O programa Apego achega a Ames a recoñecida película infantil “Valentina”, un conto musical sobre a inclusión e a diversidade, dirixida por Chelo Loureiro e premiada co Goya 2021 á mellor película de animación. O filme conta a historia dunha rapaza cansa de ter síndrome de Down, convencida de que é o motivo que lle impide acadar o seu soño de ser trapecista, e que fará unha viaxe máxica para descubrir todo do que é capaz. A proxección, orientada ao público familiar, terá lugar o mércores 21 de setembro, ás 18:00 horas, na Casa da Cultura do Milladoiro. A inscrición, de balde, pode realizarse dende hoxe ata o 20 de setembro, enviando un correo ao enderezo normalizacion@concellodeames.gal, no que se indiquen nome e apelidos das persoas asistentes, teléfono de contacto e idade das crianzas. A actividade chega ao abeiro do Fondo Xacobeo 21-22, no marco da iniciativa FalaRedes da Secretaría Xeral de Política Lingüística da Xunta de Galicia.

A Concellaría de Normalización Lingüística acaba de publicar a listaxe de persoas gañadoras da vixésimo segunda edición do Certame Literario de Ames. Na edición deste ano, recibíronse un total de 158 traballos, e foi na categoría de poesía para maiores de 18 anos na que houbo un maior número de participantes, con 72 obras recibidas. As persoas encargadas de xulgar os textos desta edición foron: María López Sández, Manuel Núñez Singala e Mariña Pérez Rei; as tres pertencentes ao ámbito literario e referentes na creación literaria galega actual. A entrega de premios estará presentada por Belén Martínez, xornalista de Ames Radio, e terá lugar este sábado, 14 de xuño, ás 12:30 horas, na Casa da Cultura do Milladoiro. Pódese descargar a acta completa do xurado na seguinte ligazón. 

O próximo venres, 28 de maio, ás 18:00h, a Casa da Cultura do Milladoiro acollerá o espectáculo “Punkdemia”, do clown galego Peter Punk. A actividade chega da man do Programa Apego de normalización lingüística, e está dirixida a familias con crianzas. Peter Punk servirase da risa para combater o medo ao coronavirus e para lembrarnos a importancia de coidármonos. Para poder asistir é imprescindible inscribirse previamente, antes do xoves 27 de maio, a través do enderezo de correo electrónico normalizacion@concellodeames.gal, indicando o nome e apelidos das persoas participantes, a idade das crianzas e un teléfono de contacto.

A Casa da Cultura do Milladoiro foi o escenario elixido para por en marcha a novena edición do Club de Debate cunha xornada de formación conxunta. Nela participaron arredor de 90 rapaces e rapazas de 3º e 4º da ESO e 1º de Bacharelato da comarca de Santiago de Compostela. A primeira hora da mañá recibiron a visita da concelleira de Normalización Lingüística e Mocidade, Escarlata Pampín.