A Escola Municipal de Teatro de Ames realizou durante este mes de xuño as clausuras dos diferentes grupos que a compoñen. Ademais, o grupo municipal de teatro tamén pechou a súa actividade coa estrea da obra “Mobilizad@s”, con pases nos auditorios do Bertamiráns e O Milladoiro. Cómpre lembrar que as inscricións para renovar praza na Escola xa están abertas ata o vindeiro 23 de xuño. Posteriormente, do 29 de xuño ao 10 de xullo abrirá un segundo prazo para novas inscricións nos grupos que queden prazas libres. 

O Concello de Ames, a través da Concellaría de Cultura, creou durante o curso 2025-2026, por primeira vez, un grupo inclusivo de teatro formativo e lúdico, que se enmarcou dentro da Escola municipal de teatro de Ames. Este grupo pechou a súa actividade neste curso 2025-2026 coa representación do espectáculo A eclipse. Os 7 intérpretes que compoñen o grupo representaron unha peza sobre a infancia e o paso do tempo, a través da eclipse solar do vindeiro 12 de agosto. Esta clausura súmase aos demais peches do resto de grupos da Escola municipal de teatro de Ames, que se celebrarán esta semana, e a estrea de Mobilizad@s por parte do grupo municipal de teatro.

O vindeiro venres 5 de xuño, o grupo municipal de teatro estreará no auditorio do Milladoiro, ás 20.30 horas, a obra “Mobilizad@s”, pechando así a actividade do grupo neste curso. Ademais da estrea, realizarán un pase da peza en Bertamiráns o vindeiro venres 12 de xuño, tamén ás 20.30 horas. Os convites xa se poden adquirir a través da Billeteira electrónica do Concello de Ames. No caso de que queden convites dispoñibles, poderán adquirirse o día da función correspondente nas Casas da Cultura de Bertamiráns ou Milladoiro.

A veciñanza de Bugallido e numerosos visitantes déronse cita en Ames para participar nunha completa fin de semana festiva que serviu para exaltar a identidade da parroquia. Tras superar a incerteza meteorolóxica das primeiras horas, as xornadas transcorreron cunha magnífica acollida de público. A proposta cultural e lúdica consolidou a Carballeira e o San Isidro como dúas propostas ideais para o intercambio interxeracional, facilitando a transmisión de valores patrimoniais e lingüísticos no ámbito rural.