Pestanas principais

Departamento de Secretaría e Administración Xeral

    • Enderezo: Praza do Concello, nº 2, Bertamiráns.
    • Teléfono: 981 88 30 02
    • Horario de atención ao público: de 9:00-14:00 horas.
    • Responsable municipal: Concellaría de Administración Xeral.
    • Responsable técnico: María Ofir Aboy García, técnica de secretaría.
    • Estrutura do servizo: Secretaría, Técnica de Secretaría, 3 Auxiliares Administrativos.
Outros Datos: 
  • Funcións:
    • Asesoría xurídica do Concello
    • Informar e asesorar sobre os asuntos plenarios. Conformación dos plenos e comisións, xuntas de goberno
    • Levantar acta das sesións dos órganos colexiados
    • Certificación dos actos ou resolucións da Presidencia e os acordos dos órganos colexiados decisorios, así como dos antecedentes, libros e documentos do Concello.
    • Remitir á Administración do Estado e á Comunidade Autónoma, nos prazos e formas determinados reglamentariamente, copia ou, no seu caso, extracto dos actos e acordos dos órganos decisorios da Corporación, tanto colexiados como unipersonais.
    • Levar e custodiar o Rexistro de Intereses dos membros da Corporación e o Inventario de Bens.
    • Acompañar ao Alcalde-Presidente ou membros da Corporación nos actos de sinatura de contratos ou escrituras.
    • Xestión da área de contratación. Realización do Plan de contratación semestral.
    • Xestión dos RRHH do Concello de Ames.
  • Bolsas de traballo
  • Procesos selectivos
  • Perosal Municipal
  • Novas relacionadas
  • Axenda.

Novas do departamento

O Pleno aproba o proxecto de mellora da rede de evacuación de augas pluviais no parque empresarial Novo Milladoiro no que se investirán 150.000 euros

A Corporación municipal aprobou por unanimidade a maior parte dos puntos debatidos no pleno ordinario de xuño. Deste xeito, saíu adiante por unanimidade o proxecto de mellora do camiño de Quintáns e outro incluído no Plan Camiña Rural 2025-2026; o proxecto refundido de mellora da rede de evacuación de augas pluviais no parque empresarial Novo Milladoiro; as segundas prórrogas dos servizos de monitores/as e persoal na Rede de comedores escolares e Tardes divertidas; e a primeira prórroga dos servizos de limpeza nos centros de educación infantil, primaria e escolas unitarias; escolas infantís; e instalacións de uso municipal. Tamén saíu adiante por maioría simple a aprobación inicial da ordenanza municipal reguladora de actos de benvida social; a décimo terceira modificación da RPT; e a modificación dos cadros de persoal debido a dita modificación da RPT. Ademais, aprobouse por unanimidade unha moción do grupo municipal do BNG para unhas festas máis inclusivas e sostibles en Ames; e foi rexeitada unha moción do grupo do Partido Popular en defensa do estado democrático e de dereito e en repulsa da corrupción que afecta a contorna persoal e política de Pedro Sánchez, presidente do Goberno de España. Podes ver a gravación do pleno na canle de Youtube do Concello de Ames.

O Pleno aproba o proxecto técnico de mellora do viario de acceso ao polígono do Milladoiro dende a estrada Ventín-Coira

Este martes, 30 de xullo, realizouse o pleno ordinario do mes de xullo no que a Corporación municipal aprobou o proxecto técnico de mellora do viario de acceso ao polígono do Milladoiro dende a estrada Ventín-Coira. Outros temas que se aprobaron foron a modificación do anexo de investimentos do orzamento municipal de 2019; e a autorización de compatibilidade para o exercicio de actividade privada de Pilar Martínez Jiménez, María del Carmen Giadáns Dopazo e Amaury Quintero Consuegra. Ademais, aprobáronse as dietas por asistencias a órganos complementarios e maila aprobación inicial da modificación da base de execución 41 do orzamento municipal.

O Pleno aproba o proxecto técnico para a mellora do firme do tramo urbano da avenida da Maía, en Bertamiráns

Este xoves, 24 de setembro, o Concello de Ames celebrou unha nova sesión plenaria, neste caso a ordinaria do mes de setembro. En dito pleno a Corporación municipal deulle aprobación por unanimidade ao proxecto técnico para a mellora do firme do tramo urbano da avenida da Maía, en Bertamiráns. Informouse da liquidación do exercicio 2019 que amosa un remanente de tesourería de 9.250.000€, un resultado orzamentario axustado de 2.400.000€ e un superávit de 1.270.000€. Ademais, aprobouse por unanimidade a constitución da Asociación de concellos da Ruta Rosaliana “As Pegadas de Rosalía”; a gratuidade das cotas dos segundos fillos/as e sucesivos nas escolas infantís municipais; a segunda modificación das bases de execución do Orzamento de 2020; e unha proposta presentada polo concelleiro José Ramón Oulego para rexeitar o transfuguismo como práctica de corrupción política. Tamén se aprobou por maioría absoluta a afectación durante 10 anos do local adquirido para coworking e unha proposta presentada polo grupo municipal socialista sobre o sobrecuste dos gastos de limpeza e desinfección dos centros educativos de titularidade autonómica para os Concellos.

