Os Concellos de Ames e Brión están levando a cabo o programa integrado de emprego Ames e Brión 2019-2020, cofinanciado pola Consellería de Economía, Emprego e Industria. Nesta edición, participan 100 persoas desempregadas menores de 30 anos e persoas desempregadas maiores de 45 anos. O programa parte cun obxectivo de inserción do 40% sobre o total das persoas participantes. Aínda que nesta edición a Administración vai rebaixar os obxectivos marcados, neste momento do programa acadouse xa o 38% de insercións no mercado laboral a pesar da paralización da actividade que supuxo a crise sanitaria derivada da Covid-19. Na actualidade, o alumnado de dito programa está recibindo formación presencial, despois de varias semanas recibindo teleformación.

Por terceiro ano volve a programación musical “AmesON de verán”, que comeza este mércores 29 de xuño co concerto do grupo Club Naval na praza Manuel Murguía do Milladoiro, ás 21:00 horas. O programa, que se desenvolverá entre xuño e setembro, incluirá 13 actuacións musicais de balde, organizadas pola Concellaría de Promoción Económica para dinamizar o sector comercial durante o período estival. Premendo nesta ligazón pódese consultar a programación ao completo do “AmesON de verán” 2022.

A Praza da Maía, ás 17.00 horas, será o escenario do segundo acto de preselección do concurso de karaoke "Canta con Ames", o sábado 3 de xullo, no que participarán 14 persoas repartidas entre as 3 categorías. 20 cantantes, seleccionados dos dous días, cada un na súa categoría correspondente, pasarán á semifinal que se celebrará o vindeiro 28 de xullo no Milladoiro, coincidindo coas festas da Madalena. A ambos eventos poderá acudir público con limitación de aforo. En caso de que as condicións meteorolóxicas non o permitan, o evento do sábado trasladarase á Casa da Cultura do Milladoiro.

O Concello de Ames, a través da Concellaría de Promoción Económica e Emprego, presentou esta mañá, no salón de plenos da Casa do Concello, a Guía de Empresas de Ames, un proxecto que parte co obxectivo de ofrecer a empresarios e usuarios amesáns unha base de datos das empresas e do comercio local. Baixo o slogan “Tes que estar!” a Administración local busca achegar o comercio local á veciñanza mediante esta plataforma dixital, que permite localizar empresas, comercios e locais de hostalería de maneira sinxela dende a rede. O aplicativo será público e accesible a través da web do Concello. Na actualidade, dáse un prazo dun mes para altas de novos establecementos e corrección de posibles erros.