Pestanas principais

Departamento de Secretaría e Administración Xeral

    • Enderezo: Praza do Concello, nº 2, Bertamiráns.
    • Teléfono: 981 88 30 02
    • Horario de atención ao público: de 9:00-14:00 horas.
    • Responsable municipal: Concellaría de Administración Xeral.
    • Responsable técnico: María Ofir Aboy García, técnica de secretaría.
    • Estrutura do servizo: Secretaría, Técnica de Secretaría, 3 Auxiliares Administrativos.
Outros Datos: 
  • Funcións:
    • Asesoría xurídica do Concello
    • Informar e asesorar sobre os asuntos plenarios. Conformación dos plenos e comisións, xuntas de goberno
    • Levantar acta das sesións dos órganos colexiados
    • Certificación dos actos ou resolucións da Presidencia e os acordos dos órganos colexiados decisorios, así como dos antecedentes, libros e documentos do Concello.
    • Remitir á Administración do Estado e á Comunidade Autónoma, nos prazos e formas determinados reglamentariamente, copia ou, no seu caso, extracto dos actos e acordos dos órganos decisorios da Corporación, tanto colexiados como unipersonais.
    • Levar e custodiar o Rexistro de Intereses dos membros da Corporación e o Inventario de Bens.
    • Acompañar ao Alcalde-Presidente ou membros da Corporación nos actos de sinatura de contratos ou escrituras.
    • Xestión da área de contratación. Realización do Plan de contratación semestral.
    • Xestión dos RRHH do Concello de Ames.
  • Bolsas de traballo
  • Procesos selectivos
  • Perosal Municipal
  • Novas relacionadas
  • Axenda.

Novas do departamento

O Pleno acorda por unanimidade solicitarlle á Deputación axudas para crear unha área de autocaravanas en Bertamiráns e unha OTC

A Corporación municipal aprobou por unanimidade todos os puntos tratados no pleno ordinario de decembro. Deste xeito, foi aprobada a solicitude dunha subvención nominativa á Deputación provincial da Coruña para a execución das obras de creación dunha área de autocaravanas en Bertamiráns. Tamén se aprobou a solicitude dunha subvención, mediante convenio de colaboración, á Deputación provincial da Coruña, para o cofinanciamento da realización das actividades do proxecto Oficina de Transformación Comunitaria do Concello de Ames. Outros temas aprobados foron o inicio de expediente para a elección de xuíz/a de paz titular do Concello de Ames e maila modificación do lote 2 do servizo de monitorización dos programas municipais de conciliación de vida laboral e familiar (monitores de almorzos en Bos días cole). Podes ver a gravación do pleno na canle de Youtube do Concello de Ames.

O Pleno aproba a adhesión de Ames á Mancomunidade Serra do Barbanza como membro de pleno dereito

Este pasado xoves, 27 de novembro, celebrouse o pleno ordinario correspondente ao mes de novembro. A Corporación municipal aprobou a adhesión á Mancomunidade Serra do Barbanza; o Plan de Igualdade do Concello de Ames; a resolución do recurso de reposición sobre a prohibición para contratar a empresa Osventos Innovación e Servizos SL; a sexta modificación do plan estratéxico de subvencións; a modificación da aprobación inicial da ordenanza do centro deportivo municipal A Telleira para o exercicio 2026; a subsanación das deficiencias na redacción do proxecto das obras de pavimentación de viarios na aldea de Villaverde (Piñeiro) do POS+2025; a aprobación da segunda fase do POS+ Adicional 4/2025; e a devolución da garantía definitiva constituída mediante aval bancario do servizo de abastecemento de auga potable e saneamento municipal. Ademais, tomou posesión como concelleira Beatriz Martínez, que asume as áreas de Educación, Mocidade e Mobilidade, e aprobáronse dúas mocións do grupo municipal BNG de Ames sobre o impacto das obras na N-550 no comercio local do Milladoiro e sobre a necesidade de incrementar os recursos públicos para facer fronte á violencia machista. Podes ver a gravación do pleno na canle de Youtube do Concello de Ames.

