Pestanas principais

Departamento de Normalización Lingüística

    • Enderezo: Pazo da Peregrina. Avenida de Azcárraga, nº 5, Bertamiráns. 15220 Ames.
    • Teléfono:  662 37 72 15
    • Horario de atención ao público: de 9:00 - 14:00 h
    • Responsable municipal: Concellaría de Normalización Lingüística
    • Responsable técnica: Rosa Moreiras Cuñarro, técnica de normalización lingüística
    • Obxectivo principal do servizo:
      • Incrementar o uso e o prestixio da lingua galega en todos os ámbitos municipais.

O Servizo de Normalización Lingüística do Concello de Ames recibe unha subvención anual para gastos de persoal da Deputación da Coruña e outra da Xunta de Galicia.

Outros Datos: 
  • Funcións:
    • Asesorar e colaborar coa planificación lingüística do Concello de Ames
    • Promover actuacións para aumentar o uso do galego no ámbito municipal, de acordo coa normativa vixente, e entre a veciñanza
    • Contribuír á formación lingüística da veciñanza e do persoal municipal
    • Mellorar a calidade lingüística e comunicativa do Concello de Ames
    • Informar e asesorar sobre dereitos lingüísticos da veciñanza e deberes lingüísticos municipais
    • Asesorar sobre cuestións lingüísticas á veciñanza e ao persoal municipal

Novas do departamento

A presentación do mural “Rosalías” centra os actos de celebración do aniversario da poeta en Ames

Nun sinxelo acto, ao pé da casa de Barbazán, foi presentado onte o mural “Rosalías”, unha creación do artista Yoseba Muruzabal que reflicte a contemporaneidade da obra e do pensamento da poeta da Maía. No mesmo acto leuse o Manifesto que nesta ocasión escribiu a escritora, vicepresidenta da AELG e veciña de Ames, Anna Figueirido.  O acto, que foi presentado pola concelleira de Mocidade e Normalización Lingüística, Escarlata Pampín, e que contou coa participación de Anna Figueirido e alumnos e alumnas dos dous institutos de Ames, concluíu cunha regueifa improvisada por Manolo Maseda, profesor de musica do IES de Milladoiro.  Por outra banda, o aniversario da poeta da Maía tivo tamen o seu reflexo nos comedores escolares de Ames onde se serviu o xa tradicional “Caldo de Gloria”, nos farois das rúas máis transitadas do concello que desde a pasada fin de semana engalánanse con lonas poéticas elaboradas a través do proxecto “A luz de Rosalía” e no concurso “Debuxa a túa Rosalía” que organizan as Bibliotecas Municipais.

A primeira Festa do Apego de Ames celebrarase os días 11 e 12 de setembro

Esta mañá o xardín do Pazo da Peregrina, en Bertamiráns, acolleu a presentación da primeira festa do Apego de Ames, que se desenvolverá o venres, 11 de setembro, pola tarde e mais o sábado 12 durante todo o día. A presentación correu a cargo da concelleira de Mocidade e Normalización Lingüística, Escarlata Pampín, e da técnica do Servizo de Normalización Lingüística de Ames, Rosa Moreiras. As actividades desenvolveranse no Pazo da Peregrina e na Casa da Cultura de Bertamiráns. Haberá teatro infantil, contos, cantos de berce, concertos, unha foliada e moitas actividades máis. O impreso de inscrición nas actividades, o cartel e mais a programación da Festa do Apego pódese obter premendo nas ligazóns que están ao pé desta nova.

A programación infantil con Apego do último cuadrimestre do ano inclúe espectáculos de teatro e música, contacontos, maxia e cine

O Concello de Ames acaba de publicar a programación infantil con Apego para os vindeiros catro meses, cunha vintena de iniciativas que se desenvolverán ao longo de setembro, outubro, novembro e decembro. Haberá contancontos nas bibliotecas municipais, unha nova edición da Foliada con Apego, varios espectáculos de teatro, un obradoiro de arrolos con Mama Cabra, outro taller sobre contos de medo con Celso F. Sanmartín, etc. Ademais, nesta programación inclúese unha nova edición do Festival de maxia e do Certame internacional de cine infantil e familiar “Cinema Crianza”.

