[26-10-2017] O Concello de Ames vén de asinar un contrato coa empresa Os Ventos, para a xestión e impartición de actividades formativas na Aula Cemit, após o proceso de licitación aberto desde o Concello. Cunha vixencia de dous anos, o novo contrato procura ofrecer, á poboación amesá, un amplo programa de cursos, formacións e xornadas, que fagan da Aula Cemit un punto de encontro e innovación en Ames. Ao longo do ano, realizaranse, entre outros, cursos de manexo de LibreOffice Writer e Impress, de ferramentas ofimáticas de Google, de dispositivos de control parental e de mecanografía.

[26-10-2017] O curso preparatorio para a obtención do título de graduado en Educación Secundaria Obrigatoria (ESO), para maiores de 18 anos, volve un ano máis á Escola Municipal de Adultos . Para inscribirse ou obter máis información, as persoas interesadas poderán pasar polas oficinas do departamento de Educación, situadas no Pazo da Peregrina de Bertamiráns, ou chamar ao número de teléfono 981 891 476. As aulas, que son impartidas por unha técnica municipal deste departamento, comezarán o vindeiro 6 de novembro e desenvolveranse os luns e os martes, en horario de 9:30h a 13:00 horas. A matrícula do curso, que é gratuíto, está aberta todo o ano, porén recoméndase seguir as aulas desde o seu inicio.

[25-10-2017] O xoves, 26 de outubro, ás 18:00 horas, o local de JUPEMI no Milladoiro volverá acoller unha nova charla do ciclo Falemos de Saúde, nesta ocasión centrada na prevención do cancro. Nela, trataranse de desmitificar ideas preconcibidas sobre esta enfermidade, potenciando, asemade, unha actitude positiva por parte das e dos pacientes e das súas familias. As encargadas desta sesión serán Lucía Álvarez – Santullano e Aroa Gutiérrez, ambas psicólogas da Asociación Española contra o Cancro (AECC). A charla fai parte das iniciativas organizadas polo Concello de Ames co gallo do Día Mundial contra o Cancro de Mama, conmemorado o pasado 19 de outubro.

[25-10-2017] A Oficina de Voluntariado de Ames e a asociación de veciños Vivo en Ames, en colaboración coa Concellaría de Benestar Social, xa están á procura de trasnos -persoas voluntarias que queiran achegar un agasallo de Reis a unha nena ou neno cuxa familia estea a atravesar por un momento de dificultades económicas-. Para rexistrarse como trasno é preciso chamar ao número de teléfono 662 37 70 44 (Oficina de Voluntariado de Ames) ou ao 687 05 46 35 (da Asociación Vivo en Ames), enviar un correo electrónico ao enderezo zocosetrasnos@gmail.com ou unha mensaxe privada á conta de Facebook do voluntariado ou da propia asociación. O rexistro tamén se pode facer presencialmente na Oficina de Voluntariado de Ames, situada na Casa da Cultura de Bertamiráns. As persoas participantes na primeira edición, recibirán información por correo electrónico para seguir contando coa súa axuda. Os agasallos non poderán ser de carácter sexista nin bélico.