O Pleno aproba o regulamento e o prezo público das escolas infantís municipais

A Corporación municipal aprobou por unanimidade a ratificación do decreto de aprobación do proxecto modificado relativo ás obras de pavimentación de viarios na aldea de Villaverde, en Piñeiro, pertencente ao POS+ 2024; o nomeamento da secretaria do Consello sectorial da Cultura; a adhesión xenérica á central de contratación do Estado; a rectificación do Inventario Municipal 2024; a aprobación inicial da modificación do regulamento de réxime interior das escolas infantís municipais O Bosque e A Madalena; e a aprobación do convenio de colaboración entre o Consorcio Galego de Servizos de Igualdade e Benestar e o Concello de Ames para o desenvolvemento do programa Xantar na Casa. Tamén se aprobou por maioría a aprobación inicial da modificación da ordenanza reguladora do prezo publico pola prestación do servizo das escolas infantís municipais. Por último, rexeitouse unha moción política do grupo municipal popular sobre a normativa dos galiñeiros de autoconsumo. Podes ver a gravación do pleno na canle de Youtube do Concello de Ames.

O Pleno aproba os anteproxectos de construción do complexo deportivo do Milladoiro e de mellora do centro deportivo da Telleira

A Corporación municipal aprobou por maioría absoluta a aprobación dos anteproxectos técnicos, tanto do novo complexo deportivo do Milladoiro como para a mellora da piscina municipal A Telleira de Bertamiráns. Aprobouse por unanimidade o inicio de expediente para a elección de xuíz/a de paz substituto/a; a sétima rectificación do inventario municipal; o convenio do proxecto Compostela Rupestre; e o inicio do segundo expediente de resolución do contrato do servizo de axuda no fogar. Tamén foi aprobado por maioría absoluta a resolución de recursos de reposición presentados fronte ao acordo plenario de resolución de alegacións e aprobación definitiva da décimo segunda modificación da RPT; e a aprobación inicial da modificación do regulamento do programa Xantar na Casa. Ademais aprobáronse dúas mocións presentadas polo BNG sobre a situación da Escola Infantil Merlín e a celebración do ano Castelao 2025 en Ames; así como unha declaración institucional, presentada polo grupo socialista, sobre a mellora da seguridade viaria da AC-544. Podes ver a gravación do pleno na canle de Youtube do Concello de Ames.

O Pleno aproba os proxectos que se sufragarán con cargo ao POS+ 2020 e maila Conta Xeral de 2018

Este mércores, 18 de decembro, celebrouse un pleno extraordinario no que a Corporación municipal aprobou a participación do Concello de Ames no Plan provincial de cooperación ás obras e servizos de competencia municipal (Plan único de concello) “POS+ 2020” da Deputación provincial da Coruña. O Concello de Ames disporá de 1.021.278,10€, dos cales 150.000€ serán para o financiamento de gastos correntes e 871.278,10€ para facer novos investimentos, moitos deles inciden na mellora e/ou reparación de distintas vías públicas municipais e camiños interiores de aldeas. Ademais, aprobouse por unanimidade a Conta Xeral de 2018, que arroxa un superávit de 3.788.387,33 euros e un remanente de tesourería positivo de 8.448.782,88 euros, cun nivel de débeda viva dun 7,81% (límite 110%), polo tanto cumprindo os obxectivos de estabilidade orzamentaria e débeda pública.

O Pleno aproba por unanimidade a adxudicación do Servizo de Axuda no Fogar

Este xoves, 23 de febreiro, celebrouse o pleno ordinario correspondente ao mes de febreiro. En dita sesión plenaria a Corporación municipal aprobou por unanimidade todos os puntos recollidos no apartado de deliberación e acordo. Deste xeito aprobouse a adxudicación do Servizo de Axuda no Fogar; a modificación do anexo de investimentos e bases de execución do orzamento 2023 para incluír as obras de saneamento e abastecemento no núcleo de Lens; e mailo Plan estratéxico de subvencións do Concello de Ames correspondente ao período 2023-2025. Premendo nesta ligazón podes ver a  gravación do pleno ordinario de febreiro.

