O Concello de Ames está inmerso nunha rolda de contactos coas empresas do sector audiovisual que contan con sede no concello de Ames. Neste caso o alcalde de Ames, Blas García, a concelleira de Promoción Económica, Ana Belén Paz, e mailo técnico de desenvolvemento local, Juan Carlos Carreja, visitaron a empresa Producciones audiovisuales Setemedia SL, que está situada na rúa das Hedras, no parque empresarial Novo Milladoiro. Trátase dunha entidade que se encarga da produción de concertos, actos culturais, retransmisións deportivas, etc. Agora mesmo están producindo o programa da TVG “Malicia Noticias”.

Esta semana o alcalde de Ames, Blas García, a concelleira de Promoción Económica, Ana Belen Paz, o técnico de desenvolvemento local, Juan Carlos Carreja, e mailo responsable da brigada municipal de Obras, Juan Calvo, desprazáronse ata a cidade portuguesa de Porto para visitar a planta de formación que ten a empresa ISQ en dito lugar. Trátase dunha empresa especializada en enerxías renovables, formación e actividades de innovación e I+D. O obxectivo de dita visita foi coñecer como xurdiu a conformación dun espazo adicado especificamente á formación adaptada ás necesidades do persoal da división de produción e instalación, a súa extensión a outras empresas e accións derivadas de formación regrada e o traballo que se realiza nela relacionado co aforro enerxético e enerxías renovables. O Concello de Ames está tratando de poñer en marcha un centro para o impulso e o despregue das enerxías renovables e a eficiencia enerxética.

O Concello de Ames continúa coa rolda de contactos coas empresas do sector audiovisual que teñen instalacións radicadas en Ames. Neste caso o alcalde de Ames, Blas García, e maila concelleira de Promoción Económica, Ana Belén Paz, visitaron as instalacións da empresa Cinemar Films que están situadas na rúa das Palmeiras, no parque empresarial Novo Milladoiro. Durante a visita, Blas García e Ana Belén Paz puideron coñecer as instalacións da produtora e tamén abordaron con Jacobo Peña, administrador da empresa, distintas vías de colaboración de cara ao futuro.

O vindeiro luns, 17 de xaneiro, unha persoa acreditada polo Concello de Ames comezará a visitar as empresas, profesionais e negocios do municipio co obxectivo de dispor de información actualizada de cada un deles para elaborar unha Guía de Empresas. Esta persoa irá identificada cunha credencial do Concello de Ames e cunha carta explicando en que consiste o proceso de recollida de datos. Si se está interesado en formar parte desta guía recolleranse os datos necesarios a incluír, así como unha enquisa anónima e voluntaria, que pulse as achegas a ter en conta na acción de goberno na implantación das actuacións de apoio ao desenvolvemento empresarial, comercial e económico do tecido empresarial amesán. Será unha Guía de Empresas dixital, que estará incluída nunha app do comercio amesá.