Pestanas principais

Departamento de Servizos Económicos

Novas do departamento

O Goberno municipal de Ames presenta un orzamento consolidado para 2026 de 43 millóns de euros

Esta mañá o Goberno municipal presentou o orzamento consolidado para o exercicio 2026, que ascende á cifra de 43.334.228,98 euros, e que está composto polo orzamento municipal de 38.753.577,15 euros e mailo orzamento da EPEL Augas de Ames de 4.580.651,83 euros. Trátase do orzamento máis elevado da historia de Ames, o que supón un incremento do 18,89% con respecto ás contas do ano 2024. Isto é debido á consecución de fondos EDIL que fan un total en investimentos de 8.096.920,23 euros, o que supón case un 21% do total do orzamento, que xunto coa prestación de servizos (42,65%) supoñen un 63,54% do total. Este pasado mércores, 18 de febreiro, celebrouse a Comisión Informativa de Economía e Facenda e Especial de Contas e o vindeiro luns, 23 de febreiro, haberá un pleno extraordinario para debater e aprobar de xeito inicial, se procede, dito orzamento. O pleno será emitido en directo a través da canle de YouTube do Concello de Ames.

O Goberno municipal estende ao primeiro semestre de 2021 a exención de pago polas terrazas da hostalería

O Concello de Ames non cobrará as taxas de utilización da vía pública con mesas e cadeiras ao longo do primeiro semestre de 2021. O Goberno municipal acaba de facer público este novo compromiso que afectará directamente ao sector hostaleiro e algúns comercios do municipio. O Concello de Ames engade esta axuda á derrogación da ordenanza fiscal de instalación de postos no mercado de rúa para 2021 e a condonación de ambas taxas do ano 2020.

O goberno municipal inicia as conversas para a aprobación do Orzamento Municipal 2020

O pasado venres, 10 de xaneiro, desde a Concellería de Economía e Facenda enviouse o borrador do anteproxecto de Orzamentos 2020 do Concello de Ames ao representante de Ames Novo e membro integrante do grupo mixto, ao representante de Ciudadanos e tamén membro integrante do grupo mixto, e ao grupo municipal do Partido Popular e marcouse un prazo de 10 días para que se fixeran as propostas ou achegas por parte dos diferentes grupos.

O goberno municipal inicia os contactos para a aprobación do Orzamento Municipal 2021

O pasado mércores día 30 de decembro desde a Concellería de Economía e Facenda enviouse o borrador do Anteproxecto de Orzamentos 2021 do Concello de Ames aos representantes dos grupos da oposición, Partido Popular e Grupo Mixto integrado polo representante de Ames Novo e Cidadáns. Abriuse un prazo de 19 días para que os diferentes grupos fagan as súas achegas. Este prazo rematará o lúns 18 de xaneiro de 2021.

O goberno municipal mantivo contactos cos grupos da oposición para a aprobación do Orzamento Municipal 2022

O pasado xoves, 10 de febreiro, dende a Concellería de Economía e Facenda enviouse o borrador do anteproxecto de Orzamentos 2022 do Concello de Ames aos representantes dos grupos da oposición: Partido Popular e Grupo Mixto integrado polos concelleiros de Ames Novo e Ciudadanos. Deste xeito, abriuse un prazo de 11 días para que os diferentes grupos fixeran as súas achegas rematando dito prazo o luns 21 de febreiro de 2022. O Concello xa recibiu as propostas do Partido Popular que están a ser obxecto de estudo.

O Goberno municipal mantivo contactos cos grupos da oposición para a aprobación do Orzamento municipal 2023

O pasado xoves, 24 de novembro, dende a Concellería de Economía e Facenda enviouse o borrador do anteproxecto de Orzamentos 2023 do Concello de Ames aos representantes dos grupos da oposición: Partido Popular e Grupo Mixto integrado polo representante de Ames Novo e Ciudadanos. Dende ese momento abriuse un prazo de 7 días para que os diferentes grupos fixeran as súas achegas rematando o prazo o xoves 1 de decembro de 2022. O Goberno municipal xa recibiu as propostas do Partido Popular que están a ser obxecto de estudo.

O Goberno municipal presenta as melloras realizadas na aplicación de Orzamentos Abertos

Hoxe ás 20.00 horas preséntase no Pazo da Peregrina, en Bertamiráns, as modificacións realizadas para mellorar a aplicación de Orzamentos Abertos que recolle a información da xestión orzamentaria municipal. Dita aplicación foi creada en 2017 para que a veciñanza amesá teña acceso, de xeito facilmente comprensible e manexable, a toda a información económica do Concello, orzamento municipal, detalle de ingresos e gastos por áreas, pago a provedores, etc. Trátase dunha iniciativa da Concellaría de Economía e Facenda. Esta nova ferramenta informática basease nos principios de transparencia, eficiencia, participación e consulta.

O goberno municipal presenta o maior orzamento municipal de Ames cunha cifra de 27.370.000 euros para o exercicio 2020

Esta mañá o goberno municipal presentou o novo orzamento para o exercicio 2020, que ascende a cifra de 27.370.000 euros, incrementando en 1.370.000 euros (5,29%) respecto do presuposto de 2019. Trátase do maior orzamento municipal que presentou o Concello de Ames. Recolle un forte compromiso nos capítulos de investimentos, desenvolvemento dos servizos básicos, e blinda as áreas de educación e servizos sociais. Este luns, 17 de febreiro, celebrouse a Comisión Informativa de Economía e Facenda e Especial de Contas, na que se emitiu ditame favorable, coa finalidade de debater a aprobación inicial de dito Orzamento municipal nun pleno extraordinario que se celebrará o próximo xoves 20 de febreiro. É o cuarto orzamento consecutivo que aprobará, se procede, a Corporación municipal do Concello de Ames dende abril de 2017.

O Goberno municipal presenta o quinto orzamento consecutivo que se achega aos 30 millóns de euros

Esta mañá o Goberno municipal presentou o novo orzamento para o exercicio 2021, que ascende á cifra de 29.888.000 euros, incrementando en 2.518.000 euros (9,20%) respecto do presuposto de 2020. Trátase do maior orzamento municipal que presentou o Concello de Ames. Recolle un forte compromiso en servizos básicos cunha partida para o novo contrato de limpeza viaria; e un incremento de crédito para as áreas de educación e servizos sociais, así como unha forte aposta polo investimento público. Este venres, 5 de marzo, celebrarase a Comisión Informativa de Economía e Facenda e Especial de Contas. O obxectivo é debater a aprobación de dito orzamento nun pleno extraordinario o día 11 de marzo. É o quinto orzamento consecutivo que aprobará, se procede, a Corporación municipal do Concello de Ames dende abril de 2017. Preme nesta ligazón para consultar a presentación proxectada esta mañá sobre o orzamento de 2021.

O Goberno municipal presenta o sétimo orzamento consecutivo que se achega aos 30 millóns de euros

Esta mañá o Goberno municipal presentou o novo orzamento para o exercicio 2023, que ascende á cifra de 29.725.000 euros. Trátase do sétimo orzamento que se presenta de xeito consecutivo e nesta ocasión antes de comezar o ano 2023. Segundo o Goberno local trátase dun orzamento que medra e se consolida reforzando os servizos, blindando as áreas de servizos básicos, educativos e sociais, e ampliando o crédito en todas as áreas de gasto. A principal área de gasto segue a ser Servizos Básicos con 6.047.000 euros (20,34%), seguida de educación con 5.569.000 euros (18,74%) e servizos sociais e promoción social cun crédito asignado de 3.137.000 euros (10,55%). O pasado venres, 16 de decembro, celebrouse a Comisión Informativa de Economía e Facenda e Especial de Contas e este mércores, 21 de decembro, haberá un pleno extraordinario para debater e aprobar de xeito inicial, se procede, dito orzamento.

Eventos del departamento

>Xuntanza Orzamentos Participativos en Transmonte

Este luns, 14 de setembro, de 19.00 a 20.00 horas, celébrase unha xuntanza no local social de Transmonte, sobre os Orzamentos Participativos de 2020. Trátase dunha asemblea de presentación de propostas .