Pestanas principais

Departamento de Deportes

    • Enderezo: Praza do Concello, nº 2, Bertamiráns.
    • Teléfono:  981 88 30 02 / 619 84 25 04
    • Horario de atención ao público:
      • De luns a venres, en horario das 9:00 ás 14:00 horas.
    • Responsable municipal: Concellaría de Deportes
    • Responsable técnico: Alberto Viaño Moure.
Outros Datos: 
  • Programación escolas deportivas 2023-2024
  • Funcions:
    • Deseñar proxectos deportivos: escolas deportivas, eventos deportivos...
    • Planificar e xestionar programas deportivos e elaborar estratexias de funcionamento.
    • Incentivar a participación cidadá tanto nas actividades como na creación deportiva.
    • Asesorar e informar aos grupos e entidades deportivas do concello, así como ao público en xeral.
    • Colaborar nas programacións da Deputación: Campaña de esqui, campamentos deportivos, circuíto de carreiras populares...
    • Xestionar as subvencións correspondente á área de deportes, ben sexan as da Deputación ou as convocatorias propias do Concello de Ames de apoio ás asociacións deportivas e clubs.
    • Xestionar as instalacións deportivas municipais (pavillóns polideportivos, campos de fútbol e piscinas descubertas municipais).
  • Normativa:
  • Novas relacionadas
  • Axenda

Novas do departamento

Diego Álvarez e Sofía Da Silva gañan a segunda proba do circuíto Transgalaica 2023 que se disputou en Ames

O Club de ciclismo amesán Os Esfola Arrós e a empresa Team Relay, coa colaboración do Concello de Ames, organizaron este domingo, 12 de marzo, a segunda proba do circuíto Transgalaica 2023. Foi a sétima ocasión na que o concello acolleu esta cita, unha das máis importantes do ciclismo no noroeste español. Dende 2016 organízase esta proba do circuíto Transgalaica en Ames. En 2021 non se puido realizar debido a situación epidemiolóxica derivada da Covid-19. Nesta edición inscribíronse 296 ciclistas que tiñan que percorrer unha distancia de 64,31 quilómetros. Finalizaron a proba 232 ciclistas e houbo 38 abandonos. Ademais, 26 dos ciclistas inscritos non se presentaron. Preme nesta ligazón para ver a galería de fotos da Transgalaica.

Diego Álvarez e Tamara Seijas gañan a segunda proba do circuíto Transgalaica 2025 que se disputou en Ames

O Club de ciclismo amesán Os Esfola Arrós e a empresa Team Relay, coa colaboración do Concello de Ames, organizaron este domingo, 16 de marzo, a segunda proba do circuíto Transgalaica 2025. Foi a novena ocasión na que o concello acolleu esta cita, unha das máis importantes do ciclismo no noroeste español. Dende 2016 organízase esta proba do circuíto Transgalaica en Ames. En 2021 non se puido realizar debido a situación epidemiolóxica derivada da Covid-19. Nesta edición chagaron á liña de meta 249 ciclistas, que deron dúas voltas a un circuíto de 33 quilómetros completando un percorrido de 66 quilómetros. Preme nesta ligazón para ver a galería de fotos da Transgalaica.

Diego Liñares estrea ao MillaRaio nun campionato de España sub20 noutra fin de semana de competicións

O pasado sábado 12 de marzo, o corredor Diego Liñares participou en Antequera no campionato de España sub20 en pista cuberta, o que o converteu no primeiro deportista do MillaRaio en estar nunha proba nacional sub20. Liñares quedou a piques de pasar ás semifinais nos 60 metros valos. Ademais, na mesma fin de semana, o MillaRaio conseguiu tres medallas nos campionatos sub16, sub18 e sub20 de lanzamentos longos, e oito atletas estiveron nos galegos de pista cuberta sub10, sub12 e sub14.

Do 2 ao 13 de setembro estará aberto o prazo de renovación e preinscrición nas Escolas deportivas municipais de Ames

Dende este luns, 2 de setembro, pódense realizar os trámites de preinscrición e renovación de matrícula nas Escolas Deportivas municipais do Cocnello de Ames. O prazo estará aberto ata o 13 de setembro, ás 13:00 horas. A inscrición pódese realizar de forma presencial ou telemática. Este ano as autoliquidacións non se farán no Concello, senón que haberá que solicitar o impreso de pagamento nas oficinas municipais de Recadación. Tamén se pode facer a autoliquidación na Oficina Virtual Tributaria. As persoas que realicen a preinscrición deben saber que as prazas adxudicaranse nun sorte público que se desenvolverá o 18 de setembro, ás 12:00 horas, no salón de plenos da Casa do Concello. Posteriormente, o venres 20 de setembro, farase pública a listaxe coas persoas admitidas.

