Actualidade

Ex., 29-03-2024
Ex., 29-03-2024
Martes, 19 de marzo de 2024
Organízanse dúas novas xuntanzas do Club xuvenil de Ames

A Concellaría de Mocidade vén de poñer en marcha o Club xuvenil de Ames. Trátase dunha nova iniciativa a través da que se trata de crear un grupo de ata 30 mozos e mozas de entre 13 e 18 anos, para que compartan experiencias e proxectos. As actividades que se imparten están coordinadas por dous monitores da empresa Aquelando SL, coworkers do espazo colaborativo A Proa. Dita iniciativa desenvolverase de marzo a decembro, facendo un parón durante o verán nos meses de xullo e agosto. O venres 22 e mailo sábado 23 de marzo haberá dúas novas xuntanzas no Milladoiro e Bertamiráns co obxectivo de ir facendo grupo e que os mozos e mozas interesados se unan a este club xuvenil.

Mércores, 06 de marzo de 2024
O programa Trouleando volve en marzo cunha xornada de rafting polo río Ulla

A Concellaría de Mocidade ten programada para o sábado 23 de marzo unha nova actividade do programa Trouleando, dirixida a mozos/as de Ames a partir de 12 anos. Neste caso, organizouse un descenso de rafting polo tramo do río Ulla que discorre entre Carcacía e Herbón. O prazo para inscribirse nesta actividade estará aberto do 7 ao 13 de marzo. Para inscribirse hai que enviar a ficha cuberta ao enderezo xuventude@concellodeames.gal. As prazas son limitadas, e cubriranse por orde de chegada das inscricións. Esta actividade é de balde e está organizada polo departamento de Xuventude.

Mércores, 28 de febreiro de 2024
A Concellería de Mocidade presenta o Club Xuvenil de Ames

Esta mañá o salón de plenos da Casa do Concello acolleu a presentación do novo Club Xuvenil de Ames, unha iniciativa impulsada pola Concellería de Mocidade. Neste grupo poderán participar ata 30 mozos e mozas de entre 13 e 18 do Concello de Ames, e as actividades que se leven a cabo estarán coordinadas por dous monitores da empresa Aquelando SL, coworkers do espazo colaborativo A Proa. As actividades estenderanse de marzo a decembro, facendo un parón durante o verán nos meses de xullo e agosto.

Xoves, 25 de xaneiro de 2024
15 rapaces e rapazas están a participar no curso de monitor de tempo libre organizado pola Concellería de Mocidade

O pasado 13 de xaneiro deu comezo unha nova edición do curso de monitor/a de actividades de tempo libre organizado polo departamento de Xuventude. Este curso, homologado pola Xunta de Galicia, conta 15 participantes, e desenvolverase no Pazo da Peregrina de Bertamiráns ao longo dos meses de xaneiro, febreiro, marzo e abril durante as fins de semana. Ten unha duración total de 350 horas (200 horas teórico-prácticas e 150 horas de prácticas en actividades de tempo libre).

Martes, 23 de xaneiro de 2024
Aberto o prazo de inscrición para participar na actividade “Finde na neve” que organiza Xuventude Ames

A Concellería de Xuventude organiza unha nova actividade dirixida á mocidade empadroada en Ames. Trátase da iniciativa “Finde na neve”, que se desenvolverá do 23 ao 25 de febreiro na estación invernal de Leitariegos (León). Na actividade poderán participar un total de 40 mozos/as nados entre o 2008 e o 1993. Para que a actividade se realice será necesario acadar un mínimo de 25 inscritos. As prazas que non se cubran con persoas empadroadas en Ames poden ser ocupadas por persoas doutros concellos. O prazo de inscrición está aberto dende hoxe, día 23, ata o 31 de xaneiro. O custe da actividade é de 158 euros; o prezo inclúe transporte, estadía, manutención, forfait, alugueiro do material de esquí, curso de 4 horas, etc. Premendo nesta ligazón podes descargar o impreso de inscrición.

