Este venres, o rexedor municipal e algunhas das concelleiras e concelleiros do grupo de goberno e da corporación municipal puideron coñecer, de primeira man, os éxitos acadados pola patinadora amesá, Nadia Iglesias. A recepción realizouse ás 20:00 horas, no salón de plenos da Casa do Concello e incluíu a entrega de agasallos á galardoada patinadora: un ramo de flores e un prato coa “A” de Ames feita pola artesá e palilleira Ana Rosa Liste.

O recibimento encádrase na serie de recepcións que o Concello está a realizar a diferentes veciñas e veciños de Ames, que teñen acadado destacados logros en diversos ámbitos. Nadia Iglesias, que escribiu no libro de sinaturas do Concello, estivo acompañada de 22 rapazas e rapazas do Club de patinaxe Sarela, que acudiron a dito acto acompañados de súas nais e pais. Unha das rapazas deste club entregoulle un ramo de flores como agasallo polos éxitos conseguidos. Ademais, a patinadora amesá puido ver unha proxección do exercicio do programa longo realizado no mundial de China.

O alcalde de Ames, José Miñones, destacou os éxitos de Nadia Iglesias ao longo desta temporada e dixo “non é a primeira vez que te recibimos na Casa do Concello e seguro que non é a última. Alegrámonos dos títulos que acadaches este ano e xa es unha referencia para todas estas rapazas e rapaces que están aquí hoxe acompañándote. O deporte feminino en Ames está en auxe e ti es unha claro mostra diso”. Miñones tamén destacou que “dende o goberno municipal estamos traballando para sacar en 2018 unha bolsas para grandes deportistas de Ames”.

Fito histórico para o deporte galego
Nadia Iglesias é a protagonista dun dos fitos recentes do deporte galego, ao ter gañado o primeiro campionato de Europa para a patinaxe artística de Galicia. A patinadora amesá, que pertence ao Club de Patinaxe Artística Maxia da Coruña acadou, asemade, o ouro nos campionato de España na categoría júnior. O seu último éxito foi a medalla de bronce acadada no campionato do mundo júnior de patinaxe artístico celebrado na cidade china de Nanjing a comezos deste mes de setembro. Este éxito ten un grande mérito xa que era o primeiro mundial disputado pola patinadora amesá.

Nadia Iglesias dixo sentirse “moi querida por todos e todas” e destacou que o reto para a vindeira temporada é “repetir os éxitos deste ano”. Asemade, doulle un pequeno consello a todas as rapazas e rapaces do Club de patinaxe Sarela. “A pesar dos malos momentos e dos paus que nos damos nos adestramentos cando intentos facer unha pirueta e non sae, hai que seguir adiante traballando, porque despois cando os éxitos chegan todo o sufrimento anterior esquécese e vese recompensado cos momentos vividos”. Tamén animou aos nenos e nenas a gozar coa patinaxe. “O meu éxito radica en que eu patino para min, para gozar eu, e anímovos a que todas vós fagades o mesmo”.