Pestanas principais

Departamento de urbanismo

    • Enderezo: Alcalde Lorenzo, nº 2, Bertamiráns.
    • Teléfono: 981 88 30 02
    • Horario de atención ao público:
        • De luns a venres, en horario das 9:00 ás 14:00 horas.
    •  Responsable municipal: Concellaría de Urbanismo
Outros Datos: 

Novas do departamento

Ames prepara unha ordenanza para regular e concienciar á cidadanía sobre o cumprimento do deber de limpeza de parcelas tanto no solo urbano como no rural

As ordes de execución para a conservación dos cerrados en condicións de seguridade e limpeza de parcelas, supoñen o 70% do traballo dos servizos disciplinarios de urbanismo. Asemade, o 30% dos expedientes de reposición da legalidade urbanística que se tramitaron no concello de Ames no ano 2020, tanto de oficio como a instancia da veciñanza, correspóndense con peches vexetais que incumpren as alturas máximas permitidas por falta de mantemento. O Concello prepara unha ordenanza para regular e concienciar á cidadanía sobre o cumprimento do deber de limpeza de parcelas tanto no solo urbano como no rural. Ao mesmo tempo, inicia unha campaña de cumprimento do mantemento dos peches vexetais para que non superen os 2 metros de altura.

Apróbase a licenza para a construción de nove naves no parque empresarial do Milladoiro

A Xunta de Goberno Local concedeulle a Santiago Sur Galicia SL licenza de edificación de nove naves no parque empresarial do Milladoiro. Concretamente a parcela, que foi segregada previamente, está situada na intersección da rúa Oliveira coa rúa das Palmeiras. En total vanse edificar máis de 5.600 m2 de superficie. Unha obra que ascende a preto de 1.500.000 euros. O outorgamento desta licenza supón un novo impulso ao parque empresarial do Novo Milladoiro despois da concesión de licenza para a construción dun hotel de 82 habitacións.

Apróbase o cambio de titularidade dunha licenza de obra para a construción de 41 vivendas en Ventosa

A Xunta de Goberno Local vén de aprobar o cambio de titularidade dunha licenza de obra concedida en 2007 para a construción de 91 vivendas unifamiliares no sector S-02, Aspra do Vento, en Ventosa. Dito cambio de titularidade fíxose a favor da entidade Inmogalicia Real Estate SL. Ademais, esta mesma entidade presentou a renuncia parcial á licenza, concretamente respecto da construción das vivendas previstas nas parcelas 1P a 45P, 53P a 60P, 12A1 e 12A2 (50 vivendas). Deste xeito, está previsto que dita entidade inmobiliaria constrúa en Ventosa un total de 41 vivendas.

Apróbase unha instrución para a continuación dos prazos administrativos nos procedementos urbanísticos de licenzas e comunicacións previas

O goberno municipal, a través de decreto de Alcaldía, vén de aprobar unha instrución para a continuación dos prazos administrativos nos procedementos urbanísticos de licenzas e comunicacións previas asociadas ao desenvolvemento de actividades permitidas no marco actual do estado de alarma, intervención e disciplina urbanística. Dita instrución é unha interpretación da disposición adicional terceira do Real Decreto 463/2020, do 14 de marzo, polo que se declara o estado de alarma para a xestión da situación de crise sanitaria ocasionada pola COVID-19. Esta disposición establece a suspensión de termos e interrupción de prazos na tramitación dos procedementos das entidades do sector público, e polo tanto, das administracións locais.

Asínase un convenio con ARECAFÉ para a recollida selectiva de cápsulas de café e a súa correcta xestión

O Concello de Ames vén de asinar un convenio de colaboración con  ARECAFÉ (Alianza para a reciclaxe de cápsulas de café) co obxectivo de poder recoller de forma separada as cápsulas de café de calquera marca, tanto de aluminio como de plástico. Ames é o primeiro concello de Galicia en asinar este convenio e en implantar un sistema de recollida selectiva deste tipo de residuos. Preténdese facer unha correcta xestión destes materiais de plástico e aluminio para a súa reciclaxe.

