A Concellaría de Mobilidade recorda que está aberto o prazo para inscribirse nos “Rodeiros Brancos”, que se desenvolverán con motivo do día da Seguridade Viaria que se conmemora o 10 de xuño. Baixo o lema “Respecto na rúa, convivencia segura!” vanse organizar dous percorridos pola rúa nos que os/as participantes terán que ir vestidos/as de branco e cunha luz-linterna branca na cabeza, utilizando un método de mobilidade sostible. Preténdese reivindicar a utilización de medios de mobilidade sostible. En Bertamiráns, o 10 de xuño, ás 22.00h, farase unha saída nocturna en bicicleta de 8 quilómetros, mentres que no Milladoiro, o 17 de xuño, ás 22.00 horas, farase un rodeiro curto de 1.730 metros en bicicleta, monopatín, patíns ou patinete. Para participar nestas actividades é necesario inscribirse previamente enviando un correo electrónico ao enderezo mobilidade@concellodeames.gal. Os/as nenos/as deberán estar acompañados/as dunha persoa adulta.

O Concello de Ames vai celebrar por cuarta vez consecutiva a Semana Europea da Mobilidade, que neste 2022 se desenvolve do 16 ao 22 de setembro, cunha serie de actividades a prol da mobilidade activa, do transporte público e doutros medios limpos e intelixentes. Deste xeito, o programa inclúe andainas, xogos, coloquios, mostras e marchas ciclistas ao longo da semana. A temática escollida pola Comisión Europea para este ano é “Mellores conexións”, coa que se busca difundir os beneficios de uso das formas de transporte sostibles. Para participar nestas actividades é necesario inscribirse enviando un correo electrónico ao enderezo mobilidade@concellodeames.gal. Preme nesta ligazón para descargar o bando sobre a prohibición de estacionamento nos aparcadoiros da rúa Agriños e da Casa da Cultura do Milladoiro o sábado 17 de setembro.

Dúas columnas AIR-TOOL-WAHS facilitarán o lavado, a reparación e o inchado de rodas aos/ás ciclistas de Ames. Investíronse 6.034 euros IVE incluído. O servizo, que poderá ser utilizado por toda a veciñanza de Ames, é gratuíto. Xa está instalada na Casa da Cultura do Milladoiro a primeira destas columnas e nestes días arranxaranse os problemas de presión de auga que agromaron tras a súa posta en funcionamento. A columna de Bertamiráns, que se emprazará no aparcadoiro da Telleira, estará colocada en breve. A iniciativa, que parte da Concellaría de  Mobilidade, foi financiada con fondos municipais e ten como obxectivo facilitar o coidado das bicicletas a todas aquelas persoas que non posúen un lugar propio onde facelo.

O Concello de Ames está traballando na redacción do Plan de Mobilidade Urbana Sostible (PMUS). Unha das partes fundamentais para a elaboración do PMUS é a participación cidadá. Para iso publicouse na web http://www.pmusames.gal/ unha enquisa sobre os hábitos de mobilidade da veciñanza de Ames. Dita enquisa está aberta ata o venres 7 de maio. A través da web do PMUS infórmase das accións relacionadas coa elaboración e participación do Plan de Mobilidade. Tamén haberá sesións de participación, a través dos diferentes colectivos relacionados coa mobilidade, e pódese enviar comentarios e suxestións ao enderezo de correo electrónico: pmusames@gmail.com. Esta actuación forma parte do programa de mellora integral da mobilidade e a conectividade por transporte público, recollido na EDUSI Impulsa Ames.