[25-09-2017] O departamento de Deportes fai pública a listaxe coa relación das prazas libres dispoñibles nas Escolas Deportivas de Ames, para o curso 2017/2018. Premendo na ligazón que está a túa dereita, baixo o apartado de descargas, poderás obter a listaxe completa e o impreso de inscrición. A inscrición poderase realizar tanto de xeito presencial como telemático. Presencialmente, poderase facer na Casa da Cultura do Milladoiro e na Casa da Cultura de Bertamiráns, en horario de 9:00h a 13:00 horas. Telematicamente, os trámites poderanse realizar enviando o formulario de inscrición cuberto a un dos seguintes enderezos de correo electrónico: deportes@concellodeames.gal ou deportes.milladoiro@concellodeames.gal. Posteriormente, deberase solicitar a folla de autoliquidación por correo electrónico ou presencialmente, para efectuar o pagamento das actividades das que se vai participar. Unha vez se pague a devandita autoliquidación non será necesario entregar o resgardo.

[25-09-2017] O vindeiro xoves, 28 de setembro, o Concello de Ames celebra a Semana Europea do Deporte cunha xornada de portas abertas nas instalacións públicas da Telleira, en Bertamiráns. Ao longo do día, poderanse practicar diferentes deportes como ioga, body combat ou ciclismo indoor.

[23-09-2017] O Motoclub Ameixenda, en colaboración co Concello de Ames e a Deputación da Coruña, organizan este domingo, 24 de setembro, a proba de supercross “Gran Premio Concello de Ames-Dagan Cup Supercross 2017”, que se desenvolverá no circuíto SX “Alex de Moure”, situado no lugar do Vilar na parroquia da Ameixenda. Nesta proba participarán máis de 50 pilotos de supercross de toda Galicia. Trátase da quinta proba que se celebra este ano dentro da Dagan Cup. A primeira proba tamén se celebrou en Ames no pasado mes de maio. Pola mañá realizaranse as verificacións técnicas e administrativas, así como os adestramentos. Pola tarde, ás 16:00 horas, dará comezo a proba que se compón de dúas mangas por categoría.

[23-09-2017] Este venres, 22 de setembro, o alcalde e concelleiro de Deportes, José Miñones, acompañado por varias concelleiras e concelleiros do grupo de goberno e da corporación municipal recibiron, na Casa do Concello, a Nadia Iglesias. Neste acto proxectouse o exercicio do programa longo realizado por Nadia no mundial de China. A patinadora amesá vén de conseguir a medalla de bronce no campionato do mundo júnior de patinaxe artística e proclamouse campioa de Europa a comezos do mes de agosto. Nadia Iglesias estivo acompañada de 22 rapazas e rapazas do Club de patinaxe Sarela, que acudiron a dito acto acompañados de súas nais e pais. Nadia volverá a competir no vindeiro mes de febreiro de cara a preparar os campionatos de España de xullo e de Europa do vindeiro mes de agosto.