Esta mañá a Casa do Concello, en Bertamiráns, acolleu unha xuntanza na que se constituíu de xeito formal a mesa de coordinación do sistema Viogen de loita contra a violencia machista. Dita mesa está constituída por membros dos corpos de seguridade (Policía Local e Garda Civil), persoal municipal  do departamento de Servizos Socias e do CIM de Ames, así como membros do goberno municipal e da Subdelegación do Goberno na Coruña. O obxectivo é que se convoque de xeito trimestral para poñer en común as accións que se realizan neste eido.

O Pazo da Peregrina de Bertamiráns acolle a proxección de “En Deuda con Todas”, un documental estreado no ano 2019 pola organización sen ánimo de lucro galega AGARESO, que trata en detalle as repercusións da penalización do aborto en El Salvador. O evento, que inclúe unha exposición inicial da actualidade do país centroamericano, o visionado do filme e un debate posterior, terá lugar este venres 3 de decembro ás 20:00 horas. A actividade, promovida pola Concellaría de Benestar Social e Igualdade, chega despois da recepción institucional á activista salvadoreña Morena Herrera no mes de outubro, no que pediu ao Concello de Ames que informara á sociedade de situacións como a do seu país, no que o aborto é fortemente penado.

400 quilos de alimentos e produtos infantís recadados, 60 bicicletas doadas para enviar a Africa, ampla venta de camisetas cuxo beneficio irá a parar ao banco de alimentos e unha morea de proxectos novos que as entidades colaboradoras e o concello de Ames irán desenvolvendo a curto e medio prazo  é o balance da I Feira do Voluntariado, celebrada no Pazo da Peregrina a pasada fin de semana. O éxito da Feira reflíctese tamén no elevado número de visitas ao recinto e na participación nos obradoiros e nas charlas.

Co gallo do Día da Muller, o alumnado da EMMA gravou un vídeo interpretando a canción de Rozalén, “A porta violeta”, que fala da loita a prol da igualdade e dos dereitos das mulleres. A conmemoración do 8M terá o seu punto álxido en Ames, hoxe a partir das 18:30. A esa hora, na praza do Concello, lerase o tradicional Manifesto que este ano asinan todos os grupos políticos que compoñen a Corporación Municipal. Despois, na praza de A Maía, diante do monólito de Filomena Fraga, presentarase o roteiro 8M. Seguidamente a Plataforma Feminista de Ames fará unha concentración. Cómpre salientar que este ano, para evitar a propagación da COVD19, no canto de cantar e berrar consignas, farase ruído. A Plataforma convida á cidadanía a participar na concentración e a levar instrumentos, carracas, cazos ou calquera cousa que axude a crear balbordo. Cómpre salientar tamén que, por mor das recomendacións hixiénico sanitarias, adíase a inauguración do roteiro 8M que estaba prevista para o sábado 13. Non obstante, as fichas coa biografía das Mulleres Magníficas  e máis as postais están a ser reclamadas polos centros educativas e polo monitorado do Comedores Escolares para traballar coa rapazada.