O Fondo Galego de Cooperación e Solidariedade, do que é socio o Concello de Ames, cofinanciará cun total de 99.813 euros catro proxectos de ONGD galegas na India, Nicaragua, El Salvador e Guatemala. A concelleira de Benestar Social, Luísa Feijóo, participou onte por videoconferencia na Asemblea Xeral da asociación de Concellos e Deputacións, que resolveu a convocatoria de axudas, á que se presentaron doce propostas centradas en dez países. No encontro virtual, que se celebrou coincidindo co Día Mundial da Saúde, tamén se fixo balance dun 2020 marcado pola pandemia e aprobouse por unanimidade o Plan de Actividades para este ano.

A conselleira de Política Social, Fabiola García, visitou esta mañá a unidade de atención temperá de Teo e Ames coincidindo coa nova convocatoria de axudas para que os Concellos ou agrupacións de Concellos poñan en marcha este servizo. Alí foi recibida pola concelleira de Benestar Social de Ames, Luísa Feijóo, o concelleiro de Benestar de Teo, Ignacio Iglesias, as técnicas que se encargan de coordinar este servizo en Ames, Rosana Martínez, e en Teo, Berta Conde, o equipo profesional do servizo, a voceira do PP de Ames, Oliva Agra, e o voceiro do PP de Teo, José Manuel Guerra. O SAT está dirixido á poboación infantil de 0 a 6 anos, á súa familia e ao seu contorno, e ten por obxectivo darlles resposta o antes posible ás necesidades transitorias ou permanentes que presentan os nenos e as nenas con trastornos no desenvolvemento ou en risco de padecelos, para facilitar o desenvolvemento da súa autonomía persoal e a inclusión social.

Membros da Corporación Municipal de Ames recibiron este xoves 28 á activista salvadoreña Morena Herrera, acompañada de Lorena Seijo, coordinadora da organización sen ánimo de lucro, AGARESO. Morena Herrera (El Salvador, 1960) é unha histórica activista polos Dereitos Humanos e da muller, coñecida polo seu traballo contra a prohibición do aborto no seu país. Durante a recepción, Herrera denunciou a preocupante situación das mulleres en El Salvador, expostas a penas de entre 30 e 40 anos de cárcere por calquera tipo de aborto, mesmo por causas naturais, e incidiu no forte crecemento nos últimos anos de suicidios entre mozas adolescentes embarazadas, a primeira causa de morte indirecta entre xestantes desta franxa de idade.

Municipalismo e solidariedade danse a man esta fin de semana en Ames coa posta en marcha da I Feira do Voluntariado na que participan vinte catro entidades e as oficinas de voluntariado dos concellos de Padrón, Vedra e Negreira. A Feira inaugurase o venres 28 de maio ás 17:00 horas no Pazo da Peregrina de Bertamiráns coa presenza da Directora Xeral de Xuventude, Participación e Voluntariado, Cristina Pichel, o alcalde de Ames, Blas García, a concelleira de Benestar e Igualdade, Luísa Feijóo e representantes dos concellos colaboradores. Está previsto a realización de  faladoiros, exposicións, obradoiros e actuacións musicais. Haberá servizo de autobús de balde desde o Milladoiro e desde as parroquias. Para poder utilizalo desde as parroquias é necesario reservar praza nos teléfonos 662 377 302 e 683 327 375 ou no enderezo electrónico voluntariado@concellodeames.gal. Podes consultar aquí o programa de actividades. Tamén podes coñecer o horario, os relatores/as e os temas dos faladorios.