A programación infantil con Apego presentouse esta mañá no salón de plenos do Concello de Ames

A programación de Apego para os vindeiros meses presentouse hoxe no salón de plenos do Concello. Nela estiveron a concelleira de Normalización Lingüística, Escarlata Pampín, a concelleira de Cultura, Natividade González, e a técnica municipal Rosa Moreiras. Desta volta, a programación vén cunha morea de actividades para os meses de febreiro, marzo, abril e maio. Música, contos, arrolos, teatro, xogos, espectáculos, obradoiros…para que as crianzas e as familias poidan gozar, aprender e socializar.

A programación infantil de Apego deste trimestre comeza de xeito virtual este xoves con “Contos de medo que deixan durmir”

A sesión, que estaba prevista para realizarse na Casa da Cultura do Milladoiro o vindeiro xoves, 29 de outubro, ás 18.00 horas, poderase desfrutar dende calquera dispositivo con pantalla. Deste xeito, non haberá limitacións de aforo pero é imprescindible a inscrición previa antes do mércores 28 enviando un correo a normalizacion@concellodeames.

A quinta edición dos Premios Youtubeiras xa ten gañadoras e gañadores

Olaxonmario, O Son das Ideas, Neeumatiko, Pablo Rodríguez Vila, Toxío, AstroXabi, Cousas RarismASMR, Cousxs, Xacobo de Toro, Recuncho Gamer e Orgullo Galego levan os galardóns deste 2021. Youtubeiras é unha iniciativa organizada polos servizos de Normalización Lingüística dos concellos da Baña, Ames, O Grove, Moaña, Negreira, Pontevedra, Ribadeo, Rianxo, Santiago de Compostela e Teo, das universidades da Coruña, Santiago e Vigo e da Deputación da Coruña.

A RAG amplía a análise da desgaleguización na infancia ao espazo das actividades extraescolares, de conciliación e deportivas

A Real Academia Galega continúa a afondar na análise dos elementos que inflúen no abandono do galego das novas xeracións con investigacións cualitativas que permitan orientar de maneira efectiva as políticas lingüísticas para frear este proceso. O último estudo presentado polo Seminario de Sociolingüística confirma a importancia dos centros educativos, non só na súa faceta pedagóxica, senón tamén como primeiro contacto coa vida pública fóra da familia e contexto principal para a relación dos nenos e nenas cos seus iguais. Pero, ao mesmo tempo, chama tamén a atención sobre outros espazos como os das actividades complementarias e de conciliación e as asociacións e clubs deportivos. Os resultados recóllense no volume Prácticas lingüísticas na infancia. A xestión lingüística nos primeiros contextos de socialización, dispoñible en copia dixital na sección de publicacións de academia.gal.

A RAG e o Concello de Ames poñen en marcha un proxecto piloto para frear o abandono do galego que chegará a 3000 nenos e nenas alén das aulas

Do diagnóstico á acción. A colaboración entre a Real Academia Galega e o Concello de Ames en materia de lingua e infancia e mocidade continuará nos vindeiros meses co desenvolvemento dun proxecto colaborativo que porá en marcha iniciativas de dinamización lingüística alén das aulas. Modo galego, actívao! chegará aos arredor de 3000 nenos e nenas do segundo ciclo de infantil e de primaria escolarizados nos sete centros educativos que imparten estas etapas no que é o maior termo municipal da zona periurbana da comarca compostelá. Como aconteceu na investigación que permitiu trazar o mapa sociolingüístico escolar do concello, as accións implicarán non só o día a día nas escolas, tamén as actividades extraescolares, de lecer, tempo libre e conciliación familiar xestionadas a través da administración local, que constitúen espazos de socialización de crecente importancia en múltiplos planos, tamén no que atinxe ao comportamento lingüístico.

