A Xunta de Goberno Local celebrada o 7 de xullo vén de aprobar a concesión de axudas para o exercicio 2022 a entidades de iniciativa social sen ánimo de lucro para a promoción de actividades de servizos sociais comunitarios e inclusión social. Un total de dez entidades recibirán 60.000 euros para promover os seus proxectos, que serven de complemento aos servizos sociais municipais, e que favorecen a inclusión social, a saúde pública ou a formación laboral.

A Xunta de Goberno Local do pasado xoves 12 de maio aprobou a convocatoria de subvencións para a promoción de festas populares e actividades levadas a cabo polas asociacións culturais no exercicio 2022. O prazo para solicitar estas axudas, que suman unhas contías de 30.000 euros para as actividades culturais e de 25.000 euros para as festas, xa está aberto ata o 29 de xuño. Premendo nestas ligazóns pódese obter máis información sobre a convocatoria para as festas populares, ou ben para as actividades culturais.

A Xunta de Goberno Local do pasado 7 de abril vén de aprobar a convocatoria de subvencións para o exercicio 2022 a entidades de iniciativa social sen ánimo de lucro para a promoción de actividades de servizos sociais comunitarios e inclusión social. Con estas axudas búscase reforzar a colaboración coas entidades que leven a cabo actividades complementarias aos servizos sociais, e que favorezan a inclusión social, a saúde pública ou a formación laboral. Ao igual que en 2021, e dado o crecemento constante das solicitudes presentadas, a contía total volve a acadar os 60.000 euros, un aumento do 50% con respecto ao previsto no plan de subvencións 2020-2022. Premendo nesta ligazón pódese obter máis información sobre esta convocatoria.

O Concello de Ames, a través da Concellaría de Promoción Económica, informa de que está próximo a finalizar o prazo para presentar solicitudes á convocatoria de axudas do plan Ames Progresa. Esta liña de subvencións está dirixida ao mantemento do emprego e do tecido empresarial local. Poden presentarse a elas as empresas e profesionais autónomos, que pecharon parcialmente entre os meses de xaneiro e outubro de 2021, por mor da situación epidemiolóxica e das restricións vixentes no momento do peche. O prazo de presentación de solicitudes remata o día 20 de febreiro. O Concello investirá 120.000 euros nestas subvencións, que serán dun máximo de 1.500 euros.