Actualidade

Ex., 21-11-2019
Ex., 21-11-2019
Xoves, 26 de setembro de 2019
Eventos infantís

A Oficina Municipal de Información Xuvenil de Ames (OMIX) organiza para o vindeiro sábado 5 de outubro, un novo curso de dinamización de eventos infantís. O curso, que estará orientado ao desenvolvemento de actividades de entretemento, desenvolverase na Casa da Cultura de Bertamiráns, en horario de 10:00h a 14:00h e de 15:30 a 19:30h. Para participar deste curso é preciso anotarse, enviando a ficha de inscrición cuberta xunto cunha fotocopia do DNI ao enderezo de correo electrónico omix@concellodeames.gal. O curso está dirixido a mozas e mozos maiores de 18 anos. O prazo de inscrición permanecerá aberto entre o 25 de setembro e o 2 de outubro. Ao remate desta nova poderás obter o impreso de inscrición.

Martes, 23 de xullo de 2019
voluntariado 1

A Oficina Municipal de Información Xuvenil (OMIX) de Ames desenvolve de novo este verán, por sexta vez, un programa de voluntariado xuvenil. Nel participan oito mozas e mozos de idades comprendidas entre os 16 e os 30 anos. O equipo colabora na organización de distintas actividades municipais, como é o campamento urbano que se desenvolveu na Aula da Natureza. O programa enmárcase na convocatoria de subvencións da Consellería de Política Social da Xunta de Galicia e o seu obxectivo é a promoción de actividades que favorezan o desenvolvemento persoal e profesional das mozas e dos mozos que participan, ao mesmo tempo que eles e elas contribúen a mellorar a calidade de vida da comunidade.

Mércores, 17 de xullo de 2019
campamento xuvenil 1

Preto de 80 rapaces e rapazas de Ames participan durante esta semana dos dous campamentos municipais do Concello de Ames que organiza a Oficina Municipal de Información Xuvenil (OMIX). Así, 48 rapazas e rapaces de 1º a 3º de ESO están no campamento xuvenil Diverlanhoso de Portugal, mentres que 30 mozos e mozas de 4º da ESO a 2º de bacharelato gozan da saída Aventura por Asturias. O regreso de ambos campamentos está previsto para o próximo sábado, 20 de xullo.

Luns, 01 de xullo de 2019
Rapaces/as de 5º de Primaria no campamento das Fragas do Eume

O Concello de Ames organiza para todos os veráns un programa de campamentos municipais. Este ano estas actividades comezaron o pasado 25 de xuño e realizaranse ata o 2 de setembro. En total, dito programa inclúe a realización de 9 campamentos diferentes ao do longo do verán. Sete destes campamentos son organizados pola Aula da Natureza e dous pola OMIX. Coa súa organización, búscase ofrecer unha oferta formativa de desenvolvemento persoal concibida para, de xeito progresivo, dotar ás crianzas e ás mozas e mozos das ferramentas precisas para lograr a autonomía e a independencia, ao tempo que se promove a cooperación e o respecto, ademais dun estilo de vida saudable ligado ao medio natural, ao deporte e á cultura. Nestes nove campamentos participarán uns 408 rapazas e rapaces.

Martes, 25 de xuño de 2019
Curso primeiros auxilios OMIX 2019

Un total de vinte persoas participaron na última edición do curso de primeiros auxilios organizado pola Oficina Municipal de Información Xuvenil (OMIX) de Ames, dependente da Concellaría de Mocidade. O obxectivo desta formación, que o alumnado valorou de maneira moi positiva, foi o de ofrecerlles aos participantes unha serie de ferramentas e coñecementos que lles permitan actuar ante un accidente doméstico, viario ou unha situación de emerxencia ata a chegada dos servizos sanitarios. O curso desenvolveuse os luns, martes e mércores do 3 ao 19 de xuño.