O Concello de Ames conmemora dende este martes 24 de maio o vixésimo aniversario da estrea en galego da película de animación realizada pola produtora coruñesa Dygra Films, “O bosque animado”, a primeira longametraxe de animación integramente en 3D producida fóra dos Estados Unidos e en galego. Neste senso, o martes celebrarase na Casa da Cultura do Milladoiro un coloquio sobre a creación de películas de animación, para o alumnado da ESO dos IES de Ames; proxectarase o filme de balde, ás 18:00 horas; e inaugurarase a exposición interactiva, ás 20:00 horas, que poderá visitarse no centro sociocultural ata o 6 de xuño.

A Casa da Cultura de Bertamiráns acolleu onte, 23 de febreiro, unha gran festa rosaliana, o evento central das actividades organizadas polo Concello para conmemorar o mes da autora. A Gala Rosalía, que contou cunha gran participación da veciñanza e do alumnado dos centros educativos de Ames, puxo en valor a figura da escritora e a súa vinculación co concello. Canda a veciñanza de Ames, na gala participaron o alcalde e concelleiro de Normalización Lingüística, Blas García, a concelleira de Educación, Beatriz Martínez, e concelleiros/as do goberno municipal e dos grupos municipais do Partido Popular e do BNG. O acto pechouse cun concerto da cantautora Sheila Patricia. Pódese acceder á galería completa de imaxes na seguinte ligazón.

Ames celebra o aniversario da poeta da Maía coa presentación de “Rosalías”, un mural de Yoseba MP no que varias mulleres, todas elas co rostro da escritora, serven de metáfora visual para amosar a contemporaneidade da figura e da obra rosaliana e o seu vínculo coa mocidade. A presentación do mural, que se situará en dúas das paredes da Casa de Barbazán, terá lugar o día 24 de febreiro, aniversario do nacemento de Rosalía, ás 18:00 horas. No transcurso do acto varios alumnos/as do IES de Ames e do IES do Milladoiro leran o manifesto rosaliano que nesta ocasión escribiu a vicepresidenta da AELG e veciña de Ames, Anna R. Figueirido.

O pasado sábado, 25 de febreiro, celebrouse na Casa da Cultura de Bertamiráns unha gala-homenaxe a Rosalía de Castro con motivo do aniversario da escritora. O evento, que buscaba poñer en valor a obra de Rosalía e destacar a súa valía como figura comprometida e feminista, foi conducido pola xornalista Esther Estévez. A  parte musical correu a cargo da cantora e compositora Najla Shami. Ademais, participaron máis de cincuenta persoas en representación dos centros educativos de infantil, primaria e secundaria do concello. Premendo nesta ligazón podes ver a galería de fotos da gala.