Os dous principais núcleos de Ames, O Milladoiro e Bertamiráns, celebran por segundo ano consecutivo as súas festas de xeito conxunto. O resultado desta unión é o cartel “Ames en festas”, unha programación de once días de música, concertos e actividades para todos os públicos. O arranque tivo lugar no Milladoiro, coas festas da Madalena, que rematan hoxe co concerto de Heredeiros da Crus e a actuación de Charleston Big Band. Tras cinco días de festexos toma a remuda Bertamiráns coa celebración das festas da Peregrina.

Esta mesma tarde comezan as actividades e propostas en Bertamiráns, coa actuación para o público infantil e familiar de Paco Nogueiras na praza de Chavián, ás 19:30 horas, como parte da programación da Concellaría de Promoción Económica “AmesON de verán”. Nogueiras, músico e actor, combina a súa labor en diversas formación teatrais con ser monitor de teatro e realizar numerosos espectáculos para o público infantil e familiar.

Mañá, mércores 9, comezará a música e a verbena co concerto de Sabela no parque do Ameneiral ás 21:00 horas, e coa actuación da orquestra Panorama e Disco Móbil Fabrik no campo da festa da Peregrina, ás 23:00 horas.

Na mesma liña continuarán as festas o xoves 10, un día que arrincará coa actuación dos Festicultores na praza da Maía ás 21:00 horas, e continuará ás 23:00 horas coa actuación da Orquestra Kubo no campo da festa da Peregrina.

O venres 11 a noite arrincará cun concerto a cargo do grupo amesán As Maianas e do dúo Caamaño & Ameixeiras. De seguido, ás 23:00 horas no campo da festa da Peregrina haberá verbena a cargo da orquestra Finisterre e a disco móbil Chocolate.

Como novidade, para o sábado, 12 de agosto, a comisión de festas da Peregrina organizou unha nova iniciativa. Trátase dunha romaría urbana que se realizará no parque do Ameneiral. Comezará ás 13:30 horas cunha sesión vermú. Ao longo de toda a tarde haberá diversas actuacións musicais a cargo de Mad Martín, La Reunión, Michu da Rocha e Doctor Snob. A través desta iniciativa trátase de levar a festa ao centro de Bertamiráns para que a veciñanza poida gozar desta romaría e tamén teña un retorno económico para os establecementos comerciais e hostaleiros da localidade.

Os espectáculos da romaría enlazarán co concerto de Los Mecánicos previsto para ás 21:00 horas, que se enmarca dentro do “AmesON de verán”. Los mecánicos é unha das bandas de versións pioneiras en Galicia, que interpreta música pop e rock dos 60: os Beatles, Elvis, Raphael, os Grincos ou os Bravos.

O domingo 13 de agosto, ás 23:00 horas, haberá verbena a cargo da orquestra Compostela e a disco móbil CDC. Para poñer fin aos once días de festas no concello, o luns 14 de agosto, ás 23:00 horas, actuará a orquestra Nueva Fuerza.

Novas relacionadas:

La Voz de Galicia: "La orquesta Panorama y Sabela abren hoy seis días de fiesta en Bertamiráns"