[24-10-2017] Ames Radio fai pública a súa programación de outono. Premendo no enlace que está a túa dereita, baixo o apartado de descargas, poderás consultar a programación completa.

[23-10-2017] Máis de 1.300 persoas participaron na décimo oitava edición da Carreira Pedestre Popular Concello de Ames, que tivo lugar este domingo, 22 de outubro. Na proba absoluta participaron unhas 500 persoas, mentres que na proba escolar correron arredor de 800 rapazas e rapaces. Na proba absoluta impuxéronse Nuno Costa e Paula Mayobre cun tempo de 30:28 e 35:53 respectivamente. A carreira pedestre disputouse nun circuíto de 10 quilómetros homologado pola Real Federación Española de Atletismo, que discorreu pola contorna de Bertamiráns. A proba estaba incluída no V Circuíto de carreiras populares da Deputación da Coruña. A saída e a chegada estiveron instaladas na rúa Alcalde Lorenzo, ao carón da praza do Concello.

[21-10-2017] O alcalde de Ames e concelleiro de Deportes, José Miñones, vén de asinar oito contratos por importe de 49.879 euros para o desenvolvemento das escolas deportivas de 2017-18. A cantidade económica que desembolsa o Concello permitirá levar a cabo as escolas deportivas municipais de baloncesto, fútbol sala masculino e feminino, patinaxe, voleibol e xadrez. A oferta deste curso 2017-2018 inclúe 16 actividades diferentes; 12 encadradas no programa de Fomento do Deporte para menores de 14 anos e 4 no apartado de Ponte en Forma, para persoas maiores desa idade. As clases comezaron este mes de outubro e desenvolveranse ata o 31 de maio de 2018. Hai 2.000 persoas que participan nalgunha destas actividades e 389 en lista de agarda. Un total de 2.401 fixeron os trámites de inscrición nas escolas deportivas.

[21-10-2017] Ata o mes de xuño, veciñas e veciños de Ames, maiores de 60 anos, poderán gozar das actividades encadradas dentro do programa de envellecemento activo Amessan. O programa, que inclúe diversas actividades como ximnasia terapéutica, manualidades e obradoiros de música tradicional e memoria, desenvólvese nas Casas da Cultura de Bertamiráns e Milladoiro, así como nos locais sociais de Agrón, Ameixenda, Augapesada, Bugallido, Covas, Cruxeiras, Piñeiro, Tarroeira e Trasmonte. Este ano, como novidade, impártese a actividade de música tradicional na parroquia de Lens. Para participar, só é preciso acudir á actividade e formalizar, in situ, a inscrición. Para obter máis información sobre estas actividades, as persoas interesadas poden chamar ao número de teléfono 662 377 044 (de 10:00 a 14:00h) ou ao 607 813 452 (de 16:00h a 19:00h).