O Pleno aproba por unanimidade a adxudicación do Servizo de Axuda no Fogar no Concello de Ames

Este xoves, 25 de xuño, retomáronse os plenos presenciais despois de tres meses realizando plenos de forma telemática debido ao estado de alarma declarado polo Goberno do Estado. Para poder cumprir as medidas de distancia de seguridade o pleno desenvolveuse no auditorio da Casa da Cultura de Bertamiráns. En dita sesión plenaria a Corporación municipal aprobou a adxudicación do Servizo de Axuda no Fogar; a incorporación do local adquirido para o coworking ao inventario municipal de bens; a aprobación definitiva do estudio de detalle das parcelas R4 e R5 do ámbito de solo urbano non consolidado PB7-04 “Rego dos Pasos Sur II” do PXOM; a modificación de data de desconexión da sede electrónica da Deputación provincial da Coruña; a ratificación de dous decretos de Alcaldía; tres propostas presentadas polos grupos municipais socialista e do BNG e unha moción presentada polo grupo municipal popular.

O Pleno aproba por unanimidade a adxudicación do servizo de limpeza viaria e xestión de puntos limpos do Concello de Ames

Este xoves, 27 de xaneiro, celebrouse a sesión ordinaria do pleno de xaneiro no que a Corporación municipal aprobou por unanimidade a adxudicación do expediente de licitación do servizo de limpeza viaria e xestión de puntos limpos. Ademais, aprobouse  por unanimidade a modificación do sistema de prórrogas do contrato asinado con Servizos Sociais Ulla Sar SL, para a prestación do servizo de axuda no fogar, e maila primeira prórroga do contrato deste servizo por un prazo de 6 meses. Os seguintes puntos tamén foron aprobados por unanimidade: a adhesión á declaración de Valladolid sobre o compromiso das cidades pola economía circular; a adhesión á Rede de Cidades e Comunidades Amigables coas Persoas Maiores; e a ratificación do acordo adoptado pola Xunta de Goberno Local de desistir do expediente de licitación de servizo de limpeza integral nas instalacións municipais e centros educativos. Aprobouse de xeito inicial, cos votos a favor do Goberno e dos concelleiros do grupo mixto, o Regulamento da política de seguridade da información do Concello de Ames. Por último, rexeitouse a proposta presentada polo grupo municipal popular para o cesamento do ministro de consumo polos seus ataques á gandería e ao sector cárnico español, e aprobouse por unanimidade unha moción sobre a mellora do paseo fluvial de Bertamiráns.

O Pleno aproba por unanimidade a bonificación do ICIO para a construción do novo CEIP do Milladoiro

A Corporación municipal aprobou por unanimidade, no pleno ordinario de outubro, a declaración de especial interese ou utilidade municipal das obras de construción do novo CEIP do Milladoiro para bonificar a cota do ICIO. Ademais, déuselle luz verde á resolución de alegacións e aprobación definitiva do regulamento para a xestión do servizo do Ciclo Integral da Auga, á aprobación inicial da ordenanza reguladora das prestacións patrimoniais de carácter público non tributario pola prestación dos servizos que conforman o Ciclo Integral da Agua, e á aprobación inicial da modificación da ordenanza fiscal reguladora da taxa pola prestación do Servizo de Axuda no Fogar. Tamén se aprobou a segunda modificación do plan estratéxico de subvencións para o período 2023-2025, a revisión do prezo do contrato de concesión da xestión e mantemento do centro deportivo municipal A Telleira, a aprobación inicial da modificación da ordenanza reguladora do prezo publico pola utilización do centro deportivo municipal A Telleira, e a corrección de erros na modificación do lote 3 do contrato do servizo de limpeza nas instalacións de uso municipal. Por último, aprobouse por unanimidade unha moción presentada polo grupo Espazo Común solicitando a convocatoria e resolución das subvencións para as asociacións no primeiro trimestre de cada ano, así como unha declaración institucional de todos os grupos políticos de apoio á mellora do transporte metropolitano. Podes ver a gravación do pleno na canle de Youtube do Concello de Ames.

Eventos del departamento

> Pleno ordinario xullo 2023

Este xoves, día 27, o Concello de Ames celebrará o pleno ordinario correspondente ao mes de xullo.

Pleno de investidura

Este sábado, 15 de xuño, celébrase o primeiro pleno do mandato 2019-2023 no que se desenvolverá o acto de investidura. O pleno de constitución da nova Corporación desenvolverase dende as 12:00 horas no auditorio da Casa da Cultura de Bertamiráns. Os concelleiros e concelleiras prometerán o seu cargo e será elixido o alcalde. Os 21 concelleiros/as terán que facer unha votación nominal na que cada edil terá que votar por algún dos candidatos á Alcaldía.

Xuntanza de Portavoces

A Casa do Concello acolle a xuntanza de portavoces a partir das 14.00h este xoves, 11 de xullo.