A RAG edita unha guía para o plurilingüismo inclusivo dende o galego

A Real Academia Galega presentou este luns, 6 de xuño, Ideas para un plurilingüismo dende o galego no Concello de Ames, unha guía que pretende contribuír á reflexión sobre a situación sociolingüística, ofrece aclaracións conceptuais sobre o tema que aborda e propón estratexias de cara á planificación nos centros educativos dende a premisa do ecolingüismo como “unha aposta ética e unha opción viable”. A publicación avoga así por construír a partir do galego un plurilingüismo inclusivo, que non se limite a unha visión instrumental centrada exclusivamente na competencia en varios idiomas e que reforce tamén o respecto pola diversidade cultural.

A rapazada de Ames canta e baila ao ritmo de Uxía Lambona e a Banda Molona, A Gramola Gominola e As Maianas no festival Modo Galego, actívao!

A explanada do pavillón de deportes de Bertamiráns acolleu este venres, 17 de abril, o festival de música infantil, Modo Galego, actívao! onde se xuntaron centos de rapaces e rapazas xunto as súas familias, para cantar e bailar co grupo de música tradicional amesá As Mainas, e con dúas das bandas máis potentes do panorama da música infantil en galego: A Gramola Gominola e Uxía Lambona e a Banda Molona. Con esta gran festa pechouse a cuarta edición deste programa que está organizado polo Concello de Ames e a Real Academia Galega, en colaboración coa Xunta de Galicia.

Eventos del departamento

> Gala dos Premios Lingua e Empresa

O Concello de Ames, a través do departamento de Normalización Lingüística, organiza un ano máis os Premios Lingua e Empresa, que promoven o uso da lingua galega no ámbito empresarial local. Nesta ocasión triplicouse a participación con respecto a edicións anteriores, e foron 26 as empresas de distintos lugares do municipio que se presentaron a esta convocatoria. Dúas delas recoñeceranse con premios de 1500 euros e unha campaña publicitaria en Ames Radio, a emisora municipal.

> Gala homenaxe a Rosalía de Castro

O sábado 25 de febreiro, a partir das 19:00 horas, terá lugar a gala de homenaxe a Rosalía de Castro organizada polo Concello de Ames, na Casa da Cultura de Bertamiráns. Contará coa presentación da xornalista Esther Estévez e coa actuación de Najla Shami. Ademais, participarán tamén os centros educativos de infantil, primaria e secundaria.

> III Festa do Apego

O Concello de Ames, a través da Concellaría de Normalización Lingüística, organiza a terceira Festa do Apego de Ames, que se celebrará o sábado 18 de xuño. As actividades desenvolveranse no Pazo da Peregrina. Se chove, as actividades trasladaranse á Casa da Cultura de Bertamiráns. Haberá contos, música, xogos e moitos máis recursos para gozar coa e desde a lingua. Ademais, as librarías municipais, Lenda e Máinomen, en Bertamiráns,  e Nenos Nais, no Milladoiro, ofrecerán un 10% de desconto en materiais infantís en galego durante toda a xornada. O prazo de inscrición para as actividades estará aberto dende o 9 ao 16 de xuño. As reservas realizaranse enviando un correo ao enderezo normalizacion@concellodeames.gal indicando as actividades ás que se quere asistir, nome e apelidos das persoas solicitantes, idade das crianzas e teléfono de contacto.

> IV Festa do Apego

O Concello de Ames, a través da Concellaría de Normalización Lingüística, organiza a cuarta Festa do Apego, que terá lugar o sábado, 6 de maio, no Pazo da Peregrina ou na Casa da Cultura de Bertamiráns, dependendo da meteoroloxía. En caso de que chova as actividades trasladaranse ao centro sociocultural. Pola contra, se non chove, a programación manterase segundo o previsto no Pazo da Peregrina. Haberá contos, xogos, música, monicreques, obradoiros, espazos de recursos e moitas máis actividades. A entrada será libre e de balde. As prazas de cada unha das actividades iranse cubrindo por orde de chegada dos usuarios e usuarias. Premendo nesta ligazón podes ver un vídeo coa programación da Festa do Apego de Ames.

