[19-10-2017] O Concello de Ames, a través da Concellaría de Sanidade, Servizos Sociais e Igualdade, colabora coa Asociación Española contra o Cancro (AECC), na conmemoración do Día Mundial do Cancro de Mamá. Deste xeito, chapas e lazos serán repartidos ao longo do día de hoxe, tanto na Casa do Concello como nas oficinais municipais e de Servizos Sociais do Milladoiro e Bertamiráns. Ademais, o vindeiro xoves, 26 de outubro, o local de JUPEMI acollerá unha charla sobre o cancro de mama, que será impartida por dúas das psicólogas da AECC. Varios comercios do concello tamén están a colaborar coa causa, mediante o impulso de diferentes iniciativas.

[18-10-2017] O pasado luns, 16 de outubro, comezou o tradicional seminario de viticultura, organizado pola Oficina de Voluntariado de Ames (OVA). A actividade, que é impartida polo profesor voluntario Emilio de Vicente Nogueira, conta con 25 prazas, das cales 10 aínda están dispoñibles. Para inscribirse neste seminario é preciso acudir á Oficina de Voluntariado de Ames, situada nas Casas da Cultura do Milladoiro e de Bertamiráns, ou chamar ao número de teléfono 662 377 044. O seminario desenvolverase semanalmente, os luns, en horario de 19:30 a 21:30 horas.

[18-10-2017] Esta mañá presentouse a nova aplicación de Orzamentos Abertos do Concello de Ames. Por primeira vez á veciñanza amesá terá acceso, de xeito facilmente comprensible e manexable, a toda a información económica do Concello, orzamento municipal, detalle de ingresos e gastos por áreas, pago a provedores, etc. Trátase dunha iniciativa da Concellaría de Economía e Facenda. Esta nova ferramenta informática basease nos principios de transparencia, eficiencia, participación e consulta. A presentación desta iniciativa correu a cargo do alcalde de Ames, José Miñones, da concelleira de Economía e Facenda, Genma Otero, da concelleira de Comunicación, Isabel Vaquero, e de Miguel Arias, membro do equipo técnico da empresa Balidea que foi a encargada de desenvolver esta aplicación.

[17-10-2017] O Concello de Ames organizou unha novidosa actividade para este mes de outubro. Trátase da primeira Festa do Millo que se vai a desenvolver na contorna do paseo fluvial de Bertamiráns, este sábado, 21 de outubro, de 16:30 a 19:30 horas. Haberá obradoiros de escanado, esfollado, debullado, crebado de millo. Tamén se fará unha muiñada e un obradoiro de peneirado de fariña. Montarase unha exposición de apeiros para o traballo do millo. As persoas que asistan a dita festa poderán acudir caracterizados de labregos/as galegos/as. Por último, haberá, contos do muíño, música tradicional galega e degustación de flocos de millo.