O programa Apego continúa coa súa programación de actividades para as crianzas nestes meses de outono. Nesta ocasión, organizan o vindeiro venres 21 de novembro ás 17.30 horas, na casa da Cultura do Milladoiro, o obradoiro de masaxes “Música na pel” de Arkhé Espazo Educativo. A actividade é de balde e está dirixida para familias que estean agardando un bebé ou con bebés que aínda non gateen. O prazo de inscrición está aberto desde hoxe, 13 de novembro, ata o xoves día 20. Para participar é preciso enviar un correo ao enderezo electrónico normalizacion@concellodeames.gal no que se indique o nome e apelidos das persoas asistentes, a idade das crianzas e un teléfono de contacto.

O Enreguéifate presentou esta mañá as novidades da súa novena edición. O proxecto, impulsado polos servizos de normalización lingüística dos concellos de Ames, Arzúa, Carballo, Pontevedra, Santiago de Compostela e Teo, continúa a consolidarse como un referente na divulgación da improvisación oral en verso –a regueifa– como vía para revitalizar o uso do galego, especialmente entre a mocidade. O programa de actividades inclúe accións formativas para escolares e profesorado e un certame regueifeiro aberto a toda a cidadanía.

O vindeiro luns, 17 de novembro, ás 19.00 horas, o auditorio da Casa da Cultura do Milladoiro acollerá a estrea de “Promover o galego dende o local”, un documental sobre programas de dinamización lingüística. A peza audiovisual, producida por Nós Televisión e financiada polo Concello de Ames, pon en valor as diversas iniciativas que se desenvolven en Ames para impulsar e promover o uso do galego a través de diferentes proxectos como o Galetiktokers, Modo Galego, actívao!, os Premios Lingua e Empresa ou o Certame Literario.

O programa Apego inicia o mes de novembro cunha chea de propostas para as crianzas. Desta volta, o vindeiro venres 7 de novembro, ás 18.00 horas, na casa da Cultura do Milladoiro, terá lugar a actividade “Unha area de sal” de María e Carme da Pontragha, quen volven a Ames cunha proposta de contos, música tradicional e baile. A actividade é de balde e está dirixida para público familiar. O prazo de inscrición está aberto desde hoxe, 30 de outubro, ata o xoves 6 de novembro. Para participar é preciso enviar un correo ao enderezo electrónico normalizacion@concellodeames.gal no que se indique o nome e apelidos das persoas asistentes, a idade das crianzas e un teléfono de contacto.