O espazo colaborativo A Proa, no Milladoiro, acolleu este luns a presentación dos quince proxectos seleccionados para formar parte do Ames AV LAB, o laboratorio amesán para impulsar a nova produción audiovisual. No acto, ao que acudiron representantes do Concello de Ames e de dúas empresas integrantes das comisións de Gobernanza e Avaliación, presentáronse os proxectos seleccionados e o cronograma que se seguirá durante os oito meses de traballo.

A empresa de xoiería artesanal galega, Silvereira, cumpre un cuarto de século a finais deste ano 2025. O alcalde, Blas García, visitou xunto á concelleira de Promoción Económica e o concelleiro de Obras e Servizos básicos ás instalacións da empresa amesá, situadas en Raíces, parroquia de Biduído. Juan Lamas e Marta Ares acompañáronos polo taller e explicáronlle os procesos que seguen para a fabricación das distintas pezas. Ambos destacaron a importancia da modernización dos procesos de fabricación para optimizar recursos e tempo e, deste xeito, ser competitivos.

A Concellaría de Promoción Económica informa de que a campaña de tarxetas bono Ames Progresa remata o vindeiro sábado 30 de abril. Ata ese día poderanse empregar as devanditas tarxetas para facer compras nos 219 establecementos adheridos á campaña. Ata este momento realizáronse 4.677 operacións  o que xerou un volume de negocio de 101.252,60 euros. O saldo restante nas tarxetas ascende a 26.347,40 euros. Nesta campaña están en circulación un total de 1.611 tarxetas (940 de 100 euros e 671 de 50 euros), o que supón un volume de negocio total de 127.550 euros. É importante consumir o saldo das tarxetas ata o 30 de abril, xa que non se devolverá o importe dos bonos unha vez rematada a campaña. Os saldos das tarxetas poderán consultarse na páxina web www.damemisaldo.com.

Melchor, Gaspar e Baltasar van pasar tres días no concello de Ames escoitando os desexos da cativada e enchendo a vila de maxia e ilusión. A Gran Festa de Reis comeza este martes cunha recepción dos Reis. Os Magos de Oriente estarán nos pavillóns de Bertamiráns e do Milladoiro ao longo do martes 3 e do mércores 4 atendendo as peticións dos nenos e das nenas amesás. Poden reservar a súa cita accedendo á Sede electrónica do Concello de Ames.  O xoves, pola mañá, as súas maxestades visitarán as parroquias do concello para espallar a súa maxia por todos os recunchos do concello. Xa pola tarde percorrerán coas súas cabalgatas as rúas do Milladoiro e de Bertamiráns. O fin de festa reunirá a pequenos e maiores nos pavillóns municipais para despedir aos Magos de Oriente e gozar dunha merenda e dunha actuación musical.