Dous atletas do club Ames Atletismo participaron no Campionato de España sub 18 disputado en Málaga

Os días 6 e 7 de xullo Nicolás Collazo e María Estévez, dous atletas do club Ames Atletismo, acudiron ao Campionato de España sub 18 que se disputou en Málaga. A atleta amesá María Estévez acadou o quinto posto na proba de 2.000 metros obstáculos, mentres que Nico Collazo obtivo o sexto posto en 5 quilómetros marcha. Ambos atletas obtiveron uns excelentes resultados en dito campionato. Ademais, o club Ames Atletismo participou no Campionato Galego sub 16 de Pontevedra cunha moi boa actuación dos 6 atletas que representaron al club amesán. O club Ames Atletismo pechou a temporada coa participación de María Vázquez e María Villaverde no Campionato Galego sub 20, onde obtiveron catro medallas.

Dous atletas do club Ames Atletismo participaron nos dous Campionatos de España disputados a pasada fin de semana

A pasada fin de semana Nicolás Collazo e María Estévez, dous atletas do club Ames Atletismo, acudiron aos campionatos de España por federacións de marcha atlética e ao sub 18 short track nos 800 m respectivamente. Os dous atletas amesás remataron con nota a primeira parte da tempada e xa comezan a preparar as competicións de aire libre cos Campionatos de España como obxectivo.

Dous atletas do club atletismo Millaraio participaron no campionato de España sub 14 individual

Durante as últimas semanas os/as atletas do Millaraio participaron en varios campionatos. Alejandro Jiménez e Noel Ferrace participaron os días 1 e 2 de xuño no campionato de España sub 14 individual.  Alejandro Jiménez formou parte do equipo gañador na proba de relevos 6x60 metros. No XIII Campionato de Galicia sub10 e sub12 en pista ao aire libre, Nuno Castro, conseguiu dúas medallas en salto de lonxitude e nos 60 metros; Laura Sanz, foi terceira na proba de 60 metros; e o equipo de relevos masculino acadou a medalla de bronce. Ademais, no campionato provincial en pista infantil e combinadas benxamín-alevín “Xogade” o club de atletismo Millaraio acadou 7 medallas.

Dous atletas do club de atletismo MillaRaio participan no Campionato de España Máster

O pasado 6 e 7 de xullo celebrouse en Alcobendas o Campionato de España Máster ao aire libre, onde acudiron, representando ao club MillaRaio, David López Vilariño e Purificación Cariñena Amigo. David acadou a medalla de bronce no salto de altura M50 e a sétima posición nos 100 metros valados, mentres que Puri competiu en 100m, 200m e 400m na categoría F50, e acadou na carreira de 400m a sétima posición cun excelente rexistro. Ademais, dende o MillaRaio fan balance sobre o excelente rendemento dos seus equipos na tempada ao aire libre.

Dous atletas do MillaRaio no galego absoluto de pista cuberta e sete medallas no sub18 e no sub20

Este sábado 19, oito atletas do MillaRaio participaron no campionato de Galicia sub18 de pista cuberta, obtendo seis medallas, coas actuacións destacadas de Álvaro Francos, ouro en salto con pértega, e de Daniel Cariñena, ouro en salto de lonxitude e bronce nos 200m. O domingo 20, foi a quenda da competición sub20, na que Diego Liñares foi bronce nos 60m valos e quinto nos 60m lisos. Ademais, os sub18 Daniel Cariñena e Roi Rial participaron o pasado sábado 12 no campionato galego absoluto de pista cuberta, rematando quintos en salto de lonxitude e triplo salto, respectivamente.

Dous atletas do MillaRaio participaron coa selección galega no campionato de España sub18 de Federacións Autonómicas

Dous atletas do Club Atletismo MillaRaio, Daniel Cariñena e David García, que veñen de proclamarse campións galegos de salto de lonxitude e salto de altura, respectivamente, no recente campionato de Galicia sub18, participaron o pasado sábado, 4 de xuño, coa selección galega no campionato de España sub18 de Federacións Autonómicas celebrado en Valladolid, no que Galicia rematou nun excelente quinto posto. Daniel competiu na proba de salto de lonxitude e o relevo 4x100m, mentres que David o fixo en salto de altura. Ademais, dende o club MillaRaio lembran que proximamente estará aberto o prazo de inscrición para o campus de verán, que organizan en setembro e que se desenvolverá na area deportiva do Milladoiro.

Eventos del departamento

>XVI Carreira Ciclista do Pavo

O 17 de decembro, ás 12:00 horas, celébrase a XVI Carreira Ciclista do Pavo nos arredores do Paseo Fluvial de Bertamiráns.

