O club de Taekwondo TKDenodo organiza, coa colaboración do Concello de Ames, a Deputación da Coruña e a Xunta de Galicia, o X Torneo Concello de Ames de taekwondo infantil. Dito evento vaise celebrar este sábado, 13 de xuño, a partir das 9.00 horas, no pavillón do Milladoiro. Trátase dun torneo no que se fomentan valores como o de respecto, esforzo, compañeirismo, superación e diversión. Ao longo desta xornada practicarase taekwondo en familia.

A Aula da Natureza do Concello de Ames, dependente da Concellaría de Xestión do Medio Natural e Atención ao Rural, ten aberto o prazo para inscribirse na ruta por Riamontes que se vai desenvolver este domingo, 14 de xuño, e que está orientada a todo tipo de público. A ruta, que partirá dende a Aldea do Vilar, farase en horario de mañá e hai 40 prazas dispoñibles. Haberá servizo de autobús para achegarse ata o punto de partida. Para inscribirse, será preciso facelo enviando un correo electrónico ao enderezo auladanatureza@concellodeames.gal.

A Escola Municipal de Música de Ames celebra o mércores 17 de xuño, o seu concerto de fin de curso, unha cita na que o alumnado interpretará diferentes pezas musicais para poñer así peche final a este ano escolar. O recital terá lugar a partir das 19.30 horas na pista de fútbol sala do Milladoiro, que se atopa ao carón das piscinas descubertas e da Casa da Cultura.

O Concello de Ames, a través do departamento de Turismo, organizou para o sábado 20 de maio, ás 12.00 horas, unha visita ao Pazo da Peregrina de Bertamiráns, que se enmarca dentro do programa de visita aos Lugares Rosalianos que marcaron a vida e obra de Rosalía. Ditas visitas están teatralizadas polos Quinquilláns. Esta actividade enmárcase dentro do convenio asinado polos Concellos de Ames, Brión, Dodro e Padrón para promover a ruta As pegadas de Rosalía. Para participar hai que enviar un correo electrónico ao enderezo turismo@concellodeames.gal.