> Presentación do libro do XIX Certame Literario do Concello de Ames

Os departamentos de Normalización Lingüística e de Bibliotecas de Ames organizan, con motivo da celebración do Día do Libro, o acto de presentación do libro do XIX Certame Literario do Concello de Ames. Terá lugar o sábado 22, ás 19:30, no auditorio da Casa da Cultura de Bertamiráns. 

> Seráns de Ames: Foliada con Apego

Os Seráns de Ames continúan en Tapia cunha nova edición da Foliada con Apego, unha actividade chea de música para compartir, cantar, bailar, aprender cancións galegas e pasalo ben. Será o xoves 18 de agosto, ás 19:30 horas, coa actuación de Pablo Díaz e Olga Kirk.

> Sesión virtual do programa Apego con “Contos de medo que deixan durmir”

“Contos de medo que deixan durmir”, a primeira das actividades propostas polo programa Apego para este trimestre, desenvolverase de xeito virtual por mor da loita contra a pandemia da Covid19.
A sesión corre a cargo de Caxoto contacontos.
Non hai limitacións de aforo. Porén, hai que inscribirse previamente enviando un correo electrónico ao enderezo normalizacion@concellodeames.gal ou chamando por teléfono ao 662 377 2175.  

O prazo para inscribirse remata o mércores, 28 ás 14:00 horas. 

Logo, entre as 17 e as 21 do xoves, 28 de outubro, calquera persoa que o desexe e que estea previamente inscrita poderá premer na ligazón que se lle envíe e acceder ao contacontos.

> Teatro: "Rosalía"

A Casa da Cultura de Bertamiráns acolle a representación de "Rosalía", unha aproximación á vida e a obra da maior figura da literatura galega, que busca contarlle á cativada que a infancia é o lugar onde medran os poetas e as poetisas. A obra teatral terá lugar o xoves 17 de febreiro, ás 18:00 horas, dentro da programación do mes de Rosalía. Os convites, de balde, poden retirarse xa na Billeteira electrónica do Concello de Ames. Colaboran a Rede de Dinamización Lingüística da Xunta de Galicia e o Servizo de Normalización Lingüística de Ames.

> Teatro: Baby Esferic

Baby Esferic, de Aboon Teatre, pasará o día 6 de outubro polo auditorio do Milladoiro. Realizaranse dous pases, ás 18:00 e ás 19:00 horas. O aforo será de 80 persoas por pase. Trátase dunha representación enfocada a crianzas de entre 6 meses e 3 anos, un espectáculo innovador de linguaxe visual que busca espertar a imaxinación de grandes e pequenos. Os espectadores gozarán dunha viaxe con simpáticos habitantes esféricos que lles amosarán a maxia da terra, a ritmo de bebé. Premendo nesta ligazón podes consultar o dossier da obra ao completo. Tras a representación, que dura arredor de 30 minutos, as familias poderán gozar de 15 minutos de interacción e xogo coas personaxes. Os convites son de balde e pódense descargar na Billeteira electrónica do Concello de Ames. 

> Visita do Apalpador

O Apalpador volve a visitar Ames da man do programa Apego. Con Anxo Moure e a Banda da Montaña o Nadal chega cargado de contos, cantos e agasallos máxicos nacidos na Serra do Courel. O Apalpador tamén recollerá as cartas que os nenos e nenas lle queiran deixar. A actividade está dirixida ao público familiar e é de balde. A inscrición pódese facer do 5 ao 14 de decembro enviando un correo electrónico ao enderezo normalizacion@concellodeames.gal.