O vestíbulo de exposicións da Casa da Cultura de Bertamiráns acollerá a partir do vindeiro luns, 5 de xuño, unha selección de acuarelas urbanas, “Por seguir o camiño”. Trátase dun conxunto de pinturas realizadas polo debuxante Javi Penedo que representan diversos lugares que marcaron a vida do autor.

O Centro Cultural A Mahía e a Asociación de Veciños de San Pedro de Bugallido organizan para este domingo, 4 de xuño, a representación da obra teatral “Moito ruído e poucas noces”. Será ás 19:00 horas, no centro social de Bugallido. O acceso será libre e gratuíto. A obra está patrocinada por polo departamento de Cultura do Concello de Ames, no marco de apoio á creación artística e á difusión de obras de grupos amateurs. 

A parroquia de Bugallido celebra esta fin de semana as festas de San Isidro. A celebración comezará arredor das 11:00 horas do sábado, cunha concentración de motos en Bertamiráns, que avanzará ás 12:30 cara o campo da festa de Bugallido. Ao longo de toda a xornada haberá tamén oito actuacións musicais. O domingo celebrarase a misa solemne e a procesión, coa posterior sesión vermouth e concertos musicais que se estenderán ata a última hora da tarde. O domingo celebrarase a misa solemne e a procesión, e haberá tamén sesión vermouth e concertos musicais que se estenderán ata a última hora da tarde. As festas contarán con cantina con empanada e callos, polbeiro, unha exhibición de traxes tradicionais, animación infantil e diversos postos de artesanía.

O alumnado de violín da Escola Municipal de Música participará este mércores, 10 de maio, ás 18.30 horas, nunha audición co obxectivo de compartir o que aprenderon ao longo deste curso. Interpretarán pezas de estilos musicais moi variados. Ademais aproveitase para lembrar que está aberto o prazo para que o alumnado da Escola Municipal de Música poida renovar a súa praza de cara ao vindeiro curso 2023-2024. A solicitude poderase realizar ata este xoves 11 de maio, a través da Sede electrónica do Concello de Ames, ou ben de xeito presencial nas Oficinas de asistencia en materia de rexistro, situadas na Casa do Concello (Bertamiráns) e na Oficina municipal do Milladoiro. Premendo nesta ligazón podes descargar o impreso de solicitude de renovación de praza.