A Xunta de Goberno Local vén de aprobar o pasado xoves 30 de decembro de 2021 as bases da campaña Merc@mes, que suporá a volta das tarxetas bono para gastar no comercio e na hostalaría locais. Neste senso, o alcalde de Ames, Blas García, e o presidente da Xuntanza de Empresarios de Ames (XEA), Jorge López, acompañados da concelleira de Promoción Económica, Ana Belén Paz, asinaron o convenio para a subvención destes bonos, aos que o Concello destinará 80.000 euros (75.000 euros para as tarxetas bono e 5.000 euros para a xestión de ditas tarxetas). Do 15 de xaneiro ao 15 de febreiro os establecementos amesás poderán inscribirse na campaña, mentres que tanto as solicitudes de novas tarxetas como as recargas das xa existentes comezarán o 1 de marzo.

O Concello de Ames, a través da Concellaría de Promoción Económica, dá conta de como avanzan os sete proxectos que foron premiados con 10.000 euros cada un dentro do Ames AV LAB, para as actividades de definición e desenvolvemento inicial. Tramoloxía, O Laúro, Dous nichos para Maruja, Nemeto, 42.195 metros, Orquesta Raíña e Serenade foron os sete proxectos premiados. Estes premios, concibidos como capital semente, permitíronlle aos seus creadores avanzar no seu desenvolvemento inicial e atraer novas oportunidades de financiamento. Algúns dos proxectos están en fase de preprodución e busca de financiamento, mentres que outros xa teñen data de gravación.

A comisión de festas de Bertamiráns, en colaboración co Concello de Ames e a Xuntanza de Empresarios de Ames, organiza a primeira festa de Samaín o vindeiro luns, 31 de outubro, co obxectivo de recadar fondos para a celebración das festas de Bertamiráns de 2023. Haberá unha actuación musical para nenos e nenas ás 18.00 horas, da man de Música Miúda, e actuará tamén o grupo Urakán, a partir das 20.30 horas. A festa será no aparcadoiro da Telleira. Entre as persoas que acudan á festa disfrazadas sortearase unha cesta para facer un cocido. Haberá servizo de cantina.

Arrancou a nova edición do Canta con Ames e, despois de dúas xornadas de preselección, unha no Milladoiro e outra en Bertamiráns, xa se coñecen os nomes que pasarán á semifinal do próximo 3 de agosto na praza de Manuel Murguía do Milladoiro. Esta nova edición está a mellorar os rexistros da anterior en canto a asistencia ao evento e participación, pois con respecto ao ano anterior, os participantes aumentaron nun 60%. Preme nesta ligazón para ver a galería de fotos da fase de preselección.