O Día Universal do Neno, que se celebra todos os anos o 20 de novembro, é un día dedicado a todos os nenos e nenas do mundo. Así, hoxe é un día para que todo o mundo coñeza os dereitos dos nenos e para lembrar a importancia de traballar para conseguir o benestar de todos os nenos e nenas do mundo, comezando polos do noso concello. Con motivo de dita conmemoración o Servizo de Normalización Lingüística de Ames quere festexalo animando ás familias a non privar ás crianzas do dereito a adquirir a nosa lingua. Así, hoxe procedese á emisión da historia de Ánxela e Ben, unha das primeiras familias que se sumou ao programa Apego de Ames e que hoxe viven en Dinamarca.

O Concello de Ames, no marco dos premios Lingua e Empresa organiza, por segundo ano consecutivo, unha xornada formativa destinada ás empresas amesás que nesta ocasión ten como obxectivo mellorar a comunicación empresarial para chegar á clientela cunha maior efectividade e impacto. O prazo para inscribirse nesta acción formativa estará aberto ata o xoves 13 de novembro ás 14.00 horas. Premendo nesta ligazón pódese acceder ao formulario de inscrición. O curso impartirase o martes, 18 de novembro, de 19.00 a 21.00 horas, no espazo colaborativo A Proa, no Milladoiro e a docente será Fátima Rodríguez (experta en recursos humanos e consultora de estratexia). Está dirixido a empresas de calquera ámbito que teñan a súa sede ou centro de actividade no Concello de Ames.

O Concello de Ames, a través do Servizo de Normalización Lingüística, e maila  Real Academia Galega, abriron este luns a segunda edición do proxecto de investigación-acción Modo galego, actívao! Como novidade, alén de volver involucrar as comunidades educativas dos sete colexios públicos que imparten o segundo ciclo de infantil e primaria amesáns, desta volta chegará tamén ás dúas escolas infantís municipais, que atenden uns douscentos nenos e nenas ata os tres anos de idade, e reforzará a oferta de accións formativas. A experiencia ten como dobre obxectivo estudar e promover o uso da lingua galega entre os nenos e nenas de Ames partindo dos seus principais contextos de socialización: os propiamente escolares, os servizos complementarios, as actividades extraescolares e o contexto familiar. E faino contando coa implicación de todos os axentes involucrados: os educadores e educadoras, o monitorado, o alumnado e os seus proxenitores.

O proxecto de investigación e acción para a promoción do galego na infancia desenvolto colaborativamente entre o Concello de Ames, a Real Academia Galega e os once centros educativos públicos amesáns, foi unha das experiencias premiadas na sexta edición dos Premios Mil Primaveras que se entregaron hoxe no Pazo da Cultura de Pontevedra. Os galardóns recoñeceron outros tres programas que inciden na infancia e na mocidade, favorecen a socialización en galego e potencian a reflexión e a posta en marcha de medidas para asociar a lingua con valores positivos: a canle de vídeos animados Galego para peques, a empresa de deseño e fabricación de xogos de mesa en galego Brazolinda e o programa do CEIP Sagrada Familia da Coruña Vitamina G.