Avanzan os traballos de humanización do entorno das rúas Madalena, Estivada de Castelao e das Camelias, no Milladoiro

O alcalde de Ames, Blas García, e o concelleiro de Obras e Servizos Básicos, Gustavo Nieto, achegáronse esta mañá ata O Milladoiro para comprobar o estado das obras de derribo do inmoble situado no número 6 da rúa da Madalena, para constatar o avance dos traballos de demolición do mesmo e retirada de escombro. Ademais, este luns 17 de novembro asinouse o contrato para retomar as obras do centro multifuncional do Milladoiro, que foi adxudicado á empresa Iglesias Mera por un importe de 1.097.687,03 euros. As obras deste proxecto comezarán nas vindeiras semanas, mentres que os traballos da humanización na avenida de Rosalía de Castro encaran o seu tramo final.

Avánzase na elaboración do regulamento de terrazas e elementos comerciais

Este mércores, 30 de setembro, realizouse unha xuntanza no salón de plenos da Casa do Concello, para avanzar na elaboración do regulamento de terrazas e elementos comerciais. Neste encontro participaron membros do Goberno municipal, representantes da Asociación de hostalería de Santiago de Compostela e comarca, representantes da hostalería de Bertamiráns e do Milladoiro, así como membros da Xuntanza de Empresarios de Ames. Tras un período para presentar achegas ao borrador do regulamento de terrazas e elementos comerciais, presentáronse 70 solicitudes de cambio, das cales o 60% foron aceptadas. Nesta xuntanza foron abordándose todas as solicitudes de cambio que se achegaron e explicando o motivo da súa aceptación ou denegación. Tanto os membros do Goberno municipal como os representantes do sector hostaleiro saíron satisfeitos da reunión.

Durante a noite de San Xoán arderán 229 cacharelas no concello de Ames

Achégase a noite máis longa do ano, o 23 de xuño, a véspera de San Xoán. E como manda a tradición esta festividade celébrase saltando as tan típicas cacharelas e comendo a sardiñada que soe acompañar. Este ano concedéronse un total de 229 permisos para realizar cacharelas na noite do 23 de xuño. Está previsto que haxa 209 en parcelas privadas do rural e da zona urbana e 20 en espazos públicos. A separación entre as cacharelas, edificios, árbores, vehículos e mobiliario urbano serán como mínimo de 12 metros, agás no casco urbano. Ademais, as persoas responsables de cada lumieira deberán vixiar o lume ata a total extinción do mesmo e ter a man os teléfonos da Policía Local, Protección Civil e Emerxencias. Preme nesta ligazón para descargar o bando coas normas para realizar cacharelas no San Xoán.

Inícianse os estudos do proxecto de humanización da N-550 ao seu paso polo núcleo urbano do Milladoiro

O Concello de Ames vén de iniciar os trámites para a realización dun proxecto de humanización da avenida de Rosalía de Castro (N-550), no núcleo urbano do Milladoiro. Ditos traballos foron contratados á empresa INOR (Ingeniería del Noroeste) de Santiago de Compostela. Esta empresa foi a que presentou a mellor oferta económica entre as tres propostas solicitadas pola Concellaría de Urbanismo no pasado mes de decembro.

O alcalde de Ames e a xerente de Suelo Empresarial del Atlántico abordan a situación do terreo industrial do municipio e as posibilidades de colaboración

A xerente de Suelo Empresarial del Atlántico, S.L., Beatriz Sestayo, a pedimento do alcalde de Ames, José Miñones, desprazouse esta mañá á Bertamiráns para manter un encontro co rexedor e coa concelleira de Promoción Económica e Emprego, Ana Belén Paz, no que tamén participou o responsable comercial de SEA, José Rey. O Concello vai poñer en marcha o Plan estratéxico empresarial 20-30, que realizará un estudio preliminar sobre a situación preexistente, realizando a continuación unha análise cuantitativa do tecido empresarial-comercial, de cara a rematar coas propostas de ámbitos industriais e empresariais a delimitar dentro do municipio.