Dende hoxe e ata o vindeiro 7 de maio está aberto o prazo para votar polo/a mellor deportista de Ames do ano 2024, a través dunha enquisa que se pode atopar premendo nesta ligazón. A finalidade desta iniciativa é a participación da veciñanza nun dos premios que se entregarán na XVII Gala do Deporte. O evento celebrarase o venres 9 de maio, ás 20:30 horas, na Casa da Cultura de Bertamiráns, e nel daranse a coñecer tamén os/as gañadores/as do resto de galardóns.

Iván Gutiérrez e Cosme González, os dous veciños de Ames e pertencentes ao Club Ximnasia Rítmica Compostela, acaban de gañar a medalla de ouro no campionato nacional base individual masculino de ximnasia rítmica. Dito campionato celebrouse do 8 ao 13 de abril no Palacio multiusos de Guadalajara. Iván Gutiérrez foi campión de España de ximnasia rítmica na categoría cadete, mentres que Cosme González tamén se proclamou campión de ximnasia rítmica na categoría xuvenil.

O Club Ribeiras do Tambre, en colaboración co Concello de Ames e a Deputación da Coruña, organiza para o mércores 16 e o xoves 17 de abril, coincidindo coa Semana Santa, unhas xornada de iniciación ao piragüismo que se desenvolverán no lugar de Ponte Ínsua - Ons (Brión), entre as 11:00 e as 13:00 horas. A través desta actividade búscase que os amesáns e as amesás que o desexen poidan aprender a dominar esta embarcación. Para participar nesta actividade hai que inscribirse enviando un correo electrónico ao enderezo info@ribeirasdotambre.es. Estas xornadas son gratuítas e non hai límite de prazas.

Tres deportistas do club amesán TKDenodo, David Noya Platas, Breixo Lestón Cives e Jorge Nogueiras Rivero, participaron no campionato de España (categorías cadete e júnior) como parte da selección galega de taekwondo. Dito campionato celebrouse os días 15 e 16 de marzo en Tarragona. Os tres deportistas tiveron unha participación destacada. Breixo Lestón e David Noya acadaron o quinto posto, quedando a un paso de acadar medalla. Ademais, estes tres taekwondistas foron convocados pola selección galega para participar no Open de España os días 25 e 26 de abril.