O Teatro Principal de Santiago vén de acoller a xornada inaugural do XIII Festival Peregrinos Musicais, que rexistrou unha boa acollida cunha asistencia de máis dun cento de persoas. Diana Pogoshyan (violín), Jorge Suárez (cello) e Ilona Timchenko (piano) protagonizaron un concerto de apertura do evento. O director xeral de Cultura, Anxo Lorenzo, e o alcalde de Ames, Blas García, presidiron a inauguración oficial desta cita. Esta é a primeira das sete citas que se desenvolverán ata o 14 de xullo en distintos espazos emblemáticos de Santiago e tamén en Ames. Precisamente, o Pazo da Peregrina acolle o vindeiro domingo, 9 de xullo, ás 21.00 horas, un concerto dos gañadores do Certame Internacional de Novos Talentos.

O Concello de Ames e o grupo Chévere chegaron a un novo acordo de colaboración vencellado ao proceso de creación da nova obra que a compañía está preparando. Trátase dunha obra protagonizada por Patricia de Lorenzo e Miguel de Lira, que toma como punto de partida o cadro de Castelao titulado “A derradeira leición do mestre”, para falar de como se constrúen as narrativas da memoria. Dentro desta colaboración, o Concello de Ames ofrece a Chévere un espazo para realizar unha residencia de traballo e ensaios entre os meses de xaneiro e febreiro de 2026 e Chévere realizará no concello de Ames varias actividades asociadas ao proceso de creación. A primeira actividade proposta por Chévere é que a veciñanza amesá poida ver nas Casas da Cultura do Milladoiro e de Bertamiráns unha reprodución do cadro de Castelao.

O vindeiro venres, 19 de xullo, o concello de Ames acollerá unha das xornadas do Festival Internacional de Danza e Movemento “Abanea”, organizado pola asociación IS.MO Cultura. Así, ao longo desta xornada desenvolveranse diversas actividades arredor da danza e do movemento, co obxectivo de impulsar esta disciplina entre a veciñanza. A programación do festival foi presentada onte na Cidade da Cultura, en Santiago de Compostela.

O Concello de Ames, a través da Concellaría de Cultura, volve a programar un ano máis a Mostra de Teatro Afeccionado. Deste xeito, o auditorio da Casa da Cultura do Milladoiro acollerá do 5 ao 8 de decembro un total de catro representacións teatrais a cargo de compañías de Ames, Brión, Muxía e Santa Comba. Os convites poden adquirirse na Billeteira electrónica. No caso de haber convites dispoñibles, tamén se poden coller o propio día do espectáculo.