Mércores, 17 de xaneiro de 2024
Invístense preto de 18.000 euros para realizar melloras nas instalacións e equipamento da Factoría

A concelleira de Mocidade, Carmen Porto, e maila responsable técnica do departamento de Xuventude, Pili Villaverde, realizaron esta mañá unha visita ao local A Factoría, que está situado na parroquia de Biduído. Durante o último trimestre de 2023 estiveron realizándose traballos para mellorar as instalacións e dotala de novo equipamento. En ditas melloras investíronse 17.797,04 euros. De dito importe, 15.000 euros son sufragados con cargo ao Plan Ames Progresa e o importe restante con fondos propios da Concellaría de Mocidade. Realizáronse traballos para mellorar o illamento do edificio e para mellorar as instalación do interior do local. Tamén se adquiriu unha mesa de mesturas para DJ e dun sistema de gravación. A Factoría abrirase para que sexa un lugar de encontro para a mocidade amesá. Estase traballando na creación dun club xuvenil que poida empregar A Factoría como lugar de reunión.

Mércores, 17 de xaneiro de 2024
Participa na actividade “Finde na neve” que se realizará en Leitariegos no mes de febreiro

A Concellería de Xuventude organiza unha nova actividade dirixida á mocidade empadroada en Ames. Trátase da iniciativa “Finde na neve”, que se desenvolverá do 23 ao 25 de febreiro na estación invernal de Leitariegos (León). Na actividade poderán participar un total de 40 mozos/as nados entre o 2008 e o 1993. Para que a actividade se realice será necesario acadar un mínimo de 25 inscritos. As prazas que non se cubran con persoas empadroadas en Ames poden ser ocupadas por persoas doutros concellos. O prazo de inscrición estará aberto dende o 23 ata o 31 de xaneiro. O custe da actividade é de 158 euros; o prezo inclúe transporte, estadía, manutención, forfait, alugueiro do material de esquí, curso de 4 horas, etc. Premendo nesta ligazón podes descargar o impreso de inscrición.

Xoves, 28 de decembro de 2023
10 mozos e mozas participaron no Obradoiro de Son que se impartiu na Factoría, en Biduído

A través do departamento de Xuventude, o Concello de Ames organizou por primeira vez o Obradoiro de Son, unha master class musical relacionada coa produción e gravación. Nesta primeira edición do obradoiro, dirixido a rapaces e rapazas a partir de 14 anos, participaron 10 persoas. Impartiuse os días 27 e 28 de decembro, e durante ambas xornadas o alumnado puido explorar todas as posibilidades que ofrece o local de ensaio de A Factoría.

Luns, 18 de decembro de 2023
Sorteo dos premios da I Xincana Xove

A Casa do Concello, en Bertamiráns, acolleu está mañá o sorteo de premios para coñecer os equipos premiados na primeira edición da Xincana Xove, organizada polo Concello de Ames a través da Concellería de Xuventude e a XEA (Xuntanza de Empresarios de Ames). O obxectivo desta actividade, dirixida a mozos e mozas de entre 14 e 30 anos de calquera concello de Galicia, era que a mocidade explorara e coñecera o municipio de xeito participativo e divertido. Participaron un total de 27 equipos formados por 81 mozas/mozos. Os premio serán entregados o 31 de decembro pola mañá na praza do Concello durante as Prebadaladas de Nadal.

Mércores, 13 de decembro de 2023
Obradoiro de Son

O Concello de Ames, a través do departamento de Xuventude, organiza por primeira vez durante as vacacións de Nadal unha master class musical para a mocidade relacionada coa produción e gravación musical. A actividade, orientada a mozos e mozas a partir de 14 anos, desenvolverase os días 27 e 28 de decembro en horario de 11:00 a 13:30 horas no local de A Factoría en Biduído. Para inscribirse haberá que enviar, entre o 13 e o 20 de decembro, o impreso de inscrición cuberto e asinada ao enderezo de correo electrónico xuventude@concellodeames.gal.