>XVI Gala do Deporte

A Concellaría de Deporte celebra este venres, 19 de abril, a décimo sexta edición da Gala do Deporte, un evento no que se homenaxeará tanto aos e ás deportistas máis destacados/as do concello, como ás diversas entidades deportivas. O acto terá lugar ás 20:30 horas, na Casa da Cultura do Milladoiro, e será presentado polos xornalistas Lorena Pose e Diego Viaño. Ademais, ofreceranse distintos espectáculos e animacións.

>XVII Carreira do Pavo

A localidade de Bertamiráns acolle o domingo, 22 de decembro, a partir das 11.00 horas, a décimo sétima edición da Carreira Ciclista do Pavo. Organizada pola Asociación Galega de Ciclistas, en colaboración coa Federación Galega de Ciclismo e co Concello de Ames, nela participarán tanto adultos como os máis pequenos da casa. As inscricións para os/as ciclistas federados/as poden facerse na páxina web da federación (tamén o poden facer o propio día da carreira), mentres que as persoas non federadas teñen que enviar un correo electrónico a begonaalonso@mundo-r.com ou chamar ao  número de teléfono 677 555 748. Em ambos casos as inscricións poden tramitarse ata o venres 13 de decembro.

>XVII Gala do Deporte

A Concellaría de Deporte celebra este venres, 9 de maio, a décimo sétima edición da Gala do Deporte, un evento no que se homenaxeará tanto aos e ás deportistas máis destacados/as do concello, como ás diversas entidades deportivas. O acto terá lugar ás 20:30 horas na Casa da Cultura de Bertamiráns. Ademais, ofreceranse distintos espectáculos e animacións.

>XX Carreira Pedestre Popular Concello de Ames

O Concello de Ames e a Federación Galega de Atletismo organizan este domingo, 20 de outubro a vixésima edición da carreira pedestre do Concello de Ames. Esta proba pertence ao VII Circuíto de carreiras populares da Deputación da Coruña. A saída e chegada de cada proba farase na rúa Alcalde Lorenzo de Bertamiráns, tal como  se veu realizando nas dúas últimas edicións, unha vez que se decidiu trasladar a proba desde o entorno do Pazo da Peregrina ao centro do núcleo urbano para así facer mais partícipe á veciñanza.

>XXIII Carreira Pedestre Popular do Concello de Ames

O Concello de Ames e a Federación Galega de Atletismo organizan o domingo 20 de outubro a XXIII Carreira Pedestre Popular Concello de Ames, unha proba que pertence ao X Circuíto provincial de carreiras populares da Deputación da Coruña. Contará cun circuíto urbano de 10 quilómetros homologado pola Real Federación Española de Atletismo, con saída e chegada en Bertamiráns, na rúa Alcalde Lorenzo, nas inmediacións da Casa do Concello. O percorrido estará debidamente sinalizado e haberá indicacións en cada quilómetro.

>XXXVIII Rally Berberecho de Noia

A edición deste ano do Rally Berberecho de Noia terá un treito que se disputará de forma íntegra por estradas do noso concello. Será en horario de tarde e haberá un reagrupamento, de 17:15 a 19:30 horas, na avenida José Luís Azcárraga, diante do Pazo da Peregrina, en Bertamiráns, polo que pasarán todos os participantes. O tramo de Ames ten unha lonxitude de 11,2 quilómetros e discorre polas parroquias de Ames, Lens e Tapia. A saída do tramo estará instalada no lugar de Outeiro, mentres que a liña de meta será na estrada que vai dende a aldea de A Mámoa cara o lugar de Pedrouzos. Os pilotos farán unha dobre pasada polo tramo de Ames. A primeira pasada comezará ás 16.50 e a segunda ás 19.40 horas, sendo o último tramo do rally. O final do rally está previsto para as 20.20 horas. As estradas polas que discorre o treito de Ames estarán pechadas ao tráfico de 15.30 a 22.30 horas aproximadamente. Consulta o itinerario do tramo de Ames.

O Milladoiro acolle o programa Convivir Deportivo da CRTVG

O auditorio da Casa da Cultura do Milladoiro converterase o próximo luns, 22 de xullo, nun estudo de radio coa retransmisión do programa Convivir Deportivo, da Radio Galega. O programa que conduce Alfonso Pardo aterra en Ames e contará coa participación dun dos máximos expoñentes do deporte amesán, Borja Golán, dezaseis veces campión de España de squash e dúas veces campión de Europa. Convivir Deportivo comezará ás 20:00 horas, con entrada libre e de balde.

XXXIV Descenso do Tambre de piragüismo