O Pleno aproba a adxudicación do novo contrato do servizo de axuda no fogar á empresa Atende Care SL por preto de tres millóns de euros

A Corporación municipal aprobou por unanimidade a resolución e adxudicación do novo contrato do servizo de axuda no fogar; a ratificación do  decreto sobre a subsanación de deficiencias das obras de pavimentación do viario de Capeáns a Pousada; a ratificación dos decretos de personación e defensa no procedemento abreviado 80/2025, tramitado no Xulgado do Contencioso Administrativo número 2 de Santiago de Compostela; a aprobación inicial do regulamento do consello sectorial da xuventude; a modificación do convenio de colaboración do programa Xantar na casa; a adhesión do Concello á asociación Ames Solar; e a modificación do regulamento do servizo de atención temperá. Tamén se aprobou por maioría absoluta a modificación do regulamento da rede municipal de comedores escolares, bos días cole e tardes divertidas; e maila excepción dos límites cuantitativos relativos aos investimentos do proxecto Ames Digital Water. Ademais, aprobáronse por unanimidade unha declaración institucional do grupo municipal socialista para establecer de interese xeral do estado a ampliación da EDAR de Sisalde; e unha moción do grupo municipal popular sobre a mellora de diversas vías do Concello de Ames. A moción do grupo municipal do BNG para amosar o rexeitamento do pleno ao proxecto de construción da macrocelulosa de ALTRI en Palas de Rei foi aprobada por maioría absoluta. Podes ver a gravación do pleno na canle de Youtube do Concello de Ames.

O Pleno aproba a concesión da medalla do Concello de Ames á Coral polifónica de Bugallido

Esta maña celebrouse un pleno extraordinario e urxente no que a Corporación municipal aprobou por unanimidade a concesión da medalla do Concello de Ames á Coral polifónica de Bugallido con motivo dos seus 50 anos de traxectoria musical. Dita coral foi creada no ano ano 1972 na parroquia de Bugallido. A entrega da medalla farase no acto do Día de Galicia que se vai celebrar o vindeiro luns, 24 de xullo, ás 20.00 horas, no Pazo da Peregrina. Se chove cabe a posibilidade de cambiar o lugar da celebración. A concesión de dita medalla está recollida no regulamento de títulos, honras e distincións do Concello de Ames.

O Pleno aproba a constitución da empresa pública Augas de Ames

Este xoves, día 11, celebrouse o pleno ordinario do mes de maio que foi o último do mandato 2019-2023. En dita sesión plenaria a Corporación municipal aprobou a creación da empresa pública empresarial Augas de Ames EPEL; a primeira modificación do plan estratéxico de subvencións do período 2023-2025; a modificación da ordenanza reguladora do servizo de taxis do Concello de Ames e un suplemento de crédito de 5.301.184,49 euros. Tamén se lle deu luz verde a aprobación da modificación de tres proxectos de obras e eficiencia enerxética e á adhesión do Concello á asociación Rede de cidades que camiñan. Os traballadores de Urbaser Ames, concesionaria do servizo de limpeza viaria e do punto limpo, manifestáronse diante da Casa do Concello e durante o transcurso do pleno entraron na sala de plenos para solicitar unha solución á folga indefinida que están mantendo para reclamar un novo convenio colectivo propio no que se recolla unha subida salarial equiparable ao incremento do IPC. Podes ver a gravación do pleno na canle de Youtube do Concello de Ames.

O Pleno aproba a Conta Xeral de 2019 que amosa un superávit de 1.270.000 euros e un remanente de tesourería de 9.250.000 euros

Este mércores, 24 de febreiro, celebrouse un pleno extraordinario e urxente no que a Corporación municipal aprobou por maioría absoluta a Conta Xeral de 2019. Previamente, a Conta Xeral de 2019 foi ditaminada favorablemente o pasado 15 de xaneiro pola Comisión Informativa Permanente de Economía e Facenda e Especial de Contas. Posteriormente, abriuse un período de exposición publica que finalizou este luns 22 de febreiro. Despois de finalizar todos os trámites de ditame e exposición pública a Conta Xeral foi aprobada polo pleno do Concello de Ames, e de seguido, renderase ante o Consello de Contas. Dentro da Conta Xeral a liquidación orzamentaria é a parte máis importante e na que se reflicten a execución do orzamento de gastos, ingresos e o resultado orzamentario, así como outras magnitudes coma o remanente de tesourería e superávit.

