[03-12-2018] A Xunta de Goberno Local do Concello de Ames, en sesión celebrada o día 15 de novembro de 2018, acordou abrir un novo trámite de información pública do Plan Parcial do sector de solo urbanizable “S-07 - VENTURIÑA” do PXOM de Ames”. De conformidade co establecido no artigo 75.1 da Lei 2/2016, do 10 de febreiro, do solo de Galicia, sométese a información pública polo prazo de dous meses, contados a partir da derradeira publicación deste anuncio no Diario Oficial de Galicia, nun dos xornais de maior difusión da provincia e na sede electrónica/páxina web deste Concello. Durante o devandito prazo poderá ser examinado por calquera interesado/a no departamento de urbanismo, situado na rúa Alcalde Lorenzo, nº 2, 1º, Bertamiráns, en horario de 9.00 h a 14.00 horas, e formular as alegacións que se consideren oportunas. Premendo nos enlaces que están a túa dereita, baixo o apartado de descargas, poderás obter os documentos de dito Plan Parcial.

[01-12-2018] O Concello de Ames despide este 2018 cunha programación cargada de teatro, obradoiros e eventos, entre os que non poden faltar varias sesións de contacontos para os máis cativos e cativas. Ao longo deste mes, haberá unha sesión e un obradoiro de postais de Nadal en cada biblioteca, así como dúas sesións máis nos locais sociais de Bugallido e Augapesada. A entrada a estas sesións, dirixidas a nenas e nenos entre os 3 e os 8 anos, é libre e gratuíta. Para participar no obradoiro, dirixido ao alumnado de 3º a 6º de Primaria, é preciso inscribirse do 1 ao 12 de decembro a través dos teléfonos 981 88 48 29 (Bertamiráns) e 981 53 08 07 (Milladoiro), ou a través do enderezo de correo electrónico biblioteca@concellodeames.gal. As inscricións tamén se poden tramitar nas propias bibliotecas.

[30-11-2018] Este xoves, 29 de novembro, celebrouse o pleno ordinario correspondente ao mes de novembro no que a Corporación municipal debateu sobre a aprobación inicial do Regulamento orgánico de Participación Cidadá do Concello de Ames. Este tema quedou encima da mesa á espera dun informe xurídico, que clarifique unha dubida formulada polo grupo municipal popular. Ademais aprobouse por unanimidade a aprobación dos textos refundidos da Relación de Postos de Traballo (RPT), do Convenio colectivo do persoal laboral, e do Regulamento do Fondo de Acción Social (FAS). Por último, rexeitáronse dúas propostas presentadas, de forma conxunta, polos grupos municipais do Partido Popular e de Pacto por Ames para dotar ao Concello de Ames dunha Comisaría da Policía Nacional, adscrita á de Santiago de Compostela, e sobre a realización de actividades para conmemorar o 40 aniversario da Constitución Española. O goberno municipal desenvolverá unha programación específica sobre o 40 aniversario da Constitución Española o martes 4 e mailo xoves 6 de decembro.

[30-11-2018] O Concello de Ames, a través da Concellaría de Comercio e Promoción Económica, volve convocar, un ano máis, o Concurso de Escaparates de Nadal. As persoas que queiran participar deberán engalanar os seus escaparates con motivos relacionados co Nadal, prestando atención á orixinalidade para conseguir a atracción do público. Os escaparates deberán permanecer expostos entre o 14 de decembro de 2018 e o 7 de xaneiro de 2019. As solicitudes de inscrición poderán entregarse no rexistro municipal ata o vindeiro 12 de decembro. Premendo no enlace que está a túa dereita, baixo o apartado de descargas, poderás obter as bases e o impreso de inscrición do XIII Concurso de Escaparates de Nadal do Concello de Ames.