A Casa da Cultura de Bertamiráns acolleu esta mañá a presentación do XXI Festival internacional de Maxia de Ames “FestiMax”, unha das actividades que máis éxito teñen entre a veciñanza amesá. Este festival organizado polo Concello de Ames, en colaboración coa Deputación da Coruña, conta cun amplo programa de espectáculos e obradoiros para todos os públicos. Do 22 ao 25 de outubro haberá maxia para bebés, nenos e nenas, persoas adultas e maiores nas Casas da Cultura de Bertamiráns e do Milladoiro. As entradas poderanse adquirir na Billeteira electrónica do Concello de Ames. Este evento conta coa colaboración da Rede Cultural da Deputación da Coruña. 

A Escola Municipal de Teatro vén de anunciar as prazas que quedaron sen cubrir para cada un dos grupos ofertados para o vindeiro curso 2026-2027. Deste xeito, as persoas interesadas poderán inscribirse no grupo de secundaria do Milladoiro, no grupo de 1º, 2º e 3º de primaria de Bertamiráns e no grupo inclusivo, que este ano pasa a impartirse no Milladoiro en horario de 17.00 a 18.00 horas. 

O martes, 1 de setembro, abre o prazo extraordinario para a solicitude das prazas que quedaron libres para o vindeiro curso 2026-2027. Ao ser un período extraordinario, as prazas adxudicaranse por orde de rexistro de entrada. As persoas interesadas terán ata o vindeiro 8 de setembro para realizar a formalización. Esta poderá facerse na Sede electrónica do Concello de Ames ou ben de xeito presencial nos rexistros municipais.

Este xoves, 13 de agosto, ás 21.00 horas, o campo da festa de San Amaro, en Barouta, acolle a terceira entrega do programa dos Seráns de Ames 2026, a primeira do mes de agosto. Nesta xornada, o público poderá gozar das recentemente galardoadas coa medalla do Concello de Ames As Maianas. A última sesión será o vindeiro xoves, 27 de agosto, con contacontos, xogos populares, teatro e música na praia fluvial de Tapia.