska, Monoulious Dop, De Vacas, Biribirlocke e Sondarúa. Tamén houbo batalla de galos (regueifa moderna) e unha exhibición de grafite.  Esta iniciativa, posta en marcha dende a Concellaría de Mocidade e Normalización Lingüística, xurdiu tralas xuntanzas realizadas cos mozos e mozas dentro da Comisión de orzamentos participativos que foron creados pola Concellaría de Economía e Facenda. Gracias a Inés Duport e Luís Santaolalla Photo & Vídeo pola cesión das fotos publicadas do SolporSon de Ames 2019.