Os escaparates de varios comercios de Bertamiráns e do Milladoiro converteranse por unhas horas no escenario onde o grupo Chévere amosará varias das súas creacións teatrais. As actuacións desta compañía, que conta entre outros co Premio Nacional de Teatro, terán lugar na tarde do venres 17 de xullo en Milladoiro, e na mañá e na tarde do sábado 18 en Bertamiráns. Cambio de tempada, Bailaríns pendurados, Tres Tenores, Pernas e Telesaúde son os títulos das cinco pezas breves que conformarán o repertorio da proposta. Co obxectivo de favorecer os grupos reducidos e renovar o público constantemente, faranse dous, tres e até catro pases de cada peza. A iniciativa forma parte do programa AmesON, encadrado no Plan Reactiva Ames, co que o Concello pretende dinamizar a cultura e a economía do municipio. Ao abeiro desta iniciativa, os establecementos comerciais de Ames poderán ampliar os seu horario de peche até ás doce da noite, sempre e cando cumpran a normativa de horarios e condicións laborais.

Do 12 ao 15 de novembro de 2026, o Concello de Ames volverá converterse nun punto de encontro internacional para o cinema infantil coa celebración da novena edición do Festival Internacional de Cinema Infantil Cinema Miúdo. O certame, organizado polo Concello de Ames, abre desde hoxe a convocatoria para a recepción de curtametraxes que formarán parte da súa programación oficial. Premendo nesta ligazón podes ver o vídeo resumo da edición de 2025.

Entre o 16 e o 19 de novembro as nenas e nenos de Ames e do resto de Galicia teñen unha cita co mellor do cinema infantil producido no mundo no último ano. Isto é grazas á celebración de Cinema Miúdo, o festival do sétimo arte especialmente dirixido á cativada, no que a proxección de curtametraxes combínase con obradoiros creativos, actividades para escolas, sesións especiais e actuacións de música, circo e maxia. Cómpre destacar que xa está aberta a inscrición gratuíta para o obradoiro Make a Remake, de creación de dioramas. Para inscribirse hai que enviar un correo electrónico ao enderezo actividades@cinemamiudo.gal indicando nome, idade e teléfono. Cinema Miúdo está adherido ao Pacto Cultura Sustentable. Premendo nesa ligazón podes descargar o folleto informativo cos horarios e actividades do festival Cinema Miúdo. O abono para asistir ao festival ten un prezo de 3 euros e pode adquirirse na Billeteira electrónica.

A oitava edición de Cinema Miúdo celebrouse do 13 ao 16 de novembro cun programa que combinou proxeccións internacionais, obradoiros creativos e actividades orientadas a reforzar a educación en valores a través do cinema. O festival presentou unha selección de nove bloques de curtametraxes procedentes de 21 países, incluíu sesións específicas para público escolar e abriu espazo para a reflexión mediante dúas propostas especiais baixo o título Cinema en Valores. Premendo nesta ligazón podes acceder á galería de imaxes do Festival Internacional de Cinema Infantil Cinema Miúdo.