[26-06-2018] Impulsado por Turismo de Galicia, o programa “Vive o Camiño” ofrecerá este verán máis de 40 actividades nos concellos do Camiño Portugués e do Camiño Portugués da Costa. En total programaranse 44 actividades de balde, entre contacontos e actuacións musicais, a cargo de diferentes artistas con traxectorias recoñecidas e cunha ampla experiencia no mundo das artes escénicas e a música. O primeiro dos espectáculos realizouse onte luns, 25 de xuño, en A Guarda. O Concello de Ames, a través da Concellaría de Promoción Económica e Turismo, acollerá as últimas actuacións, o 14 de setembro no Milladoiro. Será co contacontos “O Camiño que camiña con nós”, de Celso Fernández Sanmartín, e cunha das novas voces do panorama actual da música galega, MJ Pérez, e o seu traballo “Sigo facendo camiño”, onde fusiona diversos estilos musicais co predominio do pop-rock.

[26-06-2018] Dende o pasado venres, 22 de xuño, estase desenvolvendo, tanto en Bertamiráns como no Milladoiro, o programa de conciliación Xuño Lúdico. Este ano as actividades están centradas en torno á integración e a diversidade, polo que as nenas e os nenos participantes traballarán conceptos como as diferenzas, o respecto a outras formas de vida, a convivencia, etc. O programa transcorrerá ata o próximo venres, 29 de xuño, en horario de 8.00h a 16.00 horas, con servizo de comedor dispoñible.

[26-06-2018] O Concello de Ames, a través do departamento de Persoal, fai pública a resolución da Alcaldía número 1373/2018, pola que se resolve a creación dunha bolsa de traballo de persoal de cociña do Concello de Ames. Premendo no enlace que está a túa dereita, baixo o apartado de descargas, poderás obter dito documento.

[25-06-2018] O Concello de Ames, a través do departamento de Persoal, fai público o decreto de modificación das bases do proceso selectivo para a selección e contratación temporal de 5 peóns de xardinería, persoas en situación ou risco de exclusión social perceptoras de RISGA, para a obra ou servizo denominado “servizo de apoio á brigada de obras e servizos para o mantemento de espazos públicos e zonas verdes”. Asemade, publícase a dilixencia de corrección de erros do decreto 1371-2018 polo que se varía os puntos na fase de baremación. Premendo nos enlaces que está a túa dereita, baixo o apartado de descargas, poderás obter ditos documentos.