O Pleno aproba a cuarta modificación do ROM e mailo suplemento de crédito 5/2022 financiado con remanente de tesourería para gastos xerais

Este xoves, 24 de novembro, celebrouse o pleno ordinario correspondente a este mes de novembro. En dita sesión plenaria a Corporación municipal aprobou por unanimidade as bases para a elección de xuíz/a de paz substituto do Concello de Ames. Ademais, aprobouse por maioría absoluta a cuarta modificación do Regulamento Orgánico Municipal (ROM) e mailo suplemento de crédito 5/2022 con remanente de tesourería para gastos xerais. Premendo nesta ligazón podes ver a gravación do pleno ordinario de novembro que está na canle de Youtube do Concello de Ames. Varias traballadoras do Servizo de Axuda no Fogar (SAF), que están en folga indefinida dende o pasado 2 de novembro, asistiron como público ao pleno co obxectivo de visibilizar as demandas de melloras que están facendo nas condicións laborais do colectivo.

O Pleno aproba a modificación da ordenanza fiscal reguladora do imposto sobre o incremento de valor dos terreos de natureza urbana

Este xoves, 24 de febreiro, celebrouse a sesión ordinaria do pleno de febreiro no que a Corporación municipal aprobou por unanimidade o expediente de licitación do servizo de limpeza integral nas instalacións municipais e nos centros educativos do concello de Ames. Tamén se aprobou por maioría absoluta a modificación da ordenanza fiscal reguladora do imposto sobre o incremento de valor dos terreos de natureza urbana. Ademais, deuse conta dos decretos ditados pola Alcaldía dende a última sesión plenaria ordinaria; da execución trimestral sobre o período medio de pago a provedores; do informe de morosidade relativo ao cuarto trimestre de 2021; e das queixas, suxestións e reclamacións presentadas no ano 2021.

O Pleno aproba a modificación dos regulamentos dos programas complementarios e lúdicos e das ordenanzas do IVTM e do IBI

Este xoves, 27 de outubro, celebrouse o pleno ordinario correspondente a este mes de outubro. En dita sesión plenaria a Corporación municipal aprobou por unanimidade a modificación puntual do regulamento dos programas de conciliación (Bos días coles, Comedores escolares e Tardes divertidas), dos programas lúdicos, e da Escola de verán;  o proxecto modificado de acondicionamento e mellora térmica da cuberta da escola infantil O Bosque e maila modificación do proxecto da obra de melloras básicas das condicións térmicas e acústicas do pavillón do Milladoiro; a modificación da ordenanza de bens inmobles; un recoñecemento extraxudicial de crédito, por valor de 48.000 euros; e o incremento da contía para gratificacións, horas extras e horas complementarias. Ademais, aprobouse por maioría absoluta (só votou en contra o concelleiro de Ciudadanos) a modificación da ordenanza de imposto sobre vehículos. Por último, abordouse unha moción por vía de urxencia sobre o Día mundial da infancia 2022, que foi aprobada por todos os grupos da Corporación como declaración institucional. Premendo nesta ligazón podes ver a gravación do pleno ordinario de outubro que está na canle de Youtube do Concello de Ames.

O Pleno aproba a proposta do goberno sobre a asignación de dedicacións, a contratación de persoal de confianza e a dotación de medios para os grupos políticos da oposición

O salón de plenos da Casa do Concello acolleu este martes o pleno de organización da nova corporación municipal do Concello de Ames. A dotación de medios en favor dos grupos políticos, a creación de postos de traballo de persoal eventual de confianza e, sobre todo, a asignación de dedicacións exclusivas e parciais, foron os temas que xeraron maior debate nunha sesión que se prolongou por espazo de dúas horas. O pleno serviu tamén para establecer a periodicidade das sesións plenarias, da Xunta de Goberno Local e para a creación das comisións informativas permanentes.

Eventos del departamento

> Pleno ordinario xullo 2023

Este xoves, día 27, o Concello de Ames celebrará o pleno ordinario correspondente ao mes de xullo.

Pleno de investidura

Este sábado, 15 de xuño, celébrase o primeiro pleno do mandato 2019-2023 no que se desenvolverá o acto de investidura. O pleno de constitución da nova Corporación desenvolverase dende as 12:00 horas no auditorio da Casa da Cultura de Bertamiráns. Os concelleiros e concelleiras prometerán o seu cargo e será elixido o alcalde. Os 21 concelleiros/as terán que facer unha votación nominal na que cada edil terá que votar por algún dos candidatos á Alcaldía.

Xuntanza de Portavoces

A Casa do Concello acolle a xuntanza de portavoces a partir das 14.00h este xoves, 11 de xullo.