Por sexto ano consecutivo, o Concello de Ames sumouse á posta en marcha de diversas actividades co gallo da celebración da Semana Europea da Mobilidade. Trátase de propostas a prol da mobilidade activa, do transporte público e doutros medios limpos e intelixentes, nesta edición baixo o lema “Espazo Público Compartido”. As dinámicas terán lugar os días 20, 21 e 22 de setembro. As persoas interesadas en anotarse aínda poden facelo escribindo ao enderezo mobilidade@concellodeames.gal. O programa inclúe unha andaina, xogos, música e unha marcha ciclista. Por mor da celebración destas xornadas, o sábado 21 quedará prohibido o estacionamento no aparcadoiro de Agriños, no Milladoiro, en horario de 14:30 a 20:30 horas; e no aparcadoiro da Casa da Cultura do Milladoiro, de 19:00 a 00:00 horas. Podes consultar os bandos informativos premendo nesta ligazón.

Un ano máis, o Concello de Ames celebrou a Semana Europea da Mobilidade, que nesta ocasión se desenvolveu na fin de semana do 19 ao 21 de setembro cunha serie de actividades para fomentar a mobilidade activa, o uso do transporte público e outros medios sostibles. Na xornada do venres, tivo lugar a marcha ciclista nocturna, unha actividade que reuniu a máis de 400 persoas na localidade de Bertamiráns. O sábado desenvolveuse un circuíto de educación viaria e xogos en bicicleta para os máis pequenos, que viu condicionada a súa participación pola situación meteorolóxica da xornada. Xa no derradeiro día da programación, o domingo día 21, celebrouse a primeira edición da Ames Gravel Social Ride, organizada polo Club ciclista Ames e que contou cunha participación de 49 ciclistas. 

A Concellaría de Mobilidade recorda que está aberto o prazo para inscribirse nos “Rodeiros Brancos”, que se desenvolverán con motivo do día da Seguridade Viaria que se conmemora o 10 de xuño. Baixo o lema “Respecto na rúa, convivencia segura!” vanse organizar dous percorridos pola rúa nos que os/as participantes terán que ir vestidos/as de branco e cunha luz-linterna branca na cabeza, utilizando un método de mobilidade sostible. Preténdese reivindicar a utilización de medios de mobilidade sostible. En Bertamiráns, o 10 de xuño, ás 22.00h, farase unha saída nocturna en bicicleta de 8 quilómetros, mentres que no Milladoiro, o 17 de xuño, ás 22.00 horas, farase un rodeiro curto de 1.730 metros en bicicleta, monopatín, patíns ou patinete. Para participar nestas actividades é necesario inscribirse previamente enviando un correo electrónico ao enderezo mobilidade@concellodeames.gal. Os/as nenos/as deberán estar acompañados/as dunha persoa adulta.

O Concello de Ames vai celebrar por cuarta vez consecutiva a Semana Europea da Mobilidade, que neste 2022 se desenvolve do 16 ao 22 de setembro, cunha serie de actividades a prol da mobilidade activa, do transporte público e doutros medios limpos e intelixentes. Deste xeito, o programa inclúe andainas, xogos, coloquios, mostras e marchas ciclistas ao longo da semana. A temática escollida pola Comisión Europea para este ano é “Mellores conexións”, coa que se busca difundir os beneficios de uso das formas de transporte sostibles. Para participar nestas actividades é necesario inscribirse enviando un correo electrónico ao enderezo mobilidade@concellodeames.gal. Preme nesta ligazón para descargar o bando sobre a prohibición de estacionamento nos aparcadoiros da rúa Agriños e da Casa da Cultura do Milladoiro o sábado 17 de setembro.