O espazo colaborativo “A Proa” organiza nos xoves deste mes de marzo a súa primeira serie de obradoiros e charlas presenciais baixo o nome “Coworking days”. A actividade inicial realizouse o pasado xoves, 3 de marzo, cun taller para coñecer o funcionamento dun coworking e resolver dúbidas. Estas actividades teñen continuidade este xoves, 10 de marzo, cun taller impartido por Juan Diego Pereiro Areán, para aprender a realizar unha proposta de valor adecuada para o teu negocio. O terceiro e último evento deste mes de marzo será o 24 de marzo e denomínase “Lego serious play – construíndo o teu modelo de negocio. As inscricións para estas actividades poden realizarse de balde premendo nesta ligazón.

A meirande parte da programación de Nadal de Ames quedou suspendida a pasada semana por mor da situación epidemiolóxica do concello, mais o programa Ameson segue o seu curso, con máis medidas para reforzar a seguridade das persoas asistentes. Á entrada dos concertos pedirase o pasaporte covid e o público terá que estar sentado, para poder gozar das catro propostas de Paco Nogueiras, Broken Peach, a Escolanía da Catedral de Santiago e Thais Suki, que terán lugar ao longo desta semana.

O prazo de presentación de solicitudes estará aberto dende o día 10 ata o 25 de novembro. O obxecto destas bases é regular as axudas a conceder polo Concello de Ames como concello adherido ao Fondo de Financiamento promovido pola Deputación da Coruña, aprobadas coa finalidade de impulsar a actividade económica e o emprego no termo municipal amesá e contribuír a paliar na medida do posible os danos derivados da pandemia da COVID-19, nas microempresas e autónomos/as. O Concello de Ames destina a esta liña de axudas un total de 582.547,86 euros. O Fondo de Financiamento constitúese cun 80% de achega da Deputación da Coruña e un 20% financiado con fondos propios do concello. Deste xeito, o Concello de Ames achega 116.509,57 euros e a Deputación da Coruña concede 466.038,29 euros. 

O pasado 1 de maio pechouse a primeira fase da campaña de tarxetas bono Merc@mes, a través da cal se dinamizou e apoiou o comercio local de Ames. Dende o 1 de marzo ata o 1 de maio realizáronse 8.248 operacións por valor de 169.715,30 euros. A maior parte destas operacións realizáronse no comercio minorista, que foi o máis beneficiado da campaña, seguido do sector hostaleiro. En total fixéronse operacións en 164 establecementos distintos, cunha media de 1.035 euros por establecemento. Na actualidade, as tarxetas bono Merc@mes están bloqueadas e non se poden volver usar ata que comece a segunda fase da campaña. Dende a Concellaría de Promoción Económica están traballando para adherir novos establecementos na segunda fase da campaña, que se desenvolverá do 1 de setembro ata o 31 de outubro, e tamén para poñer á venda novas tarxetas, xa que durante a primeira fase xa se esgotaron as 3.000 tarxetas-bono postas á venda.