[29-06-2018] O auditorio da Casa da Cultura de Bertamiráns acollerá o próximo sábado, 7 de xullo, a retransmisión da ópera Lucia di Lammermoor, a partir das 21.30 horas. O Concello de Ames súmase a esta iniciativa, no marco da Semana da Ópera, que permitirá ver esta produción, procedente da English National Opera, en museos, teatros, centros culturais, prazas, parques, auditorios e concellos de toda España e tamén en Facebook Live, Palco Digital e Opera Vision. A entrada ao auditorio da Casa da Cultura de Bertamiráns será de balde ata completar aforo.

[29-06-2018] Este xoves, 28 de xuño, celebrouse o pleno ordinario do mes de xuño. Antes do inicio da sesión plenaria gardouse un minuto de silencio en repulsa ao caso de violencia machista que acabou coa vida de María Magdalena Moreira Alonso, de 47 anos, asasinada a tiros polo seu marido o luns 18 de xuño, no Porriño, o mesmo día que tiñan pensado asinar o divorcio. De seguido, deuse conta ao Pleno da renuncia do concelleiro Francisco Javier López Suárez. Asemade, aprobouse por unanimidade a ordenanza para a protección e conservación dos camiños e vías públicas municipais, a aprobación das bases para a elección de xuíz/a de paz substituto do Concello de Ames e a solicitude dunha traballadora municipal da correspondente autorización de compatibilidade para o exercicio de actividade privada como arquitecta en horario de tarde. Tamén se aprobou por maioría absoluta a sexta modificación da Relación de Postos de Traballo.

[28-06-2018] Bugallido celebra esta fin de semana festas na honra de San Pedro, do Santísimo Sacramento e de San Antonio. Misas solemnes, sesión vermú, verbenas e actividades para os máis pequenos e as máis pequenas, entre as que destaca unha festa da espuma, forman parte do programa. Cómpre salientar a presenza de artistas da parroquia e do concello como o cuarteto Lume, formado polos ex-cantantes da orquestra Poceiro e o grupo folk Ascuas, que o sábado fará de teloneiro do grupo Treixadura, a gran atracción deste ano. Treixadura chega a Bugallido a través da colaboración do Concello de Ames e da Rede Cultural da Deputación de A Coruña.

[27-06-2018] O Concello de Ames informa de que xa están expostas as listas definitivas de solicitudes admitidas no programa de Escola de Verán. Premendo nos enlaces que están a túa dereita, baixo o apartado de descargas, poderás consultar estas listas. Debido a Lei de Protección de Datos non se poden publicar datos de carácter persoal nestas listas, pero pódese comprobar se un rapaz ou rapaza está admitido/a a través do número de rexistro que figura nas listas e na copia do impreso de inscrición de cada usuario/a. Estas listas tamén se poden consultar nas oficinas do departamento de Educación, situadas no Pazo da Peregrina, nas portas de entrada da Casa do Concello e nas oficinas